ကွာလာလမ်ပူ၊ အဝ်ဂတ် ၁၃
ဟိုတ်နူပရေၚ်အကံက်အခေါန် သမ္မတ ဒဝ်နယ် ထရ တုဲ အပ္ဍဲကဵုဒေသ ၜိုန်ရဒှ်မံၚ်ဒဝိၚ်ကီုလေဝ် အာယှအဂၞဲဏံဂှ် သွက်အမေရိကာန်မ္ဂး ဆက်ဒှ်မံၚ် ဒေသကဵုလဝ်ဖျုန် သောၚ်ကၠးမံၚ်ရောၚ် ညးစၞးအမေရိကာန် ဆေၚ်စပ်ကဵုအာသဳယာန် ဟီုလဝ်ရ။
အလဵုအသဳ ထရ ရန်တၟအ်လဝ် သွက်ဂွံသၠုၚ်ပတိုန် ပရေၚ်ဆက်ဆောံကဵု အာယှအဂၞဲတုဲ ကဵုလဝ်တၚ်စၞောန်ပ္ညုၚ် ခိုၚ်ကၠိုက်မံၚ်ရောၚ် ညးစၞးဝါယှေန်တာန် ဆေၚ်စပ်ကဵုအာသဳယာန် ကေလ်ဗေန် ကေန်မ် (Kevin Kim) ဟီုလဴကဵု ဌာန်ပရိုၚ် CNA ရ။
သွက်ဂွံတိုန်စိုပ် ကောံဓရီုဇၞော်ဆေၚ်စပ်ကဵု ဥပဒေသွာၚ်ပၞာန်ဂၠးကဝ် ကေုာံ လၟေၚ်ကမၠောန်ပရေၚ်ဝေၚ်ပၞာန်နာနာတုဲ ညးစၞး ကေန်မ် အာစိုပ်လဝ် ဍုၚ်ကွာလာလမ်ပူ ကၠောန်လဝ် ပေါဲဆဵုဂဗသၟာန်သှ် ပ္ဍဲသတ္တဟလောန်ကၠုၚ်တေံဂှ် ဟီုဂးဏာလဝ် အတိုၚ်ဏံရ။
သွက်ပရေၚ် တၚ်ကော်ဆော ပြသၞာဒေသတံဂှ် ရန်တၟအ် နူအမေရိကာန် သွက်ဂွံပအပ်ကဵု တၚ်သောင်ကလးတုဲ ညးတံကၠောန်မံၚ်အဓိကရောၚ် ညးဆက်ဟီုရ။
စပ်ကဵုမူဝါဒ ပရေၚ်ကူသာန်ဗၞိက်အမေရိကာန်တံ ပ္ဍဲအကာဲအရာဟွံကၠးမးမံၚ်ဏံဂှ် ဍုၚ်ပရေၚ်ပိုန်ဒြပ်အာယှအဂၞဲတံ အခိၚ် စွံသတိတုဲ ဒးအာမံၚ်တရဴဂှ် တၚ်စၟတ်ညး မံက်ဂတဝ်ကၠုၚ် မဒှ်ရ။
ဟိုတ်နူပရေၚ်ပ္ညဳပ္ညပ် ဆေၚ်စပ်ကဵုအခေါန်တံတုဲ ပရေၚ်ဆက်ဆောံအမေရိကာန်ကဵု အာသဳယာန် ဇြဟတ်ဍိုန်လျစှ်ေအာမာန်ဟာ အခိၚ်ဒးဒုၚ်သၟာန်လဝ်ဂှ် ကေန်မ် ကလေၚ်ဟီုဂှ်တှ်ေ နကဵုသမ္မတ မိက်ဂွံဂွံ တၚ်စၟတ်ဂတးဂတန် နွံကဵုပရေၚ်တုပ်သၟဟ်ရောၚ် သ္ဂးရ။
အပ္ဍဲအာယှအဂၞဲမ္ဂး နူကဵုအမေရိကာန် ဓလိုက်လဝ်တမ်ရိုဟ် သြန်ဒဝ်လာ ၅၀၀ ဗဳလဳယာန်ပြၚ်နွံတုဲ ပဵုဂၠိုၚ်နူကဵု ပမာဏဓလိုက်လဝ်တမ်ရိုဟ် ပ္ဍဲဍုၚ်ကြုက်၊ ဟံၚ်ကံၚ်၊ အိန္ဒိယ၊ ကိုဝ်ရဳယာသၠုၚ်ကျာ ကေုာံ ဂျပါန်တံ သီုဖအိုတ်ဏီရောၚ် ကေန်မ် သ္ဂးရ။
အပ္ဍဲအလုံဒေသမွဲဂှ် ကာန်ပဏဳအမေရိကာန် ပံက်လဝ် သီုဖအိုတ် နွံမံၚ် ၆၀၀၀ ပြၚ်ရောၚ် ဂွံတီရ။
ဟိုတ်နူ ပရေၚ်ဓလိုက်တမ်ရိုဟ်အမေရိကာန်တံတုဲ ပ္ဍဲအာယှအဂၞဲ ကလိဂွံပရဲပရၚ် ဖဵုဂုဏ်ဖန်ဗဒှ်ကဵုကမၠောန်တံတုဲ ဗီုပြၚ်ဂွေၚ်ဇုက်အဆက်ထံက်ပၚ် ညးတံလေဝ် ဂၠိုၚ်ကဵုသာ်ဒှ်ကၠုၚ်လဝ်ရောၚ် ကေန်မ် ဟီုရ။
အပ္ဍဲဂိတုလောန်ကၠုၚ်တေံ သွက်ဂွံတိုန်စိုပ်ကောံဓရီု ဝန်ဇၞော်ပရေၚ်ဍုၚ်သအာၚ် အာသဳယာန်တံတုဲ အခိၚ်အာစိုပ်လဝ် ဍုၚ်မနဳလာ (Manila) ဂှ် ပ္ဍဲအာယှအဂၞဲမ္ဂး အစဳဇန်သွက်ဂွံဓလိုက်အာ တမ်ရိုဟ် သြန်ဒဝ်လာ ၂ ဒသမ ၅ ဗဳလဳယာန်နွံမွဲဂှ် ဝန်ဇၞော်ပရေၚ်ဍုၚ်သအာၚ်အမေရိကာန် လလောၚ်တြးလဝ်ကီုရောၚ်။
Ref:CNA