မတ်မလီု၊ အဝ်ဂတ် ၁၅
အပ္ဍဲစၠတ်ထဝ်တွဵုရးမန် ဟိုတ်နူခါန်ကၞက်စုတ်လဝ် ညးပါလုပ် ဂကောံကဵုကသပ် အထံက်အပၚ်ကမ္မတဳပရေၚ်ကေၚ်ကာ စၠတ်ထဝ်နာနာ ကုခရိုနဳ ဥူမဵုကျဝ် တၠပိုန်ဒြပ်ကမၠောန်ၚိုဲမိုဝ် ဍုၚ်မတ်မလီုဂှ်တုဲ လတူစၠတ်ထဝ်မန်ဂှ် ဂလာန်ပတေဟ် အောန်စှ်ေကၠုၚ်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သွက်ခရိုနဳ ဥူမဵုကျဝ် ဂွံဒှ်ပါလုပ်ဂကောံညးကဵုကသပ် အထံက်အပၚ် ကမ္မတဳပရေၚ်ကေၚ်ကာ စၠတ်ထဝ်နာနာတံဂှ် ပ္ဍဲကောံဓရီုလၟေၚ်ဍာံ တတိယဝါ စၠတ်ထဝ်တွဵုရးမန် ကၠောန်ဗဒှ်လဝ် ပ္ဍဲအဝ်ဂတ် ၁၂ တေံ ဥက္ကဌစၠတ်ထဝ် ဥူတိတ်ထိုဲ ခၞံဗ္ဒျ်ဂကောံဏံတုဲ ပအပ်ကဵုလဝ် တာလျိုၚ် မဒှ်ရ။
ခရိုနဳ ဥူမဵုကျဝ် ပံၚ်တောဲလဝ်ကဵု အလဵုအသဳသီအဝဵုလၟုဟ်ကဵု ဌာနနာနာတံတုဲ ကမၠောန်တေန်ဒါအလဵုအသဳ အပ္ဍဲဒေသဗွဲမဂၠိုၚ်တံဂှ် ညးကလိဂွံလဝ်အခေါၚ်ကၠောန်ကီု၊ သီုကဵုကိုန်အစဳဇန် အလဵုအသဳ ဗွဲမဂၠိုၚ်တံဂှ်လေဝ် ညးမွဲတၠဓဝ် အုပ်လဝ်ဂတာတဲတုဲ ထိၚ်ချုက် ဂွံလဝ်ရောၚ် ဂွံတီရ။
တိၜိုတ်နွံမံၚ် ပ္ဍဲဍုၚ်မတ်မလီုဂှ်တှ်ေ ခရိုနဳ ဥူမဵုကျဝ် မွဲတၠဓဝ် သီထိၚ်ဂွံလဝ်တုဲတုဲဒှ်မံၚ်တုဲ အခိၚ်ခါန်ကၞက်စုတ် ညးကဵုကသပ်ဏံမ္ဂး ညးဍုၚ်ကွာန်တံ ဒှ်တိုန်ဒဝိၚ် ပဵုဂၠိုၚ်တိုန်ဂှ်ကီု လတူစၠတ်ထဝ်လေဝ် ဂလာန်ပတေဟ် ညးဍုၚ်ကွာန်တံ အောန်စှ်ေကၠုၚ်မံၚ်ရောၚ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပ္ဍဲမတ်မလီု တိၜိုတ်နွံမံၚ်ဂှ် ညးတေံသီကေတ်လဝ်အိုတ်ယျ၊ တုဲတှ်ေ အခေါၚ်အရာ ၜိုတ်ကၠောန်စဂွံလေဝ် ညးတေံရ ဒးကဵုကသပ်တုဲ ကေတ်ထောံဖအိုတ်ယျ၊ လၟုဟ်ဏံလေဝ် ခါန်ကၞက်ညးတေံ ညးကဵုကသပ်စၠတ်ထဝ်ပၠန်မ္ဂး ဒၞာဲညးဍုၚ်ကွာန်တံ ဒၞာဲလဵု ဒးဒုၚ်စိုပ်ဒဒိုက်မွဲဝါပၠန်ရောဂှ် ဒဝိၚ်ပဵုတိုန်မံၚ်ရ၊ နူစတမ်တေံလေဝ် ကမၠောန်ညးမိက်ဂွံကၠောန်ဂှ် ကလိဂွံလဝ်အခေါၚ်တုဲတုဲရ၊ အခိၚ်ခါန်ကၞက်ညးတေံ ညးကဵုကသပ် ပ္ဍဲစၠတ်ထဝ်ဏံမ္ဂး စၠတ်ထဝ်လၟုဟ်ဂှ် ညးလဵုမွဲဂွံပတေဟ်စရော၊ စၠတ်ထဝ်ဂှ် သွက်ညးဍုၚ်ကွာန်တံ ဗီုလဵု ဂွံကလိဂွံဖဵုဂုဏ်မာန်ရော” သာ်ဝွံ သ္ဂးရ။
တုဲပၠန် တၠအဝဵုခေတ်အဆက်ဆက်တံဂှ် ခရိုနဳ ဥူမဵုကျဝ် ပံၚ်ကၠောန်လဝ်တုဲ ဂၠာဲစလဝ်ဂုဏ်ဖဵု ပရေၚ်ပိုန်ဒြပ်ကီုလေဝ်၊ ပ္ဍဲကဵုလက်ထက်အလဵုအသဳ ဒဳမဝ်ကရေဇြဳတေံဂှ်တှ်ေ ညးဍုၚ်ကွာန်တံ ဒစဵုဒစးလဝ်ညးတံနွံတုဲ လၟုဟ်လက်ထက်အလဵုအသဳပၞာန်ဏံပၠန် ညးဍုၚ်ကွာန်တံ အခေါၚ်ဒစဵုဒစးဟွံဂွံတုဲ ဒးအေၚ်ဒုၚ်မံၚ်ဏီရောၚ် ညးဆက်ဟီုရ။
ပ္ဍဲအရာရုဲစှ်ညးကဵုကသပ် ကမ္မတဳစၠတ်