ကျာ်ခမဳ၊ အဝ်ဂတ် ၁၅
အပ္ဍဲတွဵုရးမန် ပွိုၚ်ဍုၚ်ဇြပ်ဗု ဍုၚ်ကျာ်ခမဳ နူညးဗြဴမွဲတၠ စဴကၠုၚ် နူဍုၚ်လ္ဂုၚ်တေံဂှ် ဆဵုအာလဝ်စၟယဲဂၞဴကာတ်မြဟ်တုဲ၊ သီုကဵုကောန်ဇာတ်သ္ၚိဌာန် ကၟိန်အိန်ထံၚ်ညးတံဂှ်လေဝ် စွံလဝ်ပ္ဍဲ ဒၞာဲမၚ်ရံၚ်ယဲ (Quarantine) ရောၚ်ဂှ် ဂွံတီကေတ် နူကဵုဌာန ပရေၚ်ထတ်ယုက် ပွိုၚ်ဍုၚ်ရ။
မဒှ်ဌာန်ဒၟံၚ် ဍုၚ်ကျာ်ခမဳ ညးဗြဴ အာယုက် ၅၉ သၞာံမွဲတၠ ပ္ဍဲဂိတုအဝ်ဂတ် ၁၃ ၜိုတ်အခိၚ်ဗ္တံ ၇ နာဍဳဂှ် ဟိုတ်နူဂၞဴအာမံၚ် မွဲဏှမွဲဏှတုဲ အာတိုန်လွဳယဲ ပ္ဍဲကဵုရုၚ်ဂဥုဲပွိုၚ်တိုက် ကျာ်ခမဳ မဒှ်ရ။
တုဲပၠန် စမ်ၜတ်စၟဳစၟတ် အပ္ဍဲညးဗြဴအာယုက် ၅၉ သၞာံဂှ်တုဲ ဆဵုညာတ်စုတ် စၟယဲဂၞဴကာတ်တ် Cholera Test Kit Positive က္တဵုဒှ်မံၚ်ရောၚ်ဂှ် ညးတာလျိုၚ် နူဌာနပရေၚ်ထတ်ယုက်ပွိုၚ်ဍုၚ်ဇြပ်ဗု မွဲတၠ ဟီုရ။
ကြဴနူကဵု ဆဵုဒးအာစၟယဲဂၞဴဇၞော်ဇၞော်တုဲ ကောန်ဇာတ်သ္ၚိဌာန် ကၟိန်အိန်ထံၚ်ညးတံ မၞိဟ်တြုံ ၂ တၠ ကဵု မၞိဟ်ဗြဴ ၇ တၠ လုက်စုက်ဒးလဝ်ကဵု ညးယဲဂှ်လေဝ် စွံလဝ်ဒၞာဲမၚ်ရံၚ်ယဲ (Quarantine) ပ္ဍဲရုၚ်ဂဥုဲပွိုၚ်တိုက်ကျာ်ခမဳတုဲ မၚ်ဗက်ရံၚ်မံၚ် အကာဲအရာရောၚ်။
နွံဌာန်ဒၟံၚ်ဍုၚ်ကျာ်ခမဳ ညးဗြဴ အာယုက် ၅၉ သၞာံဝွံ ပ္ဍဲဂိတုအဝ်ဂတ် ၉ လောန်ကၠုၚ်တေံဂှ် နူကဵုရးလ္ဂုၚ် ပွိုၚ်ဍုၚ်လာန်မဒဝ် ကလေၚ်စိုပ် ကၠုၚ်လဝ် ဍုၚ်ကျာ်ခမဳ မွဲစွံကဵုကောန်ကၟိန်ညးဗြဴ မွဲတၠကီုရောၚ် ဂွံတီကေတ်ရ။
ပ္ဍဲကဵုရးလ္ဂုၚ် ပွိုၚ်ဍုၚ်လ္ၚဵုတံမ္ဂး စနူဂိတုအဝ်ဂတ် ၉ တေံတုဲ ယဲဂၞဴကာတ်ဏံ စက္တဵုဒှ်ကၠုၚ်တုဲ၊ အတိုၚ်စရၚ်စဵုကဵုအဝ်ဂတ် ၁၃ မ္ဂး ညးဒးတိုန်မံၚ်ရုၚ်ဂဥုဲ ၁၈၀ တၠနွံကၠုၚ်တုဲ အပ္ဍဲဏံ ညးဗျုဗျုအာယုက် ၉၂ သၞာံမွဲတၠဂှ် ချိုတ်အာလဝ်ရောၚ်။
ဟိုတ်နူယဲဂၞဴကာတ်တုဲ ပ္ဍဲပွိုၚ်ဍုၚ်လ္ၚဵု ရးလ္ဂုၚ်တံမ္ဂး စနူဂိတုအဝ်ဂတ် ၁၃ တုဲ ကၟာတ်ဒၞာပဒေါအ်ထောံ ဆေၚ်သွံဖျာဇိုၚ်ဂၠံၚ်တံဂှ်တုဲ၊ စၞစသုၚ် ကဵု ဍာ်သုၚ်တံဂှ်လေဝ် ဗက်စၟဳစၟတ် ပါ်မံၚ်ဓါတ်ရောၚ်။
စၟယဲဂၞဴလီုကာတ်ဏံဝွံ ကၠောအ်ကၞာန်လောဲသွာကွေံကွေံတုဲ အပ္ဍဲအခိၚ်ဂၠေံဂၠေံမ္ဂး ကၠောအ်ကၞာန်ပြးဇးအာ မၞိဟ်ဗွဲမဂၠိုၚ်တံမာန်တုဲ ယဝ်ရလွဳလွတ် ဟွံဂတာပ်အခိၚ်မ္ဂး စဵုကဵုလမျီုချိုတ်လေဝ် ဒှ်အာမာန်ရောၚ် အစာဂဥုဲတံ ကဵုလဝ်သတိရ။
ပရိုၚ် – သြၚ်လောန်တိုၚ်မ်
Photo – CJ