သဓီု၊ အဝ်ဂတ် ၈
အပ္ဍဲခရိုၚ်သဓီု တွဵုရးမန် ဒၞာဲဂကောံဒပ်ပၠန်ဂတးချဳဒရာၚ် ဇြဟတ်ဍိုန်အောန်စှ်ေအာမံၚ်ဂှ် ဂကောံရပ်လွဟ် သၟဝ်တဲဒပ်ပၞာန်သီအဝဵုတံ ကၠောန်မံၚ်ပေါဲရပ်မၞိဟ်ယိုက်ဝန်ပၞာန် ဟွံမွဲကဵုသၞောဝ်ဥပဒေဇၞော်ကဵုဇြဟတ် က္တဵုဒှ်မံၚ်ရောၚ်။
သၟဝ်တဲအလဵုအသဳပၞာန်ပြံၚ်လဝ်ဗီုပြၚ် ဒပ်ပၞာန်၊ ဒပ်ဗၠာဲသၟိၚ်၊ ဂကောံဒပ်မၚ်ကွာန်တံဂှ် ထ္ၜးဟိုတ်ကဵုတၚ်နွံပၟိက် ကောန်ပၞာန်တၟိတုဲ စိုပ်အခိၚ်ဗ္တံမ္ဂး လ္တူဂၠံၚ် ၜိုတ်ဆဵုညာတ်အာသၟတ်တံဂှ်ရပ်ကေတ်ဏာ သွက်ဂွံယိုက်ဝန်ပၞာန်ရောၚ်။
အကာဲအရာပရေံအိုတ်ဂှ်တှ်ေ သၟတ်ဒးဒုၚ်ရပ်လဝ်တံဂှ် အခေါၚ်အရာ သ္ဇိုၚ်မၞိဟ်ဟီုတှ်ေ အခေါၚ်ကၠောန်ကမၠောန်၊ အခေါၚ်ဟီုဂး၊ အခေါၚ်အာကၠုၚ် အခေါၚ်မံၚ်စံၚ်ဗၠးဗၠးၜးၜး မုလေဝ်ဟွံကလိဂွံတုဲ မွဲအလန်ဓဝ် ဒးဒုၚ်ရပ်ဏာလဝ်ရောၚ်။
အပ္ဍဲပွိုၚ်ဗ္တံဂှ်ရ ပလံၚ်ဗစိုပ်ဏာသၟတ်ဒးဒုၚ်ရပ်တံ စုတ်လဝ်ထံၚ်အချုက် ဗ္ဒိုပ်ဗၠာဲသၟိၚ်ကီု၊ ဗ္ဒိုပ်ကၚ်ဗဟဵုတမ်ဒပ်တံတုဲ ယဝ်ရ ရာန်ဗၠးကေတ်ဟွံမာန်မ္ဂး ဒးဒုၚ်ပလံၚ်ဗ္စိုပ်ဏာ ဇရေၚ်ဒပ် ပကောံကောန်ပၞာန်တေံ ဗွဲမပြဟ်ရောၚ်။
ပရေၚ်ရပ်မၞိဟ် သွက်ဂွံယိုက်ဝန်ပၞာန်ဂှ် ပ္ဍဲလက်ထက်အလဵုအသဳပၞာန်ပြံၚ်လဝ်ဗီုပြၚ်ဏံ ပဵုတုဲပရေံကၠုၚ်တုဲ အရေဝ်သွက်ဂွံဒးဟီုလေဝ် ဟၟဲပုဟ် ညးဒေသသဓီု ၃ တၠ သ္ဂးရ။
ဒပ်ပၞာန်၊ ဒပ်ဗၠာဲသၟိၚ်ကေုာံ ဒပ်မၚ်ကွာန်တံဂှ် စနူဂိတုဂျူလာၚ်တေံတုဲ ပ္ဍဲပွိုၚ်ဍုၚ် ကျာ်ထဝ်၊ ၜဳကလေၚ်၊ သဓီု ကေုာံ ပွိုၚ်ဍုၚ်ပံၚ်တံဂှ် ပရေၚ်ရပ်မၞိဟ် သွက်ဂွံယိုက်ဝန်ပၞာန်တံ ပဵုတုဲဂၠိုၚ်တိုန်ကၠုၚ်မံၚ်ရောၚ်။
