ထဝါဲ၊ အဝ်ဂတ် ၈
အပ္ဍဲပွိုၚ်ဍုၚ်ထဝါဲ ရးတၞၚ်သဳ ဟိုတ်နူဒပ်ပၞာန်သီအဝဵု ကရောၚ်ပၞာန်ထပက်လုပ်ကၠုၚ်မံၚ် ပ္ဍဲဒေသဂြိုပ်ထဝါဲလပါ်ဗၟံက်ဂှ်ရ ညးဍုၚ်ကွာန်ဒေသတံ ရာန်ပကောံစွံလဝ်ကၠေၚ်စက်ဂှ်တှ်ေ ဗက်သီကေတ်ထောံလဝ်နွံမံၚ်ရောၚ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဒပ်ပၞာန် ဇြဟတ်ၜိုတ် ၁၀၀ တံဂှ် စနူသတ္တဟပထမ ဂိတုအဝ်ဂတ်ဏံ လုပ်စိုပ်ကၠုၚ် ပ္ဍဲကွာန်ဥဒျာန်ဇၞော် နွံဒေသဂြိုပ်ထဝါဲလပါ်ဗၟံက်ဂှ်တုဲ နကဵုဇြဟတ်ကောန်ပၞာန်ဗွဲမဂၠိုၚ် ထပက်လုပ်ကၠုၚ် ကရောၚ်ပၞာန် မဒှ်ရ။
ကရောၚ်ပၞာန်ဂှ်တှ်ေ ဂဗဆဵုညာတ်အာကွဳစက်ပလံၚ်ကၠေၚ်စက် လ္တူဂၠံၚ်တံကီု၊ သီုကဵုကၠေၚ်စက် ဂိုၚ်စွံလဝ် ပ္ဍဲသ္ၚိတံဂှ်ကီု ဗက်သီကေတ်မံၚ်ရောၚ်။
ပြဟ်ဟ်ဏံ ကရောၚ်ပၞာန်ဒပ်ပၞာန်သီကေတ်လဝ် ကၠေၚ်တိုင်ကဳ ဟွံအောန်နူ ၁၀၀မ နွံမံၚ်တုဲ ၚုဟ်မးအခိၚ်ဏံမ္ဂး အကြာ သြန်ကိုတ်မွဲလ္ၚီဒကေဝ်ပြၚ်နွံမာန်ရောၚ် သ္ဂးရ။
ကၠေၚ်စက်ဒပ်ပၞာန် သီကေတ်ဏာလဝ်တံဏံဂှ် ဒှ်ကၠေၚ်စက် ညးဍုၚ်ကွာန်ဒေသတံ ရာန်ပကောံစွံလဝ် သွက်ဂွံကၠောန်ကမၠောန် ခါဲၜံက်ပတိတ်ဟကောဝ်ရောၚ် ဂွံတီရ။
အပ္ဍဲဂိတုအဝ်ဂတ် ၅ လောန်ကၠုၚ်ဏံလေဝ် ဒၞာဲကွာန်ဥဒျာန်ဇၞော်ဂှ် ကရောၚ်ပၞာန်ဒပ်ပၞာန်ဏံ စံၚ်ပလီုလဝ်သ္ၚိ ၂ မတုဲ၊ ရပ်ကော်ဏာ ညးတြုံဒေသလ္ၚဵု စွံလဝ်မွဲစွံကဵုကရောၚ်ပၞာန်တံ မဒှ်ရ။
အပ္ဍဲဒေသဂြိုပ်ထဝါဲလပါ်ဗၟံက် ဟိုတ်နူဒပ်ပၞာန်ထပက်မံၚ် ကရောၚ်ပၞာန်ကီုပန်ထဍာၚ်မံၚ်လွဟ်ဇၞော် လွဟ်ဍောတ်တံတုဲ ညးဍုၚ်ကွာန်ဒေသဗွဲမဂၠိုၚ်တံ ဒးဂြိပ်ပါဲဒဴအာ ဒၞာဲဗၠးဘဲလွဟ်တံရ။
ပရိုၚ် – သြၚ်လောန်တိုၚ်မ်
Photo – Social Media