တွဵုရးမန် အပ္ဍဲကဵုပွိုၚ်ဍုၚ် နွံမံၚ်ခရိုၚ်သဓီု လ္တူသၞာဲဒါ Non-CDM ညးလုပ်အဝေါၚ်ယိုက်ဝန်ပၞာန်တံဂှ် နူကဵုရုၚ်သ္ကိုပ်ပရေၚ်အုပ်ဓုပ် (ထွေအုပ်) ပတိတ်လဝ်အမိၚ်သွက်ဂွံရပ်ပဝ်တာရဂှ် ဂွံတီကေတ် နူညးကြပ်ကဵု ဌာနအုပ်ဓုပ်ခရိုၚ်တံရ။
ပရေၚ်နွံပၟိက် ယိုက်ဝန်ပၞာန်တံဂၠိုၚ်တိုန်မံၚ်တုဲ ပ္ဍဲခရိုၚ်သဓီု အကြာပွိုၚ်ဍုၚ်တံ ယဝ်ရရပ်ဂွံပဝ်တာမ္ဂး ဒှ်မံၚ်သၞာဲဒါအလဵုအသဳဟဍေံ ဟွံကလေၚ်ဗလးတုဲ ညံၚ်ဂွံပလံၚ်ဗစိုပ်ဏာတန်ဗ္တောန်ဘာပၞာန်ဂှ် ကဵုလဝ်စၞောန်ပ္ညုၚ်နွံရောၚ် သ္ဂးရ။
အပ္ဍဲဂိတုအဝ်ဂတ် ၇ တေံ သၞာဲဒါကမၠောန် ဝါဗ္ၚစက်ကွတ် သဓီု ၂ တၠဂှ် ကောန်ပၞာန်ကဵု ပျူသဝ်ထဳတံရပ်ဏာလဝ်တုဲ ညးတာလျိုၚ်ဇၞော်ဇၞော်ဆေၚ်စပ်တံ ဗက်သောင်ကလးကဵုကီုလေဝ် ဂွံနၚ်အမိၚ်နူ သ္ကိုပ်အုပ်ဓုပ် ပွိုၚ်ဍုၚ်မှ ကလေၚ်ဗလးကဵုမာန်ရောၚ်ဂးတုဲ ညံၚ်ဂွံရပ်အာသီုသၞာဲဒါတံဂှ် နူကဵုဌာနပရေၚ်အုပ်ဓုပ်ကဵုလဝ်အမိၚ်ရောၚ် ညးကြပ်ကဵုဌာနအုပ်ဓုပ်ခရိုၚ်သဓီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သၞာဲဒါ ၂ တၠ ဒးဒုၚ်ရပ်လဝ်တံဂှ် ဒှ်မၞိဟ်အာယုက် ၄၀ သၞာံပြၚ်မံၚ်တုဲ ဒဒှ်ရ အာယုက်လောန်ၜက်မံၚ် နူပရေၚ်ယိုက်ဝန်ပၞာန်တုဲ ထ္ၜးသက်သဳတၚ်နၚ်ချိုတ်ပၠိုတ်တုဲမှ ကလေၚ်ဗလးကဵုလဝ်ရောၚ် သ္ဂးရ။
အပ္ဍဲသဓီု ယဝ်ရဒးဒုၚ်ရပ်ပဝ်တာယိုက်ဝန်ပၞာန်မ္ဂး ဒးထပက်လာဘ်ဗဇဴ ကုသ္ကိုပ်အုပ်ဓုပ်ခရိုၚ် ဥူသဵုအံၚ်၊ သ္ကိုပ်အုပ်ဓုပ်ပွိုၚ်ဍုၚ် ဥူဇြဝ်မဵုသဵုတံ သြန်နကဵုကိုတ်ကၠံတုဲမှ ကေၚ်ဗလးကဵုလဝ်နွံတုဲ ယဝ်ရ ကဵုသြန်ဟွံမာန်မ္ဂး ပ္ဍဲတ္ၚဲဂှ်ဟေၚ်မွဲအလန်ဓဝ် ကဵုပလံၚ်ဗ္စိုပ်ဏာ ဒၞာဲဒပ်ပကောံကောန်ပၞာန် အရာပ်မုဟ်ပန် ဍုၚ်မတ်မလီုတေံရောၚ် ဂွံတီကေတ်ရ။
သ္ကိုပ်အုပ်ဓုပ်ပွိုၚ်ဍုၚ် သ္ကိုပ်အုပ်ဓုပ်ခရိုၚ်တံ စကာအဝဵုလောန်ကာဲမံၚ်တုဲ ကဵုသၞာဲဒါဌာနဆေၚ်စပ်ကဆံၚ်ခရိုၚ်၊ ပွိုၚ်ဍုၚ်တံမွဲစွံကီုလေဝ် ပရေၚ်ညဳသၟဟ်ဟွံမွဲညးသ္ကံတုဲ၊ ညံၚ်ဂွံကၠုၚ်ဇအ်သဝ် ဇရေၚ်က္ဍိုပ်သ္ကိုပ် သၞာဲဒါဌာနဆေၚ်စပ်တံဂှ် ကဵုလဝ်အမိၚ်ဗီုတံဏံရောၚ် ဂွံတီကေတ်ရ။
အပ္ဍဲတွဵုရးမန် ပၞောဝ်ကဵုပွိုၚ်ဍုၚ်ဂမၠိုၚ်မ္ဂး ထ္ၜးဟိုတ်ကဵုယိုက်ဝန်ပၞာန်တုဲ ဒပ်ပၞာန်ကဵုဂကောံပျူသဝ်ထဳ ပွိုၚ်ဍုၚ်ခရိုၚ်သဓီုတံဂှ် နကဵုအမိၚ်ပရေၚ်အုပ်ဓုပ်ပွိုၚ်ဍုၚ်၊ ခရိုၚ် ရပ်မံၚ်ပဝ်တာဂၠိုၚ်အိုတ်တုဲ ယဝ်ရ ရပ်ဂွံမၞိဟ်ဂၠိုၚ်ၚ်မ္ဂး သွံစကဵုပွိုၚ်ဍုၚ်တၞဟ်ဟ်တံ မွဲတၠမ္ဂး သြန် ၂၀၀ ကိုတ် ဂွံမံၚ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – MOI
