မတ်မလီု၊ အဝ်ဂတ် ၆
အပ္ဍဲတွဵုရးမန် ပရေၚ်ကၠေၚ်စက်ပိုတ်တံ ဆက်တုဲက္တဵုဒှ်မံၚ်အခက်အခုဲကီုလေဝ် အလဵုအသဳပၞာန်တွဵုရး ညိလေဝ်ဖန်ဇန် သောင်ကလးကဵုဟွံမာန်ဂှ်တှ်ေ အပ္ဍဲအကြာညးဒေသဂမၠိုၚ် ပရေၚ်ပါ်ပါဲတံသၠုၚ်တိုန်မံၚ်ရောၚ်။
စနူသတ္တဟဒုတိယ ဂိတုဂျူလာၚ်တေံတုဲ ကၠေၚ်စက်နာနာသာ်တံဂှ် ပ္ဍဲဇၟာပ်ပ်ပွိုၚ်ဍုၚ် ကလေၚ်ပိုတ်မံၚ်ပၠန်တုဲ ဒးထပ်ဆဵုဂဗမံၚ်အခက်အခုဲရ။
အပ္ဍဲဒေသဂှ်တှ်ေ ၜိုန်ရကၠေၚ်စက်နာနာ လုပ်ကၠုၚ်မံၚ်တိုက်ရိုက်ကီုလေဝ် ပ္ဍဲဆေၚ်ကၠေၚ်တံဂှ်ကၠေၚ်ပိုတ်အာမံၚ် မွဲဏှမွဲဏှကီု၊ ရာန်အတိုၚ်ပၟိက်စိုတ်ဟွံဂွံတုဲ ဆေၚ်ကၠေၚ်တံဂှ် သီုကဵုကၟာတ်ထောံလဝ်ကီုရောၚ်။
ပရေၚ်အခက်အခုဲကၠေၚ်စက်ဏံ ဗီုဒးဒှ်မံၚ်အခက်အခုဲ ဗီုဒးဆဵုဂဗမံၚ် ဂှ်တှ်ေ ဟီုလဴအိုတ်ဟွံမာန်ပုဟ် ညးဒေသသဓီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အခက်အခုဲတံဂှ် ဟီုလဴထ္ၜးဟွံမာန်ပုဟ်။ ပ္ဍဲပိုဲတံ ဒှ်အာအခက်ခုဲဗွဲမလောန်။ အခိၚ်ကၠေၚ်ဟၟဲတှ်ေ ပိုဲတံဗီုလဵုဒးဟီုရောဂှ်လေဝ် ဟွံတီပုဟ်။ လၟုဟ်ဏံတှ်ေ ဗီုလဵုဒးဖန်ရောဂှ်လေဝ် ဟွံတီပုဟ်။ အာဆေၚ်တၞဟ်လေဝ် ဍေံတံလဝိၚ်ထ္ၜးကဵုတဲသၟး၊ အာဆေၚ်တေံလေဝ် လဝိၚ်ထ္ၜးကဵုတဲ၊ ဒးဒုၚ်ဂုဏ် လ္ၚောဝ်တုဲမှ ရာန်ဂွံသွက်သြန်ၜါလက် ပိလက်ဂှ် ဂွံညိညိရ” သာ်ဝွံ သ္ဂးရ။
တုဲပၠန် အခက်အခုဲကၠေၚ်စက်လၟုဟ်ဏံဂှ်တှ်ေ ဒၞာဲတွဵုရးမန်မွဲဓဝ် မွဲဏှမွဲဏှဒးဆဵုဂဗမံၚ်တုဲ လတူပရေၚ်စဳရေၚ်အုပ်ဓုပ် အလဵုအသဳတွဵုရးမန်ဂှ် သွက်ဂွံဒးသၟာန်အာသၟာန်တံနွံမံၚ်ရောၚ် ညးဆက်ဟီုရ။
အပ္ဍဲတွဵုရးဏံ ပြသၞာကၠေၚ်စက်ပိုတ်မံၚ်ဗီုတံဏံဂှ် ပဵုတုဲဇၞော်တိုန်မံၚ်တုဲ စပ်ကဵုကၠေၚ်စက်မ္ဂး မူဝါဒမွဲမွဲသာ် ထေက်ကဵု ဒးဖျေံလဝ်ကဵုထေက်ရောၚ် ညးဒေသရေဝ် မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပြသၞာကၠေၚ်စက်ဏံဂှ် ဇၞော်မံၚ်။ ကၠေၚ်စက်ဂှ် ရာန်နကဵုၚုဟ်ဖျာဒမၠုတှ်ေ ၚုဟ်မွဲဗီု၊ ရာန်ကဵု QR Code တှ်ေ ၚုဟ်မွဲဗီု ဒှ်မံၚ်ဏောၚ်။ မုဒှ်ကၠုၚ်ရောတှ်ေ အခက်အခုဲတၞဟ်တံလေဝ် ပဵုတုဲဒှ်ကၠုၚ်ရ။ စပ်ကဵုကၠေၚ်မ္ဂး မူဝါဒမွဲမွဲသာ်ဂှ် ပ္ဍဲအဆံၚ်သၟဝ်တံ ညံၚ်ဂွံကၠောန်လောဲသွာအာ မူဝါဒတံ မိက်ဂွံဖျေံကဵုရောၚ်” သာ်ဝွံ သ္ဂးရ။
မွဲလပါ်ပၠန် ကၠေၚ်စက်တံဂှ်တှ်ေ နူသၞေဟ်ၜၚ် Puma International Port Terminal နွံပ္ဍဲကွာန်ဂဒုၚ်ပဝ် ပွိုၚ်ဍုၚ်မုဟ်ဍုၚ်ဂှ် ကုမ္ပဏဳ Myanmar Energy King ကဵု ကုမ္ပဏဳ Ya Zar Min Industry ဂွံလဝ်တေန်ဒါတံဂှ် အတိုၚ်စၞောန်ပ္ညုၚ်အလဵုအသဳတွဵုရး ပါ်ပရအ် သွံကဵုမံၚ် အပ္ဍဲဒေသတံရ။
အတိုၚ်ဗီုဏံကၠေၚ်စက်နာနာတံ လုပ်ကၠုၚ်မံၚ်အပ္ဍဲတွဵုရးတိုက်ရိုက်ကီုလေဝ် ၚုဟ်မးကၠေၚ်ဂှ်တှ်ေ ယဝ်ရၜတ်ကဵု ရးဒေသဇၞော်၊ တွဵုရးတၞဟ်ဟ်တံမ္ဂး နွံမံၚ်ကဆံၚ်ၚုဟ်သၠုၚ်တိုန်ကီု၊ ဒးဆဵုဂဗမံၚ်ကဵုပရေၚ်ကၠေၚ်ပိုတ်လေဝ် မွဲဏှမွဲဏှဒှ်မံၚ်ကီုရောၚ်။
ပရိုၚ် – သြၚ်လောန်တိုၚ်မ်
Photo – Social Media
