ဖာပန်၊ အဝ်ဂတ် ၈
အပ္ဍဲတွဵုရးကရေၚ် ခရိုၚ်ဖာပန် ဟိုတ်နူဒပ်ပၞာန်ဗမာ ဒးလဝ်ဘဲပၞာန်ဂိလောန်အာတုဲ ဆက်ကြဳဖျေံမံၚ်ဗုမ် နူဗလးကျာဇၞော်ကဵုဇြဟတ်ဂှ်ရ ညးဍုၚ်ကွာန်ဒေသတံ ချိုတ်ကီု၊ ဒးဘဲဝပ်ကေုာံ သ္ၚိဌာန်ဗွဲမဂၠိုၚ် လီုလာ်ဆောံလေၚ်အာလဝ် မဒှ်ရ။
အပ္ဍဲခရိုၚ်ဖာပန် တိဍာ်မဟာဒပ် ၅ KNU ဂှ် အကြာဒပ်ပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ အပ္ဍဲဂိတုဂျူလာၚ်လောန်ကၠုၚ်မွဲဂိတုဓဝ်ဂှ် ပေါဲဗတိုက်က္တဵုဒှ်လဝ် ကြပ် ၁၀၀ ဝါနွံတုဲ လပါ်ဒပ်ပၞာန်ဗၟာ သီုကဵုအဆံၚ်ဗိုလ်ဇၞော်မွဲတၠ မၞိဟ် ၂၃ တၠတံ ချိုတ်အာတုဲ ၅၅ တၠ ဒးလဝ်ဝပ်နွံရောၚ် KNU လလောၚ်တြးလဝ် ပရိုၚ်ရ။
အပ္ဍဲပေါဲဗတိုက်အကြာ ဒပ်ပၞာန်ဗမာကဵု KNLA မဟာဒပ် ၅ တံဂှ် စဵုကဵုစိုပ်သတ္တဟပထမ ဂိတုအဝ်ဂတ်ဏံ ပေါဲဗတိုက်ဆက်က္တဵုဒှ်မံၚ် တုဲ၊ ပ္ဍဲပေါဲဗတိုက်မုက်ပၞာန် ဟိုတ်နူဒးလဝ်ဘဲ ဂိလောန်အာဂှ် ဆက်တိုန်အာဂတဟွံမာန်တုဲ ဒပ်ပၞာန်ဗမာတံဂှ် စွံပွန်ကဵုကွာန် ခရိုၚ်ဖာပန်တုဲ နကဵုၜၚ်ကျာ ဗက်ကြဳဖျေံမံၚ်ဗုမ်ရောၚ် ရိုဟ်ကၞက်ပရိုၚ် ဒေသတံ သ္ဂးရ။
အကြာတ္ၚဲတံဏံ အပ္ဍဲခရိုၚ်ဖာပန် ထဳတေဝ်လေဝ်၊ ထဳလဝ်တေထ၊ တဝ်သိုဝ်ထ၊ ထဝ်မေဝ်ထ တံဂှ် ဗက်ကြဳဖျေံမံၚ်ဗုမ် နကဵုၜၚ်ကျာတံရောၚ် ရိုဟ်ကၞက်ပရိုၚ်ဒေသမွဲတၠ ဟီုရ။
ပ္ဍဲဂိတုအဝ်ဂတ် ၃ တေံ ခရိုၚ်ဖာပန် ပွိုၚ်ဍုၚ်ဒွယ်လိုဝ် ဂအုံကွာန် ထဳဒဗလူထ အပ္ဍဲကွာန်ထဳလဝ်တေထဂှ် နကဵု ၜၚ်ကျာဗတိုက်ပၞာန် ဂျက်ဖိုက်တာ ဒပ်ပၞာန်ဗမာကြဳဖျေံလဝ်ဗုမ်ဂှ် သ္ၚိ ၈ မ ဒးဒုၚ်လီုလာ် အာလဝ်နွံရောၚ် နူကဵုဇာဖိုၚ် အထံက်အပၚ်ပရေၚ်ၜိုဟ်လလမ်ကရေၚ် KPSN ချူထမံက်လဝ်ပရိုၚ်ရ။
တုဲပၠန် ပ္ဍဲဂိတုအဝ်ဂတ် ၅ တေံ ပ္ဍဲကွာန်ဗဝ်သိုဝ်ထဂှ် ၜၚ်ကျာဗပၞာန်ဂျက်ဖိုက်တာ ဒပ်ပၞာန်ဗမာ ကြဳဖျေံဗုမ် ၄ မတုဲ၊ ညးဗြဴအာယုက် ၅၃ သၞာံ မွဲတၠချိုတ်အာ၊ ညးတြုံ ၃ တၠ၊ ညးဗြဴ ၁ တၠ၊ သီုဖအိုတ် ၄ တၠ ဒးဝပ်အာတုဲ ပါဲနူဂှ်ပၠန် ဇြပ်သဘၚ်ဓဝ် ၂ မ ကေုာံ သ္ၚိဌာန် ၃၀ မ လေဝ် လီုလာ်အာနွံရောၚ် KPSN လလောၚ်တြးလဝ်ရ။
အပ္ဍဲခရိုၚ်ဖာပန် KNU ဂှ် ဒပ်ပၞာန်ကြဳဖျေံမံၚ်ဗုမ် မွဲဏှမွဲဏှတုဲ၊ ပ္ဍဲဂိတုဂျူလာၚ် ၂၅ ကဵု ၃၁ တေံလေဝ် ပ္ဍဲပွိုၚ်ဍုၚ်ဒွယ်လိုဝ် ကွာန်မယ်ကဝ်လို ကေုာံ ကွာန်နာခိုခဳတံဂှ် ဒပ်ပၞာန်ဗမာကြဳဖျေံလဝ်ဗုမ်တုဲ ညးဒေသ ၃ တၠ ဒးဝပ်၊ သ္ၚိ ၁၀ မ လီုလာ်အာလဝ်ရဂှ် ပ္ဍဲလိက်လလောၚ်တြး KPSN ချူထမံက်ထ္ၜးလဝ်ရ။
အပ္ဍဲဂိတုဂျူလာၚ် လောန်ကၠုၚ်တေံ အပ္ဍဲတိဍာ် မဟာဒပ် ၅ ခရိုၚ်ဖာပန်ဂှ် ဒပ်ပၞာန် ဟိုတ်နူပန်ထဍာၚ်ကဵု လွဟ်ဇၞော်ကေုာံ ကြဳဗုမ်နူဗလးကျာတုဲ ညးဍုၚ်ကွာန် ၆ တၠ ဒးဝပ်၊ တုဲပၠန် သ္ၚိဌာန် ၅၀ မ ကေုာံ ဘာလကျာ်၊ ဘာဗ္တောန်လိက်၊ ဘာဗဝ်ဒါကွးဘာမံၚ်၊ စမြိုၚ်ဒၞာဲသီုဖအိုတ် ၄ မလေဝ် လီုလာ်အာနွံရောၚ်။
ပရိုၚ် – သြၚ်လောန်တိုၚ်မ်
Photo – KPSN