သိုလ်၊ အဝ်ဂတ် ၈
လပှ်ကျာဓါတ်ဂမ္တဴတံ တတ်ကၠောံအာမံၚ် အလုံမွဲတ္ကအ်ကိုဝ်ရဳယာတုဲ ညးဍုၚ်ကွာန်ကိုဝ်ရဳယာသၟဝ်ကျာတံ သွက်ဂွံစဵုဒၞာအာ လပှ်ကျာဓါတ်ဂမ္တဴမ္ဂး ၜိုဟ်ပေက်စဖျုန်ကၠဵု ကဵု ဍာ်စာၚ်ၜိုဟ် မနွံကဵုအဟာရတံ ညံၚ်ဂွံသုၚ်စောဲစအိုတ်ညိဂှ် မဳဒဳယာအလဵုအသဳဍုၚ် ဗ္တိုက်ဖ္အောဝ်လဝ်ရ။
ပ္ဍဲဥဒျာန်ဍာ် မနွံပ္ဍဲဍုၚ်ပျုၚ်ယာန်ဂှ် ညးဍုၚ်ကွာန် ကၠုၚ်ပါဲဘဲဓါတ်ဂမ္တဴတံ ဗွဲမဂၠိုၚ် ကၠုၚ်စိုပ်မံၚ်ဂှ် မဳဒဳယာအလဵုအသဳ KCNA ထမံက်ထ္ၜးလဝ်ရ။
က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန် လေဝ် မွဲကရောံကဵု သီုညးဍုၚ်ကွာန်ညးတံမွဲစွံကီု ဒးဆဵုဂဗမံၚ်အကာဲအရာ ခက်ခုဲတံဂှ် ပ္ဍဲပရိုၚ်ဏံ ထမံက်ထ္ၜးလဝ်ရ။
ပ္ဍဲဂိတုအဝ်ဂတ် ၆ တေံ ပ္ဍဲကိုဝ်ရဳယာသၟဝ်ကျာဂှ် ဓါတ်ဂမ္တဴသၠုၚ်တိုန်စိုပ်အာ ၉၈ ဒသမ ၁ ဒီဂရဳ ဖာရၚ်ဟိုက်ရောၚ် ဌာန်ရုပ်ရမျှာၚ်အလဵုအသဳဍုၚ် ထမံက်ထ္ၜးလဝ်တုဲ၊ ဣဏံဂှ်တှ်ေ ကြဴနူစွံလဝ်စၟတ်သမ္တီ ဥတုရာသဳတုဲ ဒှ်ပရေၚ်စၟတ်သမ္တီတၟိ ဓါတ်ဂမ္တဴသၠုၚ်တိုန် မဒှ်ရ။
ပ္ဍဲကိုဝ်ရဳယာသၟဝ်ကျာ အပ္ဍဲသၞာံဏံဂှ် အတိုၚ်ဗီုပြၚ်ဓမ္မတာ ဟွံသေၚ်တုဲ ဒးဆဵုဂဗမံၚ်သတ္တဟဂမ္တဴဂၠိုၚ်အိုတ်တုဲ၊ ဒးဆဵုဂဗမံၚ် တ္ၚဲကၠဵုဂမၠိုၚ်အခိၚ်က္ညၚ် ဟွံသေၚ်မ္ဂး တ္ၚဲမကော်စ သာမ်ဗွတ်ခ် (Sambok) ပ္ဍဲဒေသတံဂှ်ရောၚ်။
သွက်ဂွံဒုၚ်တဝ်စၞေဟ်ကဵု ဘဲဂမ္တဴအခိၚ်က္ညၚ်ဂှ် သွတောမ်နွံကဵုအခိုက်ကၞာ ညံၚ်ဂွံသုၚ်စောဲ ၜိုဟ်ပေက်စဖျုန်ကၠဵုအိုတ်ညိဂှ် မဳဒဳယာအလဵုအသဳဍုၚ် ဗ္တိုက်ဖ္အောဝ်လဝ်ရောၚ်။
အတိုၚ်လိက်လလောၚ်တြး ရုၚ်ဂဥုဲဍုၚ်ပျုၚ်ယာန်မ္ဂး ညံၚ်ဂွံသုၚ်စအာ သတ်ပညောန်၊ သတ်ဂအဳ ကေုာံ စၞစမနွံကဵုအဟာရတၞဟ်တံဂှ်လေဝ် ဗ္တိုက်ဖ္အောဝ်လဝ်ရ။
ၜိုဟ်ပေက်စဖျုန်ကၠဵုဂှ်တှ်ေ ဒှ်စၞစရာသဳ ကိုဝ်ရဳယာသၟဝ်ကျာမွဲတုဲ ပ္ဍဲအခိၚ်က္ညၚ်တှ်ေ သွက်ညးဍုၚ်ကွာန်တံ ညံၚ်ဂွံဒုၚ်ဘဲဂမ္တဴမာန်ဂှ် ဒှ်စၞစမွဲသာ်ရောၚ် မဳဒဳယာအလဵုအသဳဍုၚ် ထမံက်ထ္ၜးလဝ်ရ။
အတိုၚ်ဂလာန်ဝေါဟာတြေံ ညးဍုၚ်ကွာန်တံဟီုမံၚ် နွံမွဲဂှ်တှ်ေ အပ္ဍဲကာလအခိၚ်က္ညၚ် ဍာ်ၜိုဟ်ပေက်ဖျုန်ကၠဵုဂှ် ယဝ်ရဒးစှ်ေလတူဇိုၚ်မ္ဂး သီုကဵုဒှ်မံၚ်ဂဥုဲရောၚ်ဂှ် ထေက်ကဵုဒးသမ္တီလဝ်ရောၚ် ပ္ဍဲပရိုၚ်ဂှ် ထမံက်ထ္ၜးလဝ်ရ။
ပုၚ်ဓါတ်ကသဳပါ ဍာ်စာၚ်ၜိုဟ် စုတ်လဝ်လဂဝ်တံဂှ် ပ္ဍဲအကြာဆေၚ်စသုၚ်အပ္ဍဲဍုၚ်ဇၞော်မဟာမ္ဂး ဒှ်စၞစတၟေၚ် ဗွဲတၟေၚ်သွံမံၚ်ရောၚ် ဂွံတီရ။
အပ္ဍဲအခိၚ်တမ်သၞာံဏံတေံလေဝ် ပေါဲပြိုၚ်တောမ်သွဖျုန်ကၠဵု အဆံၚ်ရးနိဂီုဍုၚ် ကၠောန်ဗဒှ်လဝ် ပ္ဍဲပရိုၚ်ဂှ် ထမံက်ထ္ၜးလဝ်တုဲ၊ မွဲစွံကဵု တၚ်ကဵုကသပ်ပရေၚ်ထတ်ယုက်တံကီု နူကဵုမဳဒဳယာကိုဝ်ရဳယာသၟဝ်ကျာ တြးမံၚ်ဝါဒရောၚ် ညးပါ်ပါဲတံ ဟီုရ။
အလဵုအသဳကိုဝ်ရဳယာသၟဝ်ကျာဂှ် စရၚ်မၞိဟ်ချိုတ်အာလဝ် ဆေၚ်စပ်ကဵုဓါတ်ဂမ္တဴတံဂှ် ဟွံလိက်လလောၚ်တြး ပတိတ်ကီုလေဝ် ပ္ဍဲဍုၚ်သ္ၚိဇိုၚ်ကိုဝ်ရဳယာသၠုၚ်ကျာဂှ်တှ်ေ ဟိုတ်နူလပှ်ကျာဓါတ်ဂမ္တဴတုဲ မၞိဟ်ချိုတ်အာ ၂၀ တၠပြၚ်နွံရောၚ် ဂွံတီရ။
ပရိုၚ် – သြၚ်လောန်တိုၚ်မ်
Ref:Reueters