ဖာပန်- အဝ်ဂတ် ၁၀
အပ္ဍဲတိဍာ် KNU မဟာဒပ် ၅ ထိၚ်ချုက်လဝ် ပွိုၚ်ဍုၚ်ဖာပန် တွဵုရးကရေၚ် ဟိုတ်နူၜၚ်ကျာဒပ်ပၞာန်သီအဝဵု ဗတိုက်ဖျေံဗုမ်တုဲ သီုကဵုကောန်ၚာ်မွဲတၠ မပါလုပ်အပံၚ်မၞိဟ်ၜါတၠ ချိုတ်အာလဝ်ရဂှ် ဂွံတီ နူကဵုရဲသ္ဂံၚ် PDF ဒပ်စဵုဒၞာညးဍုၚ်ကွာန်တံရ။
ပ္ဍဲဂိတုအဝ်ဂတ် ၆ လောန်ကၠုၚ်ဏံ အခိၚ်ဗ္တံၜိုတ် ၁၁ နာဍဳကဝက်ဂှ် ပ္ဍဲကွာန်ထဝ်မေဝ်ထာ နူကဵုၜၚ်ကျာ Y-12 ဒပ်ပၞာန်ဗမာ ကြဳဖျေံလဝ် မဗုမ် ၂၀ မတုဲ ပါဲနူဂှ်ပၠန် ၜၚ်ကျာဗတိုက်ဂျက်ဖိုက်တာ ထပ်ကြဳဖျေံလဝ်ဗုမ် ၂ မဏီရောၚ် သ္ဂးရ။
ပေါဲဗတိုက်ဟွံမွဲကီုလေဝ် အခိၚ်ဗ္တံ အဃောမၞိဟ်တံတိက်လှိၚ်ဒၟံၚ်ဂှ် ကေတ်အခေါၚ်ခိုဟ်ကၠုၚ်ကြဳဖျေံဗုမ်တုဲ၊ ရဲချိုတ်အာတံဏံဂှ်တှ်ေ ဟိုတ်နူဒှ်မံၚ်အခိၚ်တိက်လှိၚ်ပ္ဍဲသ္ၚိဒးဒုၚ်ဗုမ်တုဲ ဒးချိုတ်အာလဝ်ရောၚ် ရဲသ္ဂံၚ် PDF မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဒးဗုမ်တုဲ နဝ်မာအေဝ် အာယုက် ၃၉ သၞာံ ကေုာံ ကောန်ၚာ်သ္ၚိကြပ်ပ် အာယုက် ၆ သၞာံ သဝ်ခဝ်ဝါထူတံဂှ် ချိုတ်အာ အပ္ဍဲဒၞာဲဂှ်မွဲအခိၚ်ဓဝ်ရ။
တုဲပၠန် သ္ၚိဌာန်ညးဍုၚ်ကွာန် ၅ မ လေဝ် လီုလာ်အာဂှ်ကီု၊ ကောန်ကွာန်တံဂှ်တှ်ေ ဖေက်တုဲ ဂြိပ်ပါဲဒဴအာဒၞာဲဗၠးဘဲတံရ။
အပ္ဍဲဂိတုအဝ်ဂတ် ၅ တေံလေဝ် ပွိုၚ်ဍုၚ်ဖာပန် ကွာန်တဝ်တိုထဂှ် ဒပ်ပၞာန်သီအဝဵု ကြဳဖျေံဗုမ်နူဗလးကျာတုဲ ညးဗြဴ ၁ တၠ ချိုတ်အာ၊ ၅ တၠ ဒးဝပ်လဝ်ရောၚ် ဂွံတီကေတ်ရ။
ပ္ဍဲအကြာကွာန် နွံအပ္ဍဲခရိုၚ်ဖာပန်တံဂှ် နူကဵုဒပ်ပၞာန်ဗမာတံ ပန်ဗတိုက်မံၚ်ကဵုၜၚ်ကျာကေုာံ ပန်လွဟ်ဇၞော် မွဲဏှမွဲဏှတုဲ ညးဒေသ ချိုတ်၊ ဒးဝပ်တံကီု ဘာဗ္တောန်လိက်၊ သ္ၚိဌာန်၊ စမြိုၚ်သာသနာ လီုလာ်အာလဝ် နွံမံၚ်ဗွဲမဂၠိုၚ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media
