နူ ခလရ ၆၀ ကဵု ခမရ ၅၉၆ ကောန်ပၞာန် ၄ တၠ လုပ်ဖျေံလွဟ်

ကျံက်ကျဳ-အဝ်ဂတ် ၁၂

အပ္ဍဲပွိုၚ်ဍုၚ်ကျံက်ကျဳ ရးဗဂေါ နူတမ်ဒပ် ခလရ ၆၀ ကဵုတမ်ဒပ်ခမရ ၅၉၆ ကောန်ပၞာန် နွံမုက်ပၞာန်တံ ၄ တၠ လုပ်ထံက်ၜံၚ် ဖျေံလဝ်လွဟ်ရဂှ် ဗော်သွးကောန်ဂကူကရေၚ် KNU ဗဟဵုလလောၚ်တြးလဝ်ရ။

ကောန်ပၞာန် လုပ်ဖျေံလွဟ်တံဂှ် နူတမ်ဒပ်ခလရ ၆၀ ကောန်ပၞာန် မျိုဝ်မေန်ဥူ၊ နူတမ်ဒပ် ခမရ ၅၉၆ ဂှ် ကောန်ပၞာန် မိုဝ်ဧ၊ ကောန်ပၞာန် မေန်ခ ကေုာံ ကောန်ပၞာန်ယေဝ်မေန်အံၚ်တံ မဒှ်ရ။

ညးတံ ၄ တၠဂှ်တှ်ေ ပ္ဍဲဂိတုအဝ်ဂတ် ၆ ကဵု ၉ တေံ ဒုၚ်ပယျလုပ် ထံက်ၜံၚ်ကၠုၚ်ဖျေံလွဟ် ပ္ဍဲတမ်ဒပ် ဒပ်ပၞာန်ဗၠးၜးကောန်ဂကူ ကရေၚ် KNLA သၟဝ်တဲ KNU ရောၚ်။

အပ္ဍဲညးလုပ်ကၠုၚ်ဖျေံလွဟ်တံဂှ် ကောန်ပၞာန် မျိုဝ်မေန်ဥူဂှ် သေနာတ် M4 ၁ ဇကိုအ်၊ မကမ် ၄၀ မမ ၁၁ မ၊ ဖျေဲစုတ်မကမ် ၃ ဖျေဲ၊ မကမ် ၅ ဒသမ ၅၆ ဂှ် ၃၀၃ မ ကေတ်နၚ်လဝ်ကီုရောၚ် ဂွံတီကေတ်ရ။

တမ်ဒပ် ခလရ ၆၀ ဂှ် ဖျေံလဝ်သ္ဇိုၚ် ပ္ဍဲပွိုၚ်ဍုၚ်ကျံက်ကျဳ ရးဗဂေါတုဲ၊ တမ်ဒပ်ခမရ ၅၉၆ ဂှ်တှ်ေ ဖျေံလဝ်သ္ဇိုၚ် နူပွိုၚ်ဍုၚ်ခမံက်ကျဳ ရးတၞၚ်သဳ မဒှ်ရ။

အပ္ဍဲပွိုၚ်ဍုၚ်ကျံက်ကျဳ KNU ဂှ် အပ္ဍဲသၞာံဏံ ကောန်ပၞာန် နူကဵုဒပ်ပၞာန်ဗမာတံ စိုပ်မံၚ်မုက်ပၞာန် ဟွံအောန်နူ ၄၀ တၠ ကၠုၚ်လုပ်ဖျေံလဝ်လွဟ်ရဂှ် အတိုၚ်လိက်လလောၚ်တြး ဗဟဵု KNU ပတိတ်လဝ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

Photo – KNU