နေပျဳဒဝ်၊ အဝ်ဂတ် ၆
ညးကဵုကသပ်ရးနိဂီုဍုၚ် ဒဝ်အံၚ်သာန်သုကျဳ ဆဵုဂဗကဵု ညးစၞးဌာနဳ ICRC ဂှ်တုဲ ဂကောံပၞာန်သီအဝဵုတံကၠောန်ကဵုမံၚ် ပရေၚ်အပြံၚ်အလှာဲ သွက်အခက်အခုဲဍုၚ်ဗမာဂးတုဲ ညံၚ်ဟွံဒးဒုၚ်ဗဂေတ်လဝ်မတ်ဂှ် နူကဵု NUG ကဵု NLD လလောၚ်တြးပရိုၚ် ကဵုလဝ်သတိရ။
ဒဝ်အံၚ်သာန်သုကျဳ ဒးဒုၚ်ရပ်ထိၚ်ဒဝ်လဝ်ဂှ် ပ္ဍဲဂိတုအဝ်ဂတ် ၃ တေံ ညးစၞးဌာနဳ ရးနိဂီုဍုၚ်ဗၟာ နူကမ္မတဳဇိုၚ်ခရက်ဂၠးကဝ် ICRC အာဆဵုဂဗလဝ်တုဲ နူကဵုဂကောံပၞာန်လလောၚ်တြးပရိုၚ် သီုကဵုဗီုရုပ်တၞးတံဂှ် လပါ် ICRC လေဝ် သ္ပလဝ်ဒတန်ရ။
ပွမအာဆဵုဂဗလဝ် ဗွဲတၞဟ်ခြာ နကဵုက္ဍိုပ်လိက်ဓရ်ဗ္စာရဏာပရေၚ်မၞိဟ်ဂှ် ဒုၚ်တၠုၚ်ဗွဲမအိုဟ်တၟိုဟ်တုဲ ပရေၚ်ဂိုတ်ဂစာန် ICRC တံဂှ်လေဝ် သ္ပဏာပရေၚ်စၟတ်သမ္တီရဂှ် အလဵုအသဳညဳသၟဟ်ဂကူ NUG ကေုာံ ကမ္မတဳကေၚ်ကာဗဟဵု ဗော် NLD တံ ကဵုလဝ်သမ္တီရ။
ပေါဲဆဵုဂဗဏံဂှ်တှ်ေ နူကဵုထိၚ်ဒဝ်လဝ် ဒဝ်အံၚ်သာန်သုကျဳ ပရေၚ်ဓဝ်ဍာံဟွံမွဲ အဆက်ပိုတ်မံၚ်ဂၠိုၚ်ကဵုသၞာံဂှ် လမျီု ဆက်ဂျိုၚ်မံၚ်ဏီဂှ် ဂွံတီကေတ်တုဲ သွက်ညးဍုၚ်ကွာန် ဒှ်မံၚ်ဓဝ်စံၚ်တဴတံဂှ်တှ်ေ စိုတ်သက်သာကၠုၚ် ၜိုတ်မွဲကဆံၚ်ကီုရောၚ် NUG သ္ဂးရ။
မွဲလပါ်ပၠန် ပေါဲဆဵုဂဗဏံဂှ် သွက်ဂွံကၟာတ်ပလေအ်အာ ပရေၚ်ဂကောံပၞာန်သီအဝဵုတံ ဖံက်ပကဝ်ၜက်ၜေတ်လဝ် ဥပဒေဂၠးကဝ်တံဂှ်တုဲ သွက်ဂွံဂွံပရေၚ်သ္ပသမ္တီလုပ်သၞောဝ်တံကီု ဟွံသေၚ်မ္ဂး ပရေၚ်အခက်အခုဲဍုၚ်ဗမာနာနာသာ်တံဂှ် ဗဂေတ်လှေအ်လှာန်တုဲသုၚ်စောဲစကာအာ နကဵုနဲကဲ ပရေၚ်ဍုၚ်ကွာန်ဍာံဍာံဟွံသေၚ်တံဂှ် ကၠောန်သ္ပဟွံထေက်ပုဟ် ထံက်ထ္ၜးလဝ်ရ။
ဗီုဂှ်ကီု ကမ္မတဳကေၚ်ကာဗဟဵု NLD လေဝ် ဒုၚ်သ္ဇိုၚ်ကဵုပေါဲဆဵုဂဗမွဲဏံသၟးတုဲ အခက်အခုဲကြေပ်ဂြတ်ဍုၚ်ဗမာတံဂှ် ဒှ်ကၠုၚ်အပြံၚ်အလှာဲလပါ်ခိုဟ်ယျရောၚ် ညံၚ်ဟွံဂွံကံက်ဖျေံတင်နၚ် ကဵုသ္ဂုတ်သွာတ်ပြဟ်ဟ်ဏီဂှ် ပ္ဍဲလိက်လလောၚ်တြးဏံ ကဵုလဝ်သတိ ရောၚ်။
ကမၠောန်တာလျိုၚ် ကမ္မတဳဇိုၚ်ခရက်ဂၠးကဝ် ICRC တံ အခေါၚ်ဆက်ယိုက်ဂၠေၚ်အာပေၚ်ၚ် နွံ-ဟွံမွဲ၊ ပရေၚ်တောတက်နတဲစှ်ေစှ်ေတံ ဗီုလဵုဒှ်ကၠုၚ်ဂှ် ထေက်ကဵုဒးဆက်မၚ်ရံၚ်အာရောၚ် ကမ္မတဳကေၚ်ကာဗဟဵု NLD သ္ဂးရ။
ကၠာဟွံဂွံဆဵုဂဗကဵု ညးစၞးဌာနဳ ICRC ဏီဂှ် စနူပၞာန်သီအဝဵုတုဲ မွဲဝါမှလေဝ် ဒဝ်အံၚ်သာန်သုကျဳ ဟွံဂွံအခေါၚ်ဆဵုဂဗကဵု ညးစၞးဂၠးကဝ်တံကီု။ တုဲပၠန် စောဲစပ်လဝ်ၝောံပိုဒ်နာနာပရေၚ်ဓဝ်ဍာံဟွံမွဲတုဲ ဂကောံပၞာန်ဖျေံလဝ်အမိၚ်တံဂှ် ဂကောံသၟာဥပဒေလပါ်ညးတံ စဵုကဵုစိုပ်တ္ၚဲဏံ ဟွံဂွံအခေါၚ်ကၠုၚ်ဆဵုဂဗဏီရ။
ဟိုတ်ဒှ်သာ်ဂှ်ရ ကောန်တြုံညး ကိုထိၚ်လေၚ်ဂှ် သွက်ဂွံထ္ၜးသက်သဳ ဒဒှ်ရ မိအံက်ညး ဒဝ်အံၚ်သာန်သုကျဳ လမျီုဆက်ဂျိုၚ်မံၚ်ဏီ Proof of life ဂှ် ပၠတရဴချဳဒရာၚ်ကၠုၚ်တုဲ ရဲချဳဒရာၚ် ပရေၚ်ဒဳမဝ်ကရေဇြဳ တံလေဝ် ဆက်တုဲပူဗိုၚ် ဗက်အာတ်မိက်တိုန်ကီုရ။
မွဲလပါ်ပၠန် ညးစၞးတၟေၚ်အာသဳယာန်ကေုာံ ညးစၞးတၟေၚ် ညးအုပ်ကာနာနာကုလသမဂ္ဂ ဆေၚ်စပ်ကဵုရးနိဂီုဍုၚ်ဗၟာတံဂှ် သွက်ဂွံဗလးပတိတ်ကဵု ဒဝ်အံၚ်သာန်သုကျဳကေုာံ သွက်ဂွံကဵုအခေါၚ်ညးတံ အာဆဵုဂဗညိဂှ် အာတ်မိက်ကၠုၚ်ကီုလေဝ် ဂကောံပၞာန်တံဟွံကဵုအခေါၚ်ပုဟ်။
အပ္ဍဲအကာဲအရာဏံမ္ဂး ဒဝ်အံၚ်သာန်သုကျဳ ဒးဒုၚ်ထပိုတ်ကၠေံလဝ် အဆက်ကဵုဂၠးကဝ်မ္ၚး ကာလဇမၠိၚ်ဏံဂှ် အတိုၚ်ပရေၚ်ဓရ်ဗ္စာရဏာမၞိဟ်နွံနွံ ဂကောံပၞာန်ကဵုဆဵုဂဗကု ညးစၞးဌာနဳ ICRC ကိုပ်ကၠာအိုတ် မဒှ်ရ။
ပရေၚ်ဆဵုဂဗဏံဂှ်တှ်ေ ဒှ်ပရေၚ်ဓရ်ဗ္စာရဏာမၞိဟ် လပါ်ခိုဟ်မွဲကီုလေဝ် လတူပရေၚ်ထတ်ယုက် ဒဝ်အံၚ်သာန်သုကျဳ၊ အကာဲအရာဒးဒုၚ်ထိၚ်ဒဝ်လဝ်ကေုာံ အခေါၚ်အရာသ္ဇိုၚ်တံဂှ် ပရေၚ်ဒှ်ဒဝိၚ် ဇၞော်ဇၞော်နွံမံၚ်တံဂှ် ယအ်စှ်ေအာဟၟဲပုဟ် NUG သ္ဂးရ။
ဆၜိုတ်ရုဲစှ် ကဵုဆဵုဂဗကဵု ICRC မွဲဓဝ်သၟးဂှ် ဒဒှ်ရထ္ၜးမံၚ်လစွံစိုတ် လတူဒဝ်အံၚ်သာန်သုကျဳဂှ် နကဵုကောန်ထံၚ်မွဲ မံက်ကၠးမံၚ်ရောၚ် ဂကောံရီုဗၚ်ဟံၚ်ပြာ်ကောန်ထံၚ်ပရေၚ်ဍုၚ်ကွာန် AAPP ထံက်ထ္ၜး လဝ်ရ။
အပ္ဍဲပေါဲသောင်ကလးပရိုၚ် ကၠောန်ဗဒှ်လဝ် ပ္ဍဲနေပျဳဒဝ် ဂိတုဂျောန် ၃၀ လောန်ကၠုၚ်ဏံဂှ်လေဝ် စပ်ကဵုအစဳဇန်ကဵုဆဵုဂဗ ဒဝ်အံၚ်သာန်သုကျဳကဵု ညးစၞးတၟေၚ်အာသဳယာန် နွံဟွံမွဲ လ္တူမဳဒဳယာတံသၟာန်ဂှ်တှ်ေ တၚ်သွဟ် ညးနွံအခေါၚ်ဟီုဂး အလဵုအသဳပၞာန် ဒံက်တာခိုၚ်ခိုၚ်သဵုဂှ် ဒှ်မံၚ်သက်သဳမွဲရ။
စောဲစပ်လဝ်ဒုဟ် ဓဝ်ဍာံဟွံသေၚ်ကီုလေဝ် လတူဒဝ်အံၚ်သာန်သုကျဳ ဂှ် ဒှ်မၞိဟ်ဒးဒုၚ်ဖျေံလဝ်ဒုဟ် အတိုၚ်ဥပဒေရောၚ် ဂကောံပၞာန်တံ စွံလဝ်စိုတ်တုဲ ကဵုဆဵုဂဗကဵု ညးစၞးဂၠးကဝ်တံဟွံဂွံပုဟ် ဂလာန်သွဟ် ဗီုဏံဟေၚ် ဍေံတံဟီုမံၚ်ရ။
စပ်ကဵုအကာဲအရာလၟုဟ်ဏံတုဲ အာသဳယာန်ဂှ် ဒုၚ်သ္ဇိုၚ်ကဵုတၚ်တုပ်စိုတ်ဘုံ ၅ တၚ်တုဲ ပရေၚ်ပဒေါအ်ပကီုပရာတ်တံကီု၊ ပရေၚ်ဆဵုဂဗသဳကၠဳပါလုပ် သီုညးဆေၚ်စပ်ဖအိုတ်၊ ပရေၚ်ရီုဗၚ်ပလံၚ်ဗ္စိုပ် အထံက်ပၚ် ပရေၚ်ဓရ်ဗ္စာရဏာမၞိဟ်ဗၠးဗၠးၜးၜးတံကီု သီုကဵုညးစၞးတၟေၚ်အာသဳယာန် ဂွံလုက်စုက်ဆက်ဆောံ နကဵုအဓိပ္ပါယ်နွံနွံမာန်ဂှ် ဆက်တုဲဗတိုက်ဖအောဝ်မံၚ်ရ။
ဟိုတ်ဂှ်ရ အပ္ဍဲလၟေၚ်တရဴ ညးစၞးတၟေၚ်အာသဳယာန်ဂှ် သီုကဵုဒဝ်အံၚ်သာန်သုကျဳကီု ညးဆေၚ်စပ်တံသီုဖအိုတ်ဂှ် ညံၚ်ဂွံဂွံအခေါၚ်ဆဵုဂဗ ဗၠးဗၠးၜးၜး၊ ပေါဲသဳကၠဳပရေၚ်ဍုၚ်ကွာန် ပါလုပ်မာန်သီုဖအိုတ်တံ မံက်ဂတဝ်ကၠုၚ်တုဲ ဂၠံၚ်တရဴအာမံၚ်နတဲတံ မံက်တိုန်မှလေဝ် အခက်အခုဲကြေပ်ဂြတ်ပရေၚ်ဍုၚ်ဗမာ လကျှ်န် ပရေၚ်တောတက် ဒှ်ကၠုၚ်မာန်ရောၚ် ကမ္မတဳကေၚ်ကာဗဟဵု NLD ကဵုလဝ်သတိကီုရ။
ပရိုၚ် – သြၚ်လောန်တိုၚ်မ်
Photo – Social Media
