မနဳလာ၊ အဝ်ဂတ် ၁၅
အပ္ဍဲအခိၚ် ၚုဟ်ကၠေၚ်ဂၠးကဝ်တံ သၠုၚ်တိုန်မံၚ်ဏံဂှ် စနူသတ္တဟဂတတေံမ္ဂး ညးဒဳကွဳစက်ဖိလေတ်ပိုၚ်တံ ဒးဆဵုဂဗကဵု ပရေၚ်ၚုဟ်ကၠေၚ်စက် ထပ်သၠုၚ်တိုန်မွဲဝါပၠန်ရောၚ်။
တၠုၚ်လအာ ပရေၚ်တုပ်စိုတ်ၜိုဟ်လလမ် အမေရိကာန်-အဳရာန် ကေုာံ သွက်ဂွံကလေၚ်ပံက် ပ္ၚံက်ၜဳဟဝ်မုဇ်တံဂှ် ကလေၚ်ဒှ်မံၚ် ပရေၚ်ဟွံကၠးမးအခိၚ်ဏံဂှ်တှ်ေ ညးတာလျိုၚ် ဖိလေတ်ပိုၚ်တံ သွက်ဂွံထပ်သၠုၚ်ပတိုန် ၚုဟ်ကၠေၚ်စက်ဂှ် စချပ်မံၚ်ယျ။
ဒုၚ်သ္ဇိုၚ်ကဵု ပရေၚ်ကူသာန်ဗၞိက် ၂ တ္ၚဲ ကိုပ်ကၠာအိုတ် ပ္ဍဲသတ္တဟဏံတုဲ ၚုဟ်ကပေါတ်ပတိတ်ကၠေၚ်ဓါတ်တံ သၠုၚ်တိုန်အာ ဗွဲမဂၠိုၚ် ဒှ်မံၚ်ရ။
တၚ်တော်ခယျတံဂှ်တှ်ေ စဵုကဵုအိုတ်သတ္တဟဏံမ္ဂး ဆက်တန်တဴအာမံၚ် လတူၚုဟ်ကၠေၚ်ဂၠးကဝ် ကေုာံ အပြံၚ်အလှာဲ ၚုဟ်လှာဲသြန် ပဳသဝ်-ဒဝ်လာ တံရောၚ်။
ကိုပ်ကၠာဟွံစိုပ်တ္ၚဲအိုတ်သတ္တဟဏံမ္ဂး ၚုဟ်ကၠေၚ်ၚ်ဂှ် ဆက်နွံအာမံၚ်အတိုၚ်ဗီုဏံမာန်တုဲ ပ္ဍဲအဝ်ဂတ် ၁၈ ဂှ်မ္ဂး သၠုၚ်တိုန်အာထေၚ်ၚ်လဵုလဵုမာန်ရောၚ် ညးစၟဳညာတ်အာလဝ်ဂှ် ဥက္ကဌ ကာန်ပဏဳ Jetti Petroleum လီယို ဗေလ်လက်သ် ဟီုရ။
ပ္ဍဲဒေသလဒေါဝ်ဗၟံက် တၠုၚ်လအာ တၚ်တုပ်စိုတ်ပရေၚ်ၜိုဟ်လလမ်ဗွဲမသၠဲလး ကေုာံ အခေါၚ်ကလေၚ်ပံက် ပ္ၚံက်ၜဳဟဝ်မုဇ်တံဂှ် အကာဲအရာဒှ်မာန် ယအ်စှ်ေအာတုဲ ၚုဟ်ကၠေၚ်ဆက်သၠုၚ်တိုန်အာရောၚ်ဂှ် ဗေလ်လက်သ် ဟီုရ။
သွက်ပေါဲပၞာန် ဂွံအိုတ်ကၠေံအာဂှ် အတိုၚ်တီဟဳရာန်ဖျေံလဝ်တံဂှ် ဟွံဒုၚ်တဲတုဲ ယဝ်ရလစွံစိုတ်အမေရိကာန် ဟွံပြံၚ်လှာဲမ္ဂး ပ္ၚံက်ၜဳဟဝ်မုဇ်ဂှ် ဆက်ကၟာတ်စွံလဝ်ရောၚ် အဳရာန်ဟီုကၠုၚ်တုဲ၊ ပ္ဍဲအဝ်ဂတ် ၁၁ တေံ ၚုဟ်ကၠေၚ်အရိုၚ်တံ ၜါအလန်ဆက်က် သၠုၚ်တိုန်အာလဝ်ရ။
ယဝ်ရကလေၚ်ပံက်ကဵု ပ္ၚံက်ၜဳပၠန်၊ အကြာအဳရာန်ကဵုအမေရိကာန် တၠုၚ်လအာတၚ်တုပ်စိုတ်နွံကၠုၚ်မ္ဂး ၚုဟ်ကၠေၚ်အရိုၚ်ဂၠးကဝ် ယအ်စှ်ေကီုရ။
ကိုပ်ကၠာဟွံဒှ်ပေါဲပၞာန်ဏီဂှ် သွက်ဂၠးကဝ် ကၠေၚ်ဍေၚ် ၂၀ က္ဍိုပ်ကၠံ တတ်ကၠောံအာကၠုၚ်မံၚ် ပ္ဍဲပ္ၚံက်ၜဳဂှ်တှ်ေ ဟိုတ်နူပေါဲပၞာန်အဳရာန်တုဲ ပရေၚ်တတ်ကၠောံကၠေၚ်ဍေၚ်တံ ယအ်စှ်ေအာ သောၚ်ၚ်ရ။
ဟိုတ်နူအကာဲအရာလပါ်ဗမံက်တုဲ ၚုဟ်ကၠေၚ်ဓါတ် သွံမံၚ်ပ္ဍဲဖိလေတ်ပိုၚ်တံဂှ် ပ္ဍဲသတ္တဟဂတဏံ သၠုၚ်တိုန်အာရောၚ်ဂှ် ရိုဟ်ကၞက်ပရိုၚ် ပရေၚ်ကမၠောန်ဗွိုၚ်အပ္ဍဲဍုၚ်မွဲဒၞာဲ ဟီုရ။
ၚုဟ်ကၠေၚ်ဒဳဇေလ် မွဲလေတ်မ္ဂး နူ ၃ ဒသမ ၅၇ ပဳသဝ် စဵုကဵု ၄ ဒသမ ၂၅ ပဳသဝ် သၠုၚ်တိုန်အာမာန်တုဲ၊ ၚုဟ်ကၠေၚ်ဓါတ် မွဲလေတ်မ္ဂး နူ ၂ ဒသမ ၂၀ ပဳသဝ် စဵုကဵု ၃ ပဳသဝ် သၠုၚ်တိုန်အာရောၚ် ဂွံတီရ။
ကြဴနူအိုတ်သတ္တဟ ပရေၚ်ကူသာန်ဗၞိက်တုဲမ္ဂး ဌာနဝန်ဇၞော်ဓါတ်အစောံ ဖိလေတ်ပိုၚ် သွက်ဂွံလလောၚ်တြး စၟတ်ၚုဟ်မးလက်ကရဴအိုတ်ဂှ် နွံမံၚ်ရ။
ပရေၚ်သၠုၚ်ပတိုန်ၚုဟ်ကၠေၚ်ဍေၚ်တံဂှ်တှ်ေ စနူဂိတုအဝ်ဂတ် ၁၈ မ္ဂး လမျီုစလုပ်အာရောၚ် ညးတာလျိုၚ် ဖိလေတ်ပိုၚ်တံ ဟီုလဴလဝ်ရ။
Ref:The Manila times