ဂျာကာတာ၊ အဝ်ဂတ် ၁၁
ပ္ဍဲရးနိဂီုအေန်ဒဝ်နဳယှာ ဂဥုဲၜူမာဲ ကိတ်တမေန် လၟိဟ် ၁ ဒသမ ၃ တာန်ပြၚ် နွံကဵုၚုဟ်မးဒဝ်လာဗွဲမဂၠိုၚ်တံဂှ် နူကဵုၜၚ်ဖ္ဍိုက်ပစူလဝ်အလာံဍုၚ်သအာၚ် ကောန်ၜၚ်ဗမာ ၇ တၠ ပါလုပ်မံၚ်မွဲမဂှ် ညးတာလျိုၚ်တံ ရပ်သီဂွံလဝ်ရ။
ပရူဒဒှ်ဏံဂှ် အပ္ဍဲကဵုပရေၚ်ရပ်သီဂွံဂဥုဲၜူမာဲ ပ္ဍဲဍုၚ်အေန်ဒဝ်နဳယှာမ္ဂး ဒှ်အရာပရေၚ်ရပ်ဂွံ ဂၠိုၚ်ဇၞော်အိုတ်မွဲရောၚ် ညးတာလျိုၚ်တံ ဟီုရ။
အတိုၚ်သ္ကိုပ်အေဂျေန်သဳ ဗတိုက်ပလီုဂဥုဲၜူမာဲကောန်ဂကူ အေန်ဒဝ်နဳယှာ ဟီုမ္ဂး ညးတာလျိုၚ်တံဝွံ စနူဂိတုဖေဖဝ်ဝါရဳ လောန်ကၠုၚ်တေံတုဲ မၚ်ဗက်လ္ၚတ်ရံၚ်အာမံၚ် ၜၚ်ဖ္ဍိုက် MV King Sun မဒှ်ရ။
နူလပါ်ဍုၚ်သေံ ဒဳအာလပါ်ဗမံက် ရးနိဂီုအေန်ဒဝ်နဳယှာဂှ် ပ္ဍဲလတူၜၚ်ဖ္ဍိုက်ဏံ ကပေါတ်အယာံမာတ် သွက်ဂွံဒှ်သံသယတံ ပါလုပ်မံၚ်ရောၚ် ဂွံလဝ်ပရိုၚ်တုဲ မၚ်ဗက်လ္ၚတ်ကၠုၚ် လအ်ကၠုၚ်မံၚ်ဂိတု ဗွဲမဂၠိုၚ်ရောၚ် သ္ဂးရ။
အိုတ်ကၞောတ် ပ္ဍဲဂိတုအဝ်ဂတ် ၆ ဂှ် ၜၚ်ဖ္ဍိုက်ဏံ လုပ်စိုပ်ကၠုၚ် အပ္ဍဲဗွိုၚ်ပိုင်ပြဳ ဍာ်အေန်ဒဝ်နဳယှာတုဲ ၜၚ်ပၞာန်ဍာ်တံ အာတတ်ဗဒေါအ် တာဒၞာလဝ်ရောၚ်။
ကြဴနူဂှ် ပ္ဍဲဂိတုအဝ်ဂတ် ၇ ဂှ် ဂကောံပံၚ်တောဲတံ စှ်ေအာစၟဳစၟတ်အပ္ဍဲၜၚ်တုဲ ဆဵုဒးဓုပ် ၆၅ ဓုပ် ကၠတ်ပၞုက်လဝ်ဂှ်တုဲ အခိၚ်စၟဳစၟတ်ဂှ် ဒှ်မံၚ်ဂဥုဲၜူမာဲ ကိတ်တမေန်ရောၚ် သ္ပဒတန်လဝ်မာန်ရ။
ကိတ်တမေန် ရပ်သီဂွံလဝ်တံဂှ် လၟိဟ်နွံမံၚ် ၜိုတ် ၁ ဒသမ ၃ တာန်တုဲ ယဝ်ရတော်ကဵုၚုဟ်မးမ္ဂး ရူပဳယာ အေန်ဒဝ်နဳယှာ ၂ ဒသမ ၀၇ ထြဳလဳယာန်၊ ဒဝ်လာသၚ်ကာပူၜိုတ် ၁၄၉ ပြကောတိကိုတ် နွံမာန်ရောၚ် ညးတာလျိုၚ်တံ တော်လဝ်ရ။
ဆဂး ညးတာလျိုၚ်တံဂှ်တှ်ေ အပ္ဍဲၜၚ်ဂှ် ပဵုနူဏံတုဲ ဂဥုဲၜူမာဲတံ ဆက်နွံမံၚ်ဟာဂှ် ဆက်တုဲဂၠိုက်ဂၠာဲမံၚ်ရောၚ် ဟီုလဝ်ရ။
ၜၚ်ဖ္ဍိုက်ဏံဝွံ ပတိုန်လဝ်အလာံ ရးနိဂီုတာန်သာနဳယျာ (Tanzania) တုဲ ရပ်သီဂွံလဝ် ပ္ဍဲဗွိုၚ်ဍာ်အေန်ဒဝ်နဳယှာ ဗ္ဒာဲဍုၚ်သၚ်ကာပူရောၚ်ဂှ် နူဌာန်ပရိုၚ် Antara အလဵုအသဳဍုၚ် ထမံက်ထ္ၜးလဝ်ရ။
ကောန်ၜၚ်ပါကၠုၚ်လတူၜၚ် ၈ တၠတံဂှ်လေဝ် ရပ်ထိၚ်ဂွံလဝ်တုဲ အပ္ဍဲဂှ်မ္ဂး ကောန်ဍုၚ်ဗမာ ၇ တၠကဵု ထာဲဝါန်မွဲတၠတံ ပါလုပ်မံၚ်ရ။
ပြဟ်ဟ်ဏံမ္ဂး တမ်မူလ ဂဥုဲၜူမာဲကိတ်တမေန်တံဏံ ကၠုၚ်နူလဵု၊ သ္ဂောံပလံၚ်ဗ္စိုပ် သၞေဟ်ၜၚ်လဵု၊ ညးပလံၚ်နၚ် ကေုာံ ညးဒုၚ်တဲတံဂှ် ဒှ်ညးလဵုရော ညးတာလျိုၚ်တံ ဆက်တုဲဂၠိုက်ဂၠာဲ သၟာန်သၟုက်မံၚ်ဖိုဟ်ရ။
ညးတာလျိုၚ်အေန်ဒဝ်နဳယှာတံဝွံ ပ္ဍဲဂိတုဂျူလာၚ်မလောန်ကၠုၚ်တေံလေဝ် ဘၚ်(ဂဥုဲၜူမာဲ) ၃ ဒသမ ၃၇ တာန် ပၠံၚ်ပၠုပ်နၚ်ဂၠံၚ်ဒမၠု နူဍုၚ်သေံဂှ် ရပ်ဂွံလဝ်တုဲ သီုရပ်ဂွံလဝ်မၞိဟ်သံသယ ၁၂ တၠကီုရ။
တုဲပၠန် ပ္ဍဲသၞာံ ၂၀၂၁ တေံလေဝ် ဂဥုဲၜူမာဲမက်တာဖိတ်တမေန် ၂ ဒသမ ၅ တာန် ပၠံၚ်ပၠုပ်ဂၠံၚ်ဒမၠု နူဍုၚ်အာဖဂါန်နေတ်သတာန်ဂှ် သရိုဟ်ပလီုထောံဇာဖိုၚ်အဆက်တံတုဲ မၞိဟ်ဒှ်သံသယ ၁၇ တၠဂှ် ရပ်ဂွံလဝ် ရ။
ပ္ဍဲရးနိဂီုအေန်ဒဝ်နဳယှာဂှ် သွက်ရဲသွံရာန်ဂဥုဲၜူမာဲတံမ္ဂး သၞောဝ်ဥပဒေ ဖျေံအမိၚ်ဂစိုတ်မာန်နွံကီုလေဝ် ပြဟ်ဟ်ဏံမ္ဂး ပရေၚ်ဖျေံဒုဟ် ဂစိုတ်ထောံတံဂှ် ဒေါအ်ထောံလဝ် ဂၠိုၚ်ကဵုသၞာံယျ။
Ref:Straitstimes