တိုကျို၊ အဝ်ဂတ် ၁၄
ဂိတုအဝ်ဂတ် ၁၂ တေံ အကြာပရေၚ်ဆက်ဖုၚ်ကု သမ္မတအဳရာန် မာသံက် ပဳဇက်ဖဳယန်ဂှ် သ္ကိုပ်ဝန်ဇၞော်ဂျပါန် သာနေ တာကာအိချဳ ဟီုလဴကၠုၚ်ဂှ်တှ်ေ ပ္ဍဲပ္ၚံက်ၜဳဟဝ်မုဇ် ညံၚ်သ္ဂောံအာကၠုၚ်မာန် ဗွဲမဗၠးၜးဘဲအန္တရာဲဟၟဲ စရိတ်အပဵုဟွံဂွံဒးအိုတ်ဂှ် ဒှ်အရာကိစ္စဇၞော်မွဲရ။
လတူၜၚ်ဖ္ဍိုက်တတ်ကၠောံအာ ပ္ၚံက်ၜဳဟဝ်မုဇ် ညးတံကၟာတ်လဝ်လၟုဟ်ဏံဂှ် အဳရာန် သွက်သ္ဂောံကံက်အာ စရိတ်တတ်ကၠောံဂှ် သဳကၠဳမံၚ်ကဵု ရးနိဂီုဍုၚ်အဝ်မန်ရ။
ဂၠံၚ်ဍာန်တရဴဍာ်ဂၠးကဝ်မွဲမွဲဂှ် ဒးနွံအခေါၚ်တတ်ကၠောံ ဗၠးၜးဘဲအန္တရာဲရောၚ် ဍုၚ်ဗွဲမဂၠိုၚ်တံ ဟီုလဝ်ကီုလေဝ် အဳရာန်ဂှ်တှ်ေ ဆက်တုဲကၟာတ်ဒၞာလဝ်ဖိုဟ်ရ။
ဟိုတ်နူကၟာတ်လဝ်ဂၠံၚ်ဍာန်တရဴဍာ်ဂှ်ရ အလုံဂၠးကဝ် ဒးဆဵုဂဗမံၚ်ဘဲကၠေၚ်ဍေၚ်ပိုတ်အာတုဲ ၚုဟ်ကၠေၚ်ဍေၚ်ဂၠးကဝ်လေဝ် သၠုၚ်တိုန်မံၚ်ရ။
အပ္ဍဲပရေၚ်ဆက်စၠောံဖုၚ် အကြာက္ဍိုပ်သ္ကိုပ်ဂျပါန် ကဵု အဳရာန် ပွိုၚ် ၂၀ မိနေတ်ဂှ်မ္ဂး လတူပ္ၚံက်ၜဳ သုၚ်စောဲမံၚ် နဒဒှ်ဂၠံၚ်ဍာန်တရဴ ပလံၚ်ဗ္စိုပ်ကၠေၚ်အရိုၚ်အဓိက ဍုၚ်ပါလုပ်သုၚ်စောဲမံၚ် ပွဳဗွိုၚ်ဂၠးကဝ်တံဂှ် ညံၚ်သ္ဂောံစွံဂရုသဳကၠဳအာညိ သ္ကိုပ်ဝန်ဇၞော် တာကာအိချဳ ဗ္တိုက်ဖ္အောဝ်ဏာ က္ဍိုပ်သ္ကိုပ်အဳရာန်ရ။
စနူကၞောတ်ဂိတုဖေဖဝ်ဝါရဳတေံတုဲ အမေရိကာန် ကဵု အေတ်သရေဝ်တံ စဗတိုက်လဝ်အဳရာန်ဂှ်တှ်ေ၊ဣဏံဂှ် ဒှ်ပရေၚ်ဆက်စၠောံဖုၚ် အလန်စၟတ် ၄ ဝါ အကြာက္ဍိုပ်သ္ကိုပ်ၜါတၠဏံရ။
ပ္ဍဲကရပ်ၜဳဗကေတ် ဒှ်ဒၞာဲထိၚ်ချုက်ကိစ္စဇၞော်မွဲပၠန် ၜၚ်ဖ္ဍိုက်ကပေါတ်ဗၞိက်နွံမံၚ် ပ္ၚံက်ၜဳ ဗာတ်အေလ် မာန်ဒက် (Bab al-Mandeb Strait) တံဂှ် ဂကောံဟူတဳ (Houthis) နွံဍုၚ်ယဳမေန် ရဲလပါ်အဳရာန်တံ ဗက်ဗတိုက်မံၚ်ရောၚ် ဂွံတီရ။
ညံၚ်ဂွံထိၚ်အာကဵု ဂကောံဟူတဳတံဂှ် သွက်ဂွံဗ္တိုက်ဖ္အောဝ်ကဵု က္ဍိုပ်သ္ကိုပ်ဂျပါန် အာတ်မိက်လဝ်အဳရာန်တုဲ သွက်ပရေၚ်ဓါတ်အစောံဂွံရုံဂပ်အာတုဲ လတူအကာဲအရာ ပရေၚ်က္တဵုဒှ်မံၚ် ပ္ဍဲပ္ၚံက်ၜဳ ဗာတ်အေလ် မာန်ဒက် လၟုဟ်ဏံဂှ် ညးတံ ဒှ်မံၚ်ဒဝိၚ်ဗွဲမလောန်ရောၚ် ညးဟီုရ။
သမ္မတ ပဳဇက်ခဳယာန် ကလေၚ်သောင်ကလးကဵုဂှ်တှ်ေ အပ္ဍဲအခိၚ်အဳရာန် သဳကၠဳမံၚ်ကဵု သဝ်ဒဳအာရေဗဳယျာဂှ် သွက်သ္ဂောံသောင်ကလးအာ ကိစ္စတံဏံဂှ် ကၠောန်မံၚ်ရောၚ် တာကာအိချဳ သ္ဂးရ။
စပ်ကဵုအဳရာန်တုဲ အကာဲအရာပၞာန် တေၚ်မ္ၚိုဟ်ကြံၚ်မံၚ်တံဏံ ညံၚ်သ္ဂောံယှအ်ဖျေံဂှ် ဒှ်အရာကိစ္စဇၞော်တုဲ ညံၚ်အကာဲအရာတံ ဂွံညိၚ်ဝပ်အာ ၜိုတ်သ္ပမာန်ဂှ် ဒးကၠောန်အာထေက်ရောၚ် တာကာအိချဳ ဟီုရ။
ကိုန်အစဳဇန်နျူကလဳယျာအဳရာန်ကီု အကြာအမေရိကာန် ကဵု အဳရာန်တံ ညံၚ်သ္ဂောံကလိဂွံ တၚ်တုပ်စိုတ်အိုတ်ကၞောတ် ဗွဲမပြဟ်မာန်ဂှ် ညးတံစၟဳစမံၚ် ခိုၚ်ၚ်ဗိုန်န်ရောၚ် သ္ကိုပ်ဝန်ဇၞော်ဂျပါန် သ္ဂးရ။
ညးတာလျိုၚ်အဳရာန်တံ ရပ်ထိၚ်လဝ် သ္ကိုပ်ဌာန်ပရိုၚ် NHK ညးစၞးဂျပါန် ပ္ဍဲအဳရာန်ဂှ် ပ္ဍဲဂိတုအေဗရာလောန်ကၠုၚ်တေံ ဒုၚ်လျိုၚ်ဗလးကဵုလဝ်တုဲ လတူပရေၚ်ဆက်ဆောံလဝ်ညးဂှ် ညံၚ်သ္ဂောံသောင်ကလးကဵု ဗွဲမပြဟ်ဂှ်လေဝ် တာကာအိချဳ အာတ်မိက်လဝ် သမ္မတ ပဳဇက်ခံယာန်ရောၚ် ဂွံတီရ။
Ref:JapanTimes