အပ္ဍဲဂှ်တှ်ေ ကၠာတေံပ္ဍဲပွိုၚ်ဍုၚ်ပံၚ် ပရေၚ်ရပ်မၞိဟ်ယိုက်ဝန်ပၞာန် ဟၟဲကီုလေဝ်၊ လၟုဟ်ဏံ အခိၚ်ဗ္တံမ္ဂး ဒပ်ပၞာန်ကဵုဒပ်ဗၠာဲသၟိၚ်တံ ဗက်ရပ်မံၚ်သၟတ်ဒေသတံ သွက်ဂွံယိုက်ဝန်ပၞာန် နွံကၠုၚ်မံၚ်ရောၚ် ညးဒေသပံၚ် ဟွံမိက်ထမံက်ယၟုမွဲတၠ ဟီုရ။
“ကၠာတေံ ပ္ဍဲကျာ်ထဝ်၊ ၜဳကလေၚ်တံဟေၚ် မိၚ်မံၚ်ရပ်ယိုက်ဝန်ပၞာန်။ လၟုဟ်ဏံတှ်ေ ပ္ဍဲပွိုၚ်ဍုၚ်ပံၚ်လေဝ် ဗက်ရပ်မံၚ်ယိုက်ဝန်ပၞာန်ဂှ် ဆဵုမံၚ်ကဵုနမတ်ယျ” သာ်ဝွံ ဟီုရ။
အတိုၚ်တင်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်မ္ဂး ပ္ဍဲခရိုၚ်သဓီု ၄ ပွိုၚ်ဍုၚ်ဂှ် မွဲတ္ၚဲမ္ဂး သၟတ်သွက်ဂွံယိုက်ဝန်ပၞာန် ဒးဒုၚ်ရပ်မံၚ်မၞိဟ် ၜိုတ် ၁၅ တၠ နွံရောၚ်။
သၟတ်ဒးဒုၚ်ရပ်လဝ်တံဂှ် ဒပ်ပၞာန်ကဵုဒပ်ဗၠာဲသၟိၚ်တံ ကလေၚ်သွံစမံၚ် ကုသ္ကိုပ်အုပ်ဓုပ်ကွာန်/အရာပ်တံတုဲ မွဲတၠမ္ဂး သြန်နူကဵု ၅၀ ကိုတ် စဵုကဵု ၈၀ ကိုတ် ဂွံမာန်ရောၚ်။
ဒပ်ပၞာန်ကဵုဗၠာဲသၟိၚ်တံ ဗက်ရပ်မၞိဟ်သွက်ဂွံယိုက်ဝန်ပၞာန်ဂးတုဲ ကူသာန်သွံစမံၚ်တံဂှ် ညးစၞးစၠတ်ထဝ်တံ ကၟာတ်လဝ်ပါၚ်ဂှ်တှ်ေ ပ္ဍဲအကြာညးဒေသတံ ပရေၚ်ပါ်ပါဲဇၞော်ကဵုဇြဟတ် နွံမံၚ်ရောၚ်။
အပ္ဍဲအရာ ရပ်မၞိဟ်ယိုက်ဝန်ပၞာန်အခိၚ်ကၠာတေံဂှ်တှ်ေ ထ္ၜးဟိုတ်ကဵု ပရေၚ်ဖံက်ပကဝ်အမိၚ်ဒေသန္တရ၊ ညးတြုံ ၂ တၠ ဍိုက်ကွဳလိုန်ဓါတ်မွဲမ ကေုာံ အခိၚ်ဗ္တံတိတ်မ္ၚးဟွံဂွံတုဲ ရပ်မံၚ်ကီုလေဝ်၊ လက်ကရဴဏံတှ်ေ စိုပ်အခိၚ်ဗ္တံ အတိုၚ်လ္တူဂၠံၚ် ၜိုတ်ဆဵုအာသၟတ်တံဂှ် ပတဝ်က္ဍိုပ်ရပ်ကေတ်မံၚ်ရောၚ်။
အပ္ဍဲပွိုၚ်ဍုၚ်ခရိုၚ်သဓီုတံဂှ် အမိၚ်တိတ်မ္ၚးဗ္တံဟွံဂွံ ခုတ်စၟတ်လဝ် စနူဗ္တံ ၁၂ နာဍဳ စဵုကဵုနူဂယး ၄ နာဍဳကီုလေဝ်၊ လၟုဟ်ဏံတှ်ေ ကြဴနူဗ္တံ ၁၀ နာဍဳတုဲ သၟတ်တိတ်ကၠုၚ်ဂၠံၚ်မ္ဂး ဒးဒုၚ်ရပ်မံၚ် သွက်ယိုက်ဝန်ပၞာန်ဖအိုတ်ရောၚ် ညးဒေသၜဳကလေၚ်မွဲတၠ သ္ဂးရ။
