ပရေၚ်ကၠေၚ်စက်ပိုတ် တွဵုရးမန်ဂှ် ဒှ်ကၠုၚ်ပၞော်ကၠောန်စ သွက်ဆေၚ်ကၠေၚ်ဇၞော်ဇၞော်တံ

မတ်မလီု၊ အဝ်ဂတ် ၇

အပ္ဍဲတွဵုရးမန် အခက်အခုဲကၠေၚ်စက် ကလေၚ်ပိုတ်အာမွဲဝါပၠန်ဏံဂှ် သွက်ဆေၚ်ကၠေၚ်ဇၞော်ဇၞော်တံ ဂွံသွံစကၠေၚ်စက် နကဵုၚုဟ်ဗွဝ်ဖျာဒမၠုတုဲ ဒှ်ဖဵု ဂွံပရဲပရၚ် ဗွဲမဂၠိုၚ်နွံရ။

ဆေၚ်ကၠေၚ်ဇၞော်ဇၞော်တံဂှ် ဟိုတ်နူဂွံအခေါၚ်သွံကၠေၚ်စက်နကဵုစၟတ်ပိုၚ်ခြာနွံတုဲ အခိၚ်ဗ္တံမ္ဂး ဟွံသွံကဵု၊ အခိၚ်တ္ၚဲဂှ်လေဝ် ဟီုလဝ် ကၠေၚ်စက်အိုတ်ယျဂးတုဲ ကၟာတ်ထောံလဝ်ဆေၚ်တံ နွံမံၚ်ရ။

ပြသၞာဏံဂှ် အလဵုအသဳတွဵုရးမန် ယှအ်ဖျေံပါ်ပရအ်ကဵုလဝ်ကၠေၚ်တုဲ ဍေံတံကေတ်အခေါၚ်အရာခိုဟ် ကၠောန်စမံၚ်ရောၚ် ရိုဟ်ကၞက်ပရိုၚ်ကၠေၚ်စက် ဌာန်ပရိုၚ်သြၚ်လောန်တိုၚ်မ် မွဲတၠ သ္ဂးရ။

အတိုၚ်စၞောန်ပ္ညုၚ်အလဵုအသဳဂးတုဲ သွက်ကွဳစက်တံမ္ဂး မွဲသတ္တဟၜါအလန် ဆေၚ်ကၠေၚ်ဇၞော်ဇၞော်တံ သွံကဵုကီုလေဝ်၊ အပ္ဍဲဂအာၚ်ဗွဝ်ဖျာဒမၠုတံမ္ဂး နကဵုစေဝ်ဇၞော်ဇၞော် စေဝ်ဍောတ်ဍောတ် သီုကဵုတိုၚ်ကဳတံဂှ် မိက်ဂွံဂွံၜိုတ်လဵု အတိုၚ်နွံပၟိက်သွံကဵုမံၚ်တုဲ ဂွံမံၚ်ပရဲပရၚ် ဒှ်မံၚ်ဂုဏ်ဖဵုဗွဲမဂၠိုၚ်ရောၚ်။

ညးဒေသမွဲတၠဂှ်တှ်ေ နူကဵုမတ်မလီု သွက်ဂွံကလေၚ်စဴသဓီုဂှ် ကၠေၚ်ဟၟဲတုဲ အာအာတ်အရီုဗၚ် ပ္ဍဲဆေၚ်ကၠေၚ်ဇၞော်ဇၞော် ၃ ဆေၚ် သွက်ဂွံရာန်ကၠေၚ်အကွက် ၅၀၀၀ ဒကေဝ် အာတ်အရီုဗၚ်ကီုလေဝ် ဟိုတ်နူသၞောတ် QR Code  သွံကဵုဟွံမာန်ပုဟ် တးပါဲဟီုဏာတုဲ ဆဂး အပ္ဍဲဆေၚ်ကၠေၚ်တံဂှ်တှ်ေ ဆဵုမံၚ်ဍေံတံစုတ်ကဵုကၠေၚ် စေဝ်ဇၞော်ဇၞော်ဍောတ်တ် သွံစမံၚ်ရောၚ်ဂှ် ညးဟီုကဵု ဌာန်ပရိုၚ်သြၚ်လောန်တိုၚ်မ်ရ။

အပ္ဍဲဂိတုဂျူလာၚ် ၆ အလဵုအသဳပၞာန်ပြံၚ်လဝ်ဗီုပြၚ် အတိုၚ်ခုတ်စၟတ်လဝ်ၚုဟ်ကၠေၚ်စက် ပ္ဍဲတွဵုရးမန်မ္ဂး 92 မွဲလေတ် ၃၈၅၅ ဒကေဝ်၊ 95 မွဲလေတ် ၃၉၄၀ ဒကေဝ်၊ ပရဳမဳယာမ်ဒဳဇေလ် မွဲလေတ် ၅၀၉၅ ဒကေဝ် မဒှ်ရ။

ဆဂး ပရေၚ်သွံမံၚ်ပ္ဍဲဂအာၚ်ဗွဝ်ဖျာဒမၠု ဆေၚ်ကၠေၚ်ဇၞော်တံဂှ်တှ်ေ မွဲလေတ်မ္ဂး အောန်အိုတ် ၅၅၀၀ ဒကေဝ် စဵုကဵု ၇၅၀၀ ဒကေဝ် သွံမံၚ်ၚုဟ်သၠုၚ်ၚ်တုဲ မွဲလေတ်မ္ဂးဂွံမံၚ်ပရဲပရၚ် နူ ၁၅၀၀ ဒကေဝ် စဵုကဵု ၃၅၀၀ ဒကေဝ်ရောၚ်။

အတိုၚ်မဂၞန်ဒးတော်အာမ္ဂး ကၠေၚ်စက် ၂၅၀၀၀ ဂါလန် နွံ ၁၁၂၅၀၀ လေတ်ဂှ် ယဝ်ရ သွံဗွဝ်ဖျာဒမၠုမ္ဂး အောန်အိုတ် ကိုတ်မွဲလ္ၚီ စဵုကဵု ၃၀၀၀ ကိုတ်ပြၚ် ဂွံအာပရဲပရၚ်မာန်ရောၚ်။

ပြသၞာဂအာၚ်ဗွဝ်ဖျာဒမၠု ကၠေၚ်စက်ဏံဂှ် သ္ကိုပ်ဝန်ဇၞော် တွဵုရးမန် ဥူအံၚ်ဝေန်တာန်၊ ဝန်ဇၞော်ပရေၚ်ဂီုကၠီုကေုာံ ပယျဵု သ္ကိုပ်ဗိုလ်ဇၞော် ကျဝ်ဇွာမျေတ်၊ ဝန်ဇၞော်ဂကောံအလဵုအသဳတံကဵု ဥက္ကဌယာယဳ ဂကောံတၠကမၠောန်ကၠေၚ်စက် တွဵုရးမန် ဥူထောန်လောန်တံဂှ် တာလျိုၚ်နွံမံၚ်ရောၚ်။

ကၠေၚ်စက်ပိုတ်မံၚ်ဏံဂှ် ဒှ်မံၚ်ဆၜိုတ် အပ္ဍဲတွဵုရးမန်သၟးရတုဲ  ဟီုကညာၚ်မံၚ် အလဵုအသဳဒဳမဝ်ကရေဇြဳတံဂှ်တှ်ေ ဗ္တံတ္ၚဲဟွံဇူ ဒးသောင်ကလးကဵုပြသၞာတံဏံမာန်ရောၚ် ညးဒေသမန် ဟွံမိက်ထမံက်ယၟု မွဲတၠဂှ် ပါ်ပါဲလဝ်ရ။

တုဲပၠန် အလဵုအသဳပၞာန်ပြံၚ်လဝ်ဗီုပြၚ် ဟွံသောင်ကလးပြသၞာ ကၠေၚ်စက်ဏံဂှ် လတူညးဍုၚ်ကွာန်တံ ပရေၚ်စဳရေၚ်အုပ်ဓုပ် ဍိုန်လျမံၚ်ဂှ် ထ္ၜးမံၚ်သက်သဳရောၚ် ညးဆက်ဟီုရ။

အခက်အခုဲကၠေၚ်စက်ပိုတ်အာတုဲ ရာန်ဟွံဂွံဏံဂှ်တှ်ေ သွက်ညးဍုၚ်ကွာန်သ္ဇိုၚ်တံကီု သီုညးဒးအာကမၠောန် တရဴသ္ၚောဲ တံကီု ဒးဒုၚ်ဇီုကပိုက်မံၚ်ဇၞော်ကဵုဇြဟတ် မဒှ်ရ။

နူကဵုပွိုၚ်ဍုၚ်ပံၚ် ဒးအာမံၚ်ကမၠောန် ပ္ဍဲဍုၚ်မုဟ်ဍုၚ်အရိုဟ်ဟ်တ္ၚဲ သၟတ်မွဲတၠ ဟီုဂှ်တှ်ေ မွဲသတ္တဟမ္ဂး ဂွံကၠေၚ်စက် ၈ လေတ်ရဒှ်တုဲ သွက်ဂွံအာကမၠောန်ဂှ် ဟွံပြေပြံၚ်ပုဟ်၊ ဟိုတ်နူဒးရာန်ကေတ်ကၠေၚ်စက် နူဆေၚ်ဖျာဒမၠုတုဲ သွက်ပရေၚ်ဗုၚ်ဂၞဴကောန်ဇာတ် သ္ၚိဌာန်တံလေဝ်ဒးဆဵုဂဗမံၚ်ပြသၞာဗွဲမဂၠိုၚ်ရောၚ် သ္ဂးရ။

အပ္ဍဲတွဵုရးမန် စနူဂိတုအေပြဳ ၂၂ တေံတုဲ ကွဳလိုန်ဓါတ်မွဲမမ္ဂး မွဲသတ္တဟ ၈ လေတ်၊ ကွဳလိုန်ဓါတ်သၠာပိ ၂၅ လေတ်၊ ထဝ်လာဂျဳ ၃၀ လေတ်၊ ကွဳစက်စကာသ္ၚိ ၂၀၀၀  CC မ္ဂး ၃၅ လေတ်၊ နူ ၂၀၀၀ စဵုကဵု ၃၀၀၀ CC မ္ဂး ၄၀ လေတ် ခုတ်စၟတ်ကဵုလဝ်ရောၚ်။

အပ္ဍဲဂအာၚ်ဗွဝ်ဖျာဒမၠု ကၠေၚ်စက်ဏံဂှ်တှ်ေ တၠကမၠောန်ကၠေၚ်စက်တံကီု၊ ညးတာလျိုၚ်ဌာန၊ ညးဇၞော်ဒပ်ပၞာန် ဒပ်ဗၠာဲသၟိၚ်လ္ၚဵုတံပါလုပ်မံၚ်တုဲ မာန်နေဂျာဆေၚ်ကၠေၚ်ကဵု ညးတာလျိုၚ်ဆေၚ်ကၠေၚ်တံဗက်ကဵုမံၚ်အရီုဗၚ်ရောၚ် သ္ဂးရ။

