ဒါကာ၊ အဝ်ဂတ် ၉
သွက်ပရေၚ်ပိုန်ဒြပ် ရးနိဂီုဍုၚ်ဗင်ဂလာဒေအ် ဒှ်အရာပရေၚ်ကိစ္စဇၞော်မွဲ ကမၠောန်ပတိတ်ဗွိုက်လတက်တံဂှ် ဟိုတ်နူသၟုဟ်ဓါတ်သဘာဝပိုတ်မံၚ်တုဲ သွက်ဂွံဆက်ချဳဒရာၚ်အာကမၠောန်မာန်ဂှ် ဒးဆဵုဂဗမံၚ်ကဵု အခက်အခုဲတံရ။
ပ္ဍဲဂိတုလောန်ကၠုၚ်တေံ ဒၞာဲပၠံၚ်ပၠုပ်သၟုဟ်ဓါတ်သဘာဝ ရးနိဂီုဍုၚ်ဗင်ဂလာဒေအ် ၂ ဒၞာဲ အပ္ဍဲဂှ် ပၟတ်တူအာမွဲဒၞာဲတုဲ ပ္ဍဲအခိၚ်ပေါဲပၞာန်ဒေသလဒေါဝ်ဗၟံက်တေံ ဒှ်မံၚ်ဏံ ဒးစကာသြန် သွက်ဓါတ်အစောံဂၠိုၚ်တိုန်မံၚ်ဂှ် ပ္ဍဲပရေၚ်ကမၠောန်ဏံ ဒးဆဵုဂဗအာ အခက်အခုဲဗီုဏံရ။
ပ္ဍဲဗင်ဂလာဒေအ် ဇြဟတ်သၟာကမၠောန်သီုဖအိုတ် ၁၄ ပြကောတိကိုတ် နွံမံၚ်တံဂှ် အပ္ဍဲဏံ သၟာကမၠောန် ၄ ပြကောတိကိုတ်ပြၚ်ဂှ် ခါန်ကၞက်စွံလဝ် ပ္ဍဲပရေၚ်ကမၠောန်ပတိတ်ဗွိုက်လတက်တံ မဒှ်ရ။
သွက်ရးနိဂီုဍုၚ်ဗင်ဂလာဒေအ် သွာၚ်ကမၠောန်ဏံဂှ် ပတိတ်ကဵုမံၚ်ကပေါတ် ၈၀ က္ဍိုပ်ကၠံတုဲ ပကောံကဵုမံၚ်သြန်လုပ် ၁၃ က္ဍိုပ်ကၠံ သွက်ၚုဟ်မးကပေါတ်ပတိတ် အလုံရးနိဂီုဍုၚ်ရ။
ဆဂး သွက်ကမၠောန် တဆံၚ်ပလောအ်၊ ဟကှ် အရာကၠောန်ပတိတ်ဗွိုက်လတက် သွာၚ်ကမၠောန်ဏံသီုဖအိုတ်တံဂှ် ဒးဗ္ဒဗ္ဒာဲဒၟံၚ် လတူသၟုဟ်ဓါတ်သဘာဝဏံ မဒှ်ရ။
ဟိုတ်နူပရေၚ်ပတိတ်အပ္ဍဲဍုၚ် ယအ်စှ်ေအာ ကေုာံ သြန်စကာသွက်ဂွံပလံၚ်ဏာကပေါတ်တံ သၠုၚ်တိုန်တုဲ ပ္ဍဲဗင်ဂလာဒေအ် ဒးဆဵုဂဗ ပြသၞာသၟုဟ်ဓါတ်သဘာဝပိုတ်ဏံဂှ် လံကၠုၚ်မံၚ်ယျ။
အဳရာန်ကၟာတ်တာဒၞာလဝ် ပ္ၚံက်ၜဳဟဝ်မုဇ်တုဲ ပ္ဍဲဍုၚ်ကာတာ ဟိုတ်နူဒးဒုၚ်ဗတိုက်ပလီုလဝ် စမြိုၚ်ဓါတ်အစောံဂှ် သၟုဟ်ဓါတ်ဍာ် သွက်ဂွံပလံၚ်ကဵုဗင်ဂလာဒေအ်ဂှ် ယှအ်ဖျေံအာဏောၚ် ဍုၚ်ကာတာ ဟီုလဝ်ရ။
ပ္ဍဲဗင်ဂလာဒေအ် ဒၞာဲပလံၚ်ပၠုပ်သၟုဟ်ဓါတ်ဍာ် ၂ ဒၞာဲနွံတုဲ အပ္ဍဲ ၁ ဒၞာဲဂှ် ဂိတုလောန်ကၠုၚ်တေံ ပၟတ်တူအာတုဲ ပမာဏကလိဂွံနူကဵုသီုဖအိုတ်ဂှ် ပရေၚ်ကဵုအထံက်ပၚ် ယအ်စှ်ေအာကြပ်ကဝက်ရောၚ် ကာပဏဳကၠေၚ်စက် ကေုာံ သၟုဟ်ဓါတ်သဘာဝအလဵုအသဳ Petrobangla ဟီုလဝ်ရ။
သွက်ဂွံဗပေၚ်ကဵု ကပေါတ်အာတ်မိက်ကာကာမံက်တံမာန်ဂှ် ရုၚ်စက်လ္ၚဵုတံ ဒးရာန်သုၚ်စောဲမံၚ် သၟုဟ်ဓါတ်ၚုဟ်သၠုၚ်နူဆေၚ်ဇိုၚ်ဂၠံၚ်တံ ဟွံသေၚ်မ္ဂး ၚုဟ်ကၠေၚ်ဒဳဇေလ် သၠုၚ်လောန်ဗွဲမလောန်တံရောၚ်။
ပ္ဍဲဗင်ဂလာဒေအ် ရုၚ်စက်တဆိပ်ဖက်ယှေန် ယၟုပြာကတ်မံၚ် ပတိတ်ကဵုမံၚ် သွက်ဍုၚ်လပါ်ပလိုတ်တံဂှ် သၟာကမၠောန် လၟိဟ်ကဵုလၟိဟ်လ္ၚီုတံ ကၠောန်မံၚ်တုဲ၊ ဟိုတ်နူကၠေၚ်စက်ပိုတ်အာတုဲ သွက်ဂွံသုၚ်စောဲ ရိုဟ်ကၞက်ဓါတ်အစောမ်တၞဟ် ညံၚ်ရဴဇဳဝဓါတ် (Biogas) တံဂှ် ချပ်မံၚ်ရောၚ် တၠကမၠောန်လ္ၚဵုတံ ဟီုရ။
ပ္ဍဲရုၚ်စက်ပတိတ်ဗွိုက်လတက် ဍောတ်တ်တံဂှ်တှ်ေ စကာသုၚ်စောဲမံၚ် သၟုဟ်ဓါတ်ဇဳဝတံ နွံမံၚ်ယျ။
Ref: Telegraphindia