“လၟုဟ်ဏံ ဗ္တံ ၁၀ နာဍဳလ္ပဟီုဏီ၊ ဗ္တံ ၈ နာဍဳဂှ် ညးလဵုမွဲလေဝ် ဟွံဂံၚ်တိတ်မ္ၚးရ။ ဆဵုကွဳစက်ဗၠာဲသၟိၚ်တှ်ေ ဂြိပ်၊ ဆဵုကွဳစက်ပၞာန်တှ်ေ ဂြိပ်ရ။ သီုကဵုကွဳစက်သ္ၚိစကာလေဝ် ဗက်ရပ်မံၚ်ရ” သာ်ဝွံ ဟီုရ။
အတိုၚ်သၞောဝ်ဥပဒေ ယိုက်ဝန်ပၞာန်ညးဍုၚ်ကွာန်မ္ဂး သၟတ်တံဂှ် အခေါၚ်ပတိုန်လိက်ပရေၚ်သၠးဒုဟ် ဟွံသေၚ်မ္ဂး အခေါၚ်ဒေါအ်လဝ် ယာယဳနွံကီုလေဝ်၊ သၟတ်ဒးဒုၚ်ရပ်ဏာ ဗွဲမဂၠိုၚ်ဂှ်တှ်ေ ဥပဒေစဵုဒၞာဟၟဲတုဲ သွက်ကောန်ပၞာန်ဒးဒုၚ်ပကောံဏာ မွဲအလန်ဓဝ်ရောၚ်။
အပ္ဍဲခရိုၚ်သဓီုဂှ်တှ်ေ အပ္ဍဲဍုၚ်မ္ၚးဍုၚ် ဂကောံဒပ်ပၠန်ဂတးတံ ပရေၚ်ချဳဒရာၚ်ဟွံမွဲဂှ်ရ ဒပ်ပၞာန်ကဵုဒပ်ဗၠာဲသၟိၚ်တံ ကေတ်အခေါၚ်ခိုဟ်တုဲ ဂၠာဲမံၚ်ဖဵုဂုဏ်သွက်ပူဂဵုညးတံရောၚ် ဟီုဂးမံၚ်အိုတ်ရ။
ညံၚ်ရဴဥပဒေဟွံမွဲ ဒပ်ပၞာန်ကဵုဗၠာဲသၟိၚ်တံ ဗက်ရပ်မံၚ်သၟတ်တံ သွက်ယိုက်ဝန်ပၞာန်ဂှ်တှ်ေ ညးစၞးစၠတ်ထဝ်တံ ရံၚ်မုက်ညးဍုၚ်ကွာန်တံတုဲ ညံၚ်ဂွံပတိုန်ထ္ၜးသဳကၠဳအာဂံၚ်ဂံၚ်သ္ကာသ္ကာညိဂှ် ညးဒေသခရိုၚ်သဓီုတံ အာတ်မိက်လဝ်ရောၚ်။
အပ္ဍဲတွဵုရးမန် နွံမံၚ် ၁၀ ပွိုၚ်ဍုၚ်ဂှ်တှ်ေ ဆၜိုတ်ခရိုၚ်သဓီုမွဲဟေၚ် ပရေၚ်ရပ်မၞိဟ်ယိုက်ဝန်ပၞာန် ပဵုတုဲပရေံကၠုၚ်မံၚ်တုဲ၊ ပွိုၚ်ဍုၚ်တၞဟ်ဟ် သှ်ေမံၚ်တံ ရေဝ်၊ ဇြပ်ဗု၊ မုဟ်ဍုၚ် ကေုာံ ကျာ်မြဟ်တံဂှ်တှ်ေ ပရေၚ်ရပ်ယိုက်ဝန်ပၞာန် နွံမံၚ်ညိညဓဝ်ရ။
ဗီုဂှ်ကီု အပ္ဍဲတွဵုရးမန် ဍုၚ်ဇၞော်မဟာမတ်မလီု ကေုာံ ပွိုၚ်ဍုၚ်ၜါသွာၚ်တံလေဝ် ပရေၚ်ရပ်ယိုက်ဝန်ပၞာန်အောန်မံၚ်တုဲ ဟွံပရေံမံၚ် ဗီုကဵုခရိုၚ်သဓီုဏီပုဟ် ဒှ်မံၚ်အကာဲအရာသာ်ဏံရ။
ပရိုၚ် – သြၚ်လောန်တိုၚ်မ်
Photo – MOI