အတိုၚ်ညးကြပ်ကဵု အလဵုအသဳတွဵုရးမန်တံဟီုမ္ဂး ဝန်ဇၞော်လ္ၚဵုတံဂှ် ဟိုတ်နူကၠေၚ်စက်ပိုတ်တုဲ ဂွံမံၚ်သြန် လုပ်ထာၚ်ပလောအ် ကိုတ်ကဵုလ္ၚီနွံမံၚ်ရောၚ် ဟီုဂးမံၚ်ကီုလေဝ် နူကဵုဌာန်ပရိုၚ်သြၚ်လောန်တိုၚ်မ် သ္ပဒတန်တၞဟ်ခြာ ဟွံဂွံဏီပုဟ်။

အပ္ဍဲဂိတုဂျူလာၚ် ၁၉ ဂှ် ဆေၚ်ကၠေၚ် “ထက်” နူကျာ်ထဝ်ကဵု ဂိတုဂျူလာၚ် ၂၃ ဂှ် ဆေၚ်ကၠေၚ် “ပျဳသိုဝ်မိုဝ်” နူမတ်မလီုတံဂှ် ဟိုတ်နူသွံကၠေၚ်ဒမၠုဂးတုဲ ကေတ်အရေဝ်ကၟာတ်ထောံဆေၚ်တံဂှ် ဂကောံအလဵုအသဳပၞာန်တံ ဆၜိုတ်ဗီုပြၚ်ထ္ၜးစ ကၠောန်ထ္ၜးကဵုလဝ်ရောၚ်။

ဆဂး ပ္ဍဲဂအာၚ်ဗွဝ်ဖျာဒမၠု ဆေၚ်ကၠေၚ်ဇၞော်ဇၞော်တံ ဖန်ဗဒှ်ကဵုညးဍုၚ်ကွာန်တံ ညံၚ်ဂွံကြေပ်ဂြတ်အာဂှ်တှ်ေ ပရေၚ်ကေတ်အရေဝ်လဝ်ဟွံမွဲ ညးတာလျိုင်တံ ပါဲလဝ်တဲ မဒှ်ရ။

အခေါၚ်သွက်ဂွံ ပၠုပ်ခြိုၚ်ထိၚ်ဒဝ် ပါ်ပရအ်ကၠေၚ်စက် ပ္ဍဲတွဵုရးမန်ဂှ်တှ်ေ နူသၞေဟ်ၜၚ် Puma International Port Terminal ကွာန်ဂဒုၚ်ပဝ် ပွိုၚ်ဍုၚ်မုဟ်ဍုၚ် ကုမ္ပဏဳ Myanmar Energy King ကဵု ကုမ္ပဏဳ Ya Zar Min Industry တံ အံၚ်ဇၞးကလိဂွံလဝ် တေန်ဒါရ။

ဆဂး တွဵုရးမန်ဂှ် ယဝ်ရၜတ်ကၞာတ်အာကဵု ရးဒေသဇၞော်တၞဟ်ဟ်တံမ္ဂး ၚုဟ်ကၠေၚ်စက်လေဝ် သၠုၚ်မံၚ်ကဵုနူညးတၞဟ်ကီု၊ ကၠေၚ် 92၊ 95 ပါ်ပရအ်သွံကဵုမံၚ်တံဂှ်လေဝ် ဍာ်ဒကေဝ်ဟွံပေၚ်ပုဟ်ဂှ် လ္ၚတ်ဂွံလဝ် နူပွဳဗွိုၚ် တၠကမၠောန်ကၠေၚ်စက်တံရ။

လတူကၠေၚ်စက် ပိုတ်မံၚ်သာ်ဏံတုဲ သွက်အခက်အခုဲညးဍုၚ်ကွာန်တံဂှ် နူကဵုအလဵုအသဳ ဟီုကညာၚ်ဒၟံၚ်ဒဳမဝ်ကရေဇြဳတံ မူဝါဒမွဲမွဲဖျေံအာတုဲ ထမံက်ကဵုရုပ်ရဴထေက်ရောၚ် ညးဒေသတံ ဗတိုက်ဖအောဝ်လဝ်ရ။

ပရိုၚ် – သြၚ်လောန်တိုၚ်မ်

Photo – CJ