သမ္မတသီအဝဵု ဇကုဇကုခါန်ကၞက်လဝ်ကေတ်တ် ဥူမေန်အံၚ်လှိုၚ် အခိၚ်အာမံၚ်တရဴပရေၚ်ဆာန်ကၟိန် ရနိဂီုဍုၚ်သေံဂှ် ပ္ဍဲဒေသလပါ်သၠုၚ်ကျာ ဗြဝတဳ ပယျဵုသေံ-ဗၟာ အကြာဒပ်ပၞာန်ဗမာကဵု ဂကောံဇြဟတ်ပၠန်ဂတးတံ ဆက်ဒှ်မံၚ်ပေါဲဗတိုက်တုဲ ပရေၚ်ကြဳဗုမ်နူဗလးကျာလေဝ်ဆက်နွံမံၚ်ရောၚ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အလဵုအသဳပၞာန်ပြံၚ်လဝ်ဗီုပြၚ် ခါန်ကၞက်လဝ်သမ္မတကေတ်တ် ဥူမေန်အံၚ်လှိုၚ်ဂှ် ဂိတုအဝ်ဂတ် ၆ ဏံ နကဵုလၟေၚ်တရဴပရေၚ်ဆာန်ကၟိန် အာစိုပ်လဝ်ဍုၚ်သေံရ။
အခိၚ်ဥူမေန်အံၚ်လှိုၚ် အာမံၚ်လၟေၚ်တရဴ ပရေၚ်ဆာန်ကၟိန်ဍုၚ်သေံဂှ်တှ်ေ ပ္ဍဲကဵုဒေသဖလူ-မေန်လက်ပါန် လပါ်သၠုၚ်ကျာဗြဝတဳ တွဵုရးကရေၚ်ပယျဵုသေံ-ဗၟာဂှ် အကြာဒပ်ပၞာန်ဗမာကဵု ဂကောံဇြဟတ်ပၠန်ဂတး KNLA မဟာဒပ် ၆ တံ ပ္ဍဲဂိတုအဝ်ဂတ် ၆ ဏံပေါဲဗတိုက်ဆက်ဒှ်မံၚ်ရ။
ပ္ဍဲကဵုပေါဲဗတိုက်ဂှ် နူကဵုၜၚ်ကျာပၞာန်ဂျက်ဖိုက်တာ ဒပ်ပၞာန်သီအဝဵုတံပန်ဗတိုက်ကြဳဖျေံဗုမ် နူကဵုဗလးကျာနွံမံၚ်ရောၚ် ညးဒေသဖလူမွဲတၠ သ္ဂးရ။
ဒပ်ပၞာန်ဗမာတံဂှ် သွက်ဂွံကလေၚ်ထိၚ်ချုက် ဒေသဖလူ-မေန်လက်ပါန်ကေုာံ သ္ကုတ်ဂၠံၚ်ဝဝ်လေ-ဗြဝတဳမာန်တုဲ ပါ်ပရးထပက်မံၚ်ကရောၚ်ပၞာန်တံဂှ်တှ်ေ ပ္ဍဲဇိုၚ်ဒဵုလပါ်ပလိုတ် မေန်လက်ပါန်၊ ဖလူကဵုဍုၚ်လေဝ်ကေဝ်ကဝ်တံဂှ် ပေါဲဗတိုက်ဆက်ဒှ်မံၚ်ဖိုဟ်ရောၚ်။
ပ္ဍဲဂိတုအဝ်ဂတ် ၃ လောန်ကၠုၚ်ဏံ လပါ်ဗမံက် ဒဵုဒေါန ဗြဝတဳ ကရောၚ်ပၞာန်ဒပ်ပၞာန်ဗမာထပက်လုပ်ကၠုၚ်ဂှ် ဂကောံဒပ်ပၠန်ဂတး KNLA တမ်ဒပ် ၂၈ တံ ပန်သလေက်ဗတိုက်ဏာတုဲ နူတမ်ဒပ်ဗမာ ခမရ ၂၀၃ သီုမွဲကရောၚ်ပၞာန်ဂှ် ဒးဝပ်ချိုတ်ဂၠိုၚ်လီုလာ်အာ သီုဖအိုတ်ရ။
ဒပ်ပၞာန်ဗမာတံဂှ် နူကဵုဒၞာဲစုၚ်ၚ်ထပက်မံၚ်ကရောၚ်ပၞာန်ကီုလေဝ် ဟိုတ်နူပရေၚ်မာတ်ဆိုအ်ဒုၚ်ဗတိုက် ဂကောံဇြဟတ်ပၠန်ဂတး KNLA မဟာဒပ် ၆ တံတုဲ ပ္ဍဲဒေသမေန်လက်ပါန်၊ ဖလူတံဂှ် စဵုကဵုစိုပ် ဂိတုအဝ်ဂတ် ၆ ဏံ ဆက်တိုန်ဂတးဟွံမာန်ဏီ ချိုတ်ကီုဒးဝပ်ကီု ဂၠိုၚ်မံၚ်ရောၚ်။
ဒေသလပါ်သၠုၚ်ကျာဗြဝတဳ ပေါဲဗတိုက်ၜါလပါ် သကာတ်မြဟ်မံၚ်တုဲ သီုကဵုကမၠောန်ကျာဖျ လီဠာန်အန်လာၚ်တံက္တဵုဒှ်မံၚ်ဂှ် ပ္ဍဲဂိတုအဝ်ဂတ် ၄ တေံ ညးတာလျိုၚ်အလဵုအသဳဍုၚ်သေံတံ စှ်ေလ္ၚတ် ပရေၚ်တိဍာ်ဒေသပယျဵုတုဲ ကိစ္စကျာဖျကေုာံပေါဲဗတိုက်တံဂှ် လ္ၚတ်ရံၚ်လဝ်ကီုရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media