ဟနေၚ်၊ အဝ်ဂတ် ၁၂
သွက်သ္ဂောံဗတိုက်သၠေက် ၜၚ်ဗၠိုပ်ဍာ်တံမာန်ဂှ် ပ္ဍဲဍုၚ်ညးတံဂှ် ၜၚ်ဖရဳဂိက်ဇၞော်ဇၞော် အဆံၚ်သၠုၚ်အိုတ်ဂှ် ရးနိဂီုဗဳယက်နာန် စသိုၚ်ခၞံမံၚ်ဂှ် ဌာန်ပရိုၚ်ပၞာန် ညးတံထမံက်ထ္ၜးလဝ်ရ။
ပ္ဍဲဒၞာဲသၞေဟ်ခြိုၚ်ၜၚ် သံၚ်တူ နွံပ္ဍဲဍုၚ်ဒါနာန် သၟဝ်တဲဌာနဝန်ဇၞော်ပရေၚ်စဵုဒၞာဂှ် သိုၚ်ခၞံမံၚ် ၜၚ်ဏံဂှ်တှ်ေ၊ ကပေါတ်သွာၚ်ပၞာန် ပတိတ်လဝ် အပ္ဍဲဍုၚ်ဗဳယက်နာန် ဟွံသေၚ်မ္ဂး လွဟ်အဆံၚ်သၠုၚ်အိုတ်ညးတံ ပကောံဂွံလဝ် အပ္ဍဲဍုၚ်တံဂှ်လေဝ် ဗဂပ်စုတ်အာမာန်ရောၚ် သ္ဂးရ။
ပ္ဍဲကိစ္စပရေၚ် ဒှ်ကယျာန်မံၚ် အကြာပယျဵုဍာ်ကဵု ဍုၚ်ကြုက်ဂှ် ဗဳယက်နာန် ပါလုပ်မံၚ်တုဲ ဆက်စပ်ကဵုပရေၚ်ပိုၚ်ပြဳ ၜဳကြုက်လပါ်သၠုၚ်ကျာ ပရေၚ်တၞဟ်ဟ်ဟီုဂးမံၚ်တံနွံကီု ပရေၚ်ဒးပလံၚ်ပၠုပ်နၚ်လွဟ်ပၞာန်နာနာ နူရတ်ယှာတံဂှ် နူကဵုဗဳယက်နာန် ယှအ်ဖျေံတုဲ သွက်ဂွံဇၞော်ပတိုန်အာ ဂစာန်သၠဲပတိတ်အာမံၚ် ကပေါတ်စဵုဒၞာအပ္ဍဲဍုၚ်ဂှ်ရောၚ်။
ရးနိဂီုဗဳယက်နာန်မွဲ ဒးပဓါန်အာမံၚ် နကဵုဇြဟတ်ဇကုကေတ်တ်တုဲ သွက်ဂွံဒက်ပ္တန်အာ သွာၚ်ကမၠောန်ပရေၚ် စဵုဒၞာဂတာပ်ခေတ် ပရေၚ်သၠဲစကာအာဂွံၜါဗီုတံဂှ် ထမံက်မံၚ်ရုပ်ရဴမူဝါဒဂှ်ရောၚ် ပ္ဍဲလိက်လလောၚ်တြးအလဵုအသဳ ထ္ၜးလဝ်မွဲတင်ဂှ် ထမံက်လဝ်ကိုန်အစဳဇန်ဏံရ။
ပံၚ်ကောံအာကဵုဂကောံသုတေသနပရေၚ်စဵုဒၞာ သီုကဵုဂကောံပတိတ်ကပေါတ်တၞဟ်တံမွဲစွံတုဲ ကာန်ပဏဳ Viettel ပရေၚ်ဆက်စၠောံကဵုနဲကဲပညာ သၟဝ်တဲဒပ်ပၞာန်ဂှ် ပံၚ်တောဲကဵုဒပ်ပၞာန်ဍာ်၊ သၞေဟ်ခြိုၚ်ၜၚ်သံၚ်တူ ဗ္ဒာဲဂှ်တုဲ ဂစာန်သိုၚ်ခၞံမံၚ် ၜၚ်ပၞာန်ဏံရောၚ်။
ပ္ဍဲကိုန်အစဳဇန်ဏံမ္ဂး ပရေၚ်ကၠောန်ပတိတ်လွဟ်မကမ် သွက်ဂွံဗဂပ်စုတ်လတူၜၚ် ကေုာံ ကပေါတ်တၞဟ်ဟ်တံလေဝ် ပါလုပ်မံၚ်ရ။
ၜၚ်ဖ္ဍိုက်ကမ်သၠောဝ် နူဗဳယက်နာန် ကၠောန်ပတိတ်အပ္ဍဲဍုၚ် ကေုာံ ၜၚ်ဂေတ်ကၚ်တံ ပဵုဂၠိုၚ်ကၠုၚ်မွဲစွံကဵု ၜၚ်ဗၠိုပ်ဍာ် အဆံၚ်ကဳလို သီုကဵုၜၚ်ဖရဳဂိတ် အဆံၚ်ဂျဳပတ်ဒ် (Gepard) ပတိတ်နူရတ်ယှာတံဂှ် ရာန်လဝ်နွံတုဲ ညံၚ်ဒပ်ပၞာန်ဍာ် ဂွံဂတာပ်ခေတ်ဂှ် ကၠောန်ကၠုၚ်လဝ် အပ္ဍဲဗွဝ်စှ်သၞာံ ဗွဲမဂၠိုၚ်လောန်ကၠုၚ်တေံရ။
ပ္ဍဲဂိတုဒဳဇြမ်ပါဂတဏံမ္ဂး ပေါဲထ္ၜးကပေါတ်ဗၞိက်ပရေၚ်စဵုဒၞာဂၠးကဝ်ဂှ် နူကဵုရးနိဂီုဗဳယက်နာန် အစဳဇန်သွက်ဂွံကၠောန်ဗဒှ် ပ္ဍဲဍုၚ်ဟနေၚ်နွံတုဲ ဣဏံဂှ်တှ်ေ ဒှ်ပေါဲထ္ၜးကပေါတ်ဗၞိက် ကၠောန်ဗဒှ်အလန်တတိယ မဒှ်ရ။
ဣဏံဂှ်တှ်ေ သွက်ပရေၚ်ပတိတ်ကပေါတ်စဵုဒၞာအပ္ဍဲဍုၚ် ဂွံခိုၚ်ဗိုန်ဇြဟတ်ဂွံဇၞော်တိုန် ရိုဟ်ကၞက်သ္ဂောံရာန်ကေတ် ကပေါတ်ပရေၚ်ပၞာန်နာနာတံ ဂွံဂၠိုၚ်တိုန်ဂှ် ဒှ်အရာပရေၚ်ဂိုတ်ဂစာန်မွဲရောၚ်။
Ref:Reuters