အပ္ဍဲတွဵုရးမန် အမိၚ်ဒေသန္တရ ပတိတ်လဝ်ဂှ် သွက်ရဲဒပ်ပၞာန်သီအဝဵုကဵုရဲဒပ်ဗၠာဲသၟိၚ်တံ ဒှ်ကၠုၚ်ပၞော်ကၠောန်စကီု ညးဍုၚ်ကွာန်တံအာကၠုၚ် ဒးဆဵုဂဗမံၚ်ပရေၚ်အခက်အခုဲဒှ်ကၠုၚ်မံၚ်တုဲ ညံၚ်ဂွံပလီုကဵုအမိင်ဏံညိဂှ် ညးဒေသတံ အာတ်မိက်လဝ်ကုအလဵုအသဳ တွဵုရးမန်ရ။
ထ္ၜးဟိုတ်ကဵုပရေၚ်ဂီုကၠီုတုဲ အပ္ဍဲတွဵုရးမန်ဇၟာပ်ပ်ပွိုၚ်ဍုၚ်တံမ္ဂး စနူအခိၚ်သီအဝဵုပၞာန်တေံတုဲ ပတိတ်လဝ်အမိၚ်ဒေသန္တရ ကော်ခဴစ ၝောံပိုဒ် ၁၄၄ တုဲ၊ အမိၚ်ဂှ်တှ်ေ ပ္ဍဲလက်ထက်အလဵုအသဳပၞာန် ပြံၚ်လဝ်ဗီုပြၚ်ဏံလေဝ် ဂကောံပၞာန်သီအဝဵုတံဆက်တုဲ စကာမံၚ်ဖိုဟ်ရောၚ်။
ထ္ၜးဟိုတ်ပရေၚ်ဂီုကၠီု အမိၚ်တိတ်မ္ၚးအခိၚ်ဗ္တံဟွံဂွံပတိတ်လဝ်ဂှ် မိက်ဂွံကဵုကလေၚ်ရုပ်ထောံတုဲ ရုပ်သီထောံအမိၚ်ဏံမှ သွက်ညးဍုၚ်ကွာန်တံပြေပြံၚ်ကၠုၚ်မာန်ရောၚ် ညးဒေသရေဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အဓိကတှ်ေ ပ္ဍဲဍုၚ်တံဏံ မိက်ဂွံကဵုကလေၚ်ရုပ်ထောံ အမိၚ်တာဒၞာတိတ်မ္ၚးအခိၚ်ဗ္တံဟွံဂွံရ။ အဓိကတှ်ေ သွက်ဂွံပရေၚ်ကူသာန်သွံရာန်ဒးအာအခိၚ်ဗ္တံ သွက်ညးဍုၚ်ကွာန်သ္ဇိုၚ်တံ ဆေၚ်ဍာ်လက်ဖက်၊ ဆေၚ်အစာတ်ခၞာတံ၊ ဆေၚ်ပလာတာတံနာနာသာ်ရ။ ယဝ်ရဂွံပံက်ဆေၚ်တံဂှ်တုဲ ဂွံသြန်ၜိုတ်ထေက်ကြိုက်တှ်ေ ပြေပြံၚ်ကၠုၚ်ညိညိညညမာန်ရောၚ်” သာ်ဝွံ သ္ဂးရ။
ထ္ၜးဟိုတ်ပရေၚ်ဂီုကၠီုတုဲ ပ္ဍဲဇၟာပ်ပွိုၚ်ဍုၚ်တံမ္ဂး ညးတြုံၜါတၠ ဍိုက်ကွဳလိုန်ဓါတ်မွဲစွံဟွံဂွံ၊ နူဗ္တံ ၁၂ နာဍဳ စဵုကဵုနူဂယး ၄ နာဍဳ အမိၚ်တိတ်မ္ၚးအခိၚ်ဗ္တံဟွံဂွံ သီုကဵုပကောံမၞိဟ်ဟွံဂွံ ဂကောံပၞာန်သီအဝဵုတံ ပတိတ်လဝ်အမိၚ်ဒေသန္တရ ကော်ခဴစ ၝောံပိုဒ် ၁၄၄ မဒှ်ရ။
မွဲလပါ်ပၠန် ဒပ်ပၞာန်သီအဝဵုကေုာံရဲဒပ်ဗၠာဲသၟိၚ်တံဂှ် နကဵုတၚ်စောဲစပ်ပရေၚ်ဖံက်ပကဝ်အမိၚ်ဒေသန္တရဂးတုဲ ထ္ၜးဟိုတ်နာနာသာ် ရပ်ထိၚ်ညးဒေသတံတုဲ ပရေၚ်ဓရတ်အာတ်သြန် ဟွံတန်ကဵုအဆတံကၠောန်မံၚ်ရောၚ်။
ထ္ၜးလဝ်ဟိုတ်ကဵု အမိၚ်တိတ်မ္ၚးအခိၚ်ဗ္တံဟွံဂွံတုဲ ဒပ်ပၞာန်ကဵု ဗၠာဲသၟိၚ်တံ ရပ်မံၚ်ရဲသွံဖျာ ညးဝါတ်တ်တံဟွံသှ်ေ ကၠောန်မံၚ်တံဂှ် ပ္ဍဲစၠတ်ထဝ် မိက်ဂွံကဵုသဳကၠဳရောၚ် ညးဒေသသဓီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အဓိကတှ်ေ ကုညးစၞးစၠတ်ထဝ်တံဂှ် ပိုဲတံ မိက်ဂွံအာတ်မိက်ဏာ ဗွဲလၟေၚ်မေတ္တာရ၊ လၟုဟ်ဏံ အခိၚ်ဗ္တံ ၁၀ နာဍဳမ္ဂး ပိုဲတံဟွံဂံၚ်တိတ်မ္ၚးရ။ ဟီုမံၚ် မာယှေဝ်လဝ် အမိၚ်အုပ်ဓုပ်ပၞာန်တုဲ တိတ်မ္ၚးဟွံဂွံဂးတုဲ ရပ်မံၚ်အိုတ်ရ၊ အခိၚ်နူဂယး ၂ နာဍဳ၊ ၃ နာဍဳမ္ဂး ရဲသွံဖျာညးဝါတ်တ်တံ တိတ်အာကၠုၚ်မ္ဂး ဍေံတံရပ်မံၚ်ပၠန်ရ၊ လပါ်ပိုဲတံ ပရေံလောန်အာမံၚ်ကွေံကွေံရ” သာ်ဝွံ သ္ဂးရ။
ဟိုတ်နူအမိၚ်ဒေသန္တရတုဲ ပရေၚ်အာကၠုၚ်ချဳဒရာၚ်ညးဍုၚ်ကွာန် ပ္ဍဲဒေသတံဒးဆဵုဂဗမံၚ်အခက်အခုဲတုဲ ယဝ်ရဒးဒုၚ်ရပ်အာမ္ဂး သွက်ပရေၚ်ဗုၚ်ဂၞဴကောန်ဇာတ်သ္ၚိဌာန်တံ စဵုကဵုပရေၚ်ပိုန်ဒြပ်ညးတံ လီုလာ်အာမာန် ဒးဆဵုဂဗဇီုကပိုက်မံၚ်အိုတ်ရ။
မွဲလပါ်ပၠန် ဒပ်ပၞာန်သီအဝဵုကေုာံ ရဲဒပ်ဗၠာဲသၟိၚ်တံဂှ် ထ္ၜးဟိုတ်ကဵု ပရေၚ်ဖံက်ပကဝ်အမိၚ်ဒေသန္တရတုဲ ရပ်ကေတ်သၟတ်ဒေသတံကီု ပကောံကောန်ပၞာန်ယိုက်ဝန်ပၞာန်တံဂှ် ကၠောန်မံၚ်ရောၚ်။
သွက်ပရေၚ်မံၚ်စံၚ် ကောန်ဇာတ်ကၟိန်သ္ၚိဌာန် ဘဝညးဍုၚ်ကွာန်တံ ဂွံချဳဒရာၚ်အာကၠုၚ်ပြေပြေပြံၚ်ပြံၚ်မာန်ဂှ် အလဵုအသဳပြံၚ်လဝ်ဗီုပြၚ်တံ ညံၚ်ဂွံကလေၚ်ရုပ်သီထောံအမိၚ်ဒေသန္တရညိဂှ် ညးဒေသတံတှ်ေ နွံမံၚ်ပၟိက်ကွေံကွေံရ။
ပရိုၚ် – သြၚ်လောန်တိုၚ်မ်
Photo – CJ