နေပျဳဒဝ်၊ အဝ်ဂတ် ၉
အပ္ဍဲညးယိုက်ဂၠေၚ်တာလျိုၚ်ပၞာန် တုဲဒှ်အာတံ သွက်မၞိဟ် ၈ တၠ သ္ဂောံဂွံကမၠောန်ဂှ် ဆက်ချိက်ကၠောန်ကဵုလဝ်မာန်ယျရောၚ် ဒုဝန်ဇၞော် ဌာနဝန်ဇၞော်သၟာကမၠောန် အလဵုအသဳပၞာန်ပြံၚ်လဝ်ဗီုပြၚ် ဥူမံၚ်မံၚ်တာန် ဟီုလဝ်ရ။
အပ္ဍဲဂိတုအဝ်ဂတ် ၇ လောန်ကၠုၚ်ဏံ သွက်ညးယိုက်ဂၠေၚ်တာလျိုၚ် ပၞာန်ညးဍုၚ်ကွာန် တုဲဒှ်အာတံ ဂွံဂွံကမၠောန်မာန်ဂှ် နူကမ္မတဳဖျေံဒၞာဲဝါဲကမၠောန် ခါန်ကၞက်ကဵုအာကမၠောန်အပ္ဍဲဍုၚ်တုဲယျ ပ္ဍဲကဵု ကၠောန်လဝ်ကောံဓရီုနေပျဳဒဝ်ဂှ် ညးဟီုဂးဏာလဝ်ရောၚ်။
အပ္ဍဲညးယိုက်ဂၠေၚ်တာလျိုၚ်ပၞာန် တုဲဒှ်အာလဝ်တံမ္ဂး ညးမိက်ဂွံကၠောန် ညးယိုက်ဝန်အလဵုအသဳဂှ် ၃ တၠ၊ ညးမိက်ဂွံကၠောန် ကမၠောန် ပုဂ္ဂလိက ၅ တၠ သွက်သ္ဂောံဂွံကမၠောန်ဂှ် ချိက်ကၠောန်ကဵုလဝ်မာန်ယျ ဥူမံၚ်မံၚ်တာန် သ္ဂးရ။
တုဲပၠန် သွက်ညးယိုက်ဂၠေၚ်တာလျိုၚ်ပၞာန် တုဲဒှ်အာတံဂှ် ဒုၚ်သ္ဇိုၚ်ကဵု ဍာ်ဒကေဝ်ပညာ၊ ပရေၚ်စီုသကီုကေုာံ ပရေၚ်ဆဵုဂဗကမၠောန်တံတုဲ ညံၚ်သ္ဂောံဂွံကမၠောန် ကိတ်ညဳကဵုညးတံဂှ် ကၠောန်ကဵုမံၚ်ရောၚ် ဟီုလဴလဝ်ရ။
နူကဵုအလဵုအသဳပၞာန်ပြံၚ်လဝ်ဗီုပြၚ်တှ်ေ ညးယိုက်ဂၠေၚ်တာလျိုၚ်ပၞာန် တုဲဒှ်အာမ္ဂး နကဵုညးယိုက်ဝန်အလဵုအသဳဒှ်ဒှ် ကောန်ကမၠောန် ကာန်ပဏဳ အပ္ဍဲကဵုမ္ၚးဍုၚ်တံဒှ်ဒှ် ဆက်ချိက်ကၠောန်ကဵုမံၚ်ကု ဌာနဝန်ဇၞော်ကေုာံ အေဂျေန်သဳ ဆေၚ်စပ်တံရောၚ် လလောၚ်တြးလဝ်ရ။
ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ လောန်ကၠုၚ်တေံ ဂကောံပၞာန်သီအဝဵု ပၠုပ်လဝ်လမျီုသၞောဝ်ယိုက်ဝန်ပၞာန် ညးဍုၚ်ကွာန်တုဲ ဗွဲကြဴမ္ဂး စဵုကဵုဘာပၞာန်စိုပ်အာ လၟေၚ် ၂၇ ဂှ် ပံက်လဝ်တန်ဗ္တောန်တုဲ ပကောံဂွံလဝ် ကောန်ပၞာန်ညးယိုက်ဝန် ၁၄၀,၀၀၀ ပြၚ်အာယျ။
အပ္ဍဲဂှ်မ္ဂး စနူလၟေၚ် ၁ စဵုကဵုစိုပ်လၟေၚ် ၃ ညးယိုက်ဂၠေၚ်တာလျိုၚ်ပၞာန်တုဲဒှ်အာတံဂှ် ထ္ပက်ကဵုစၟတ်တဲ လိက်စၟတ်သမ္တီ ပရေၚ်ယိုက်ဂၠေၚ်တာလျိုၚ်ပၞာန်တုဲဒှ်အာတုဲ သွက်သ္ဂောံဂွံကမၠောန်ဂှ်လေဝ် ဗိုၚ်ရီုဗၚ်ကဵုမံၚ်ရောၚ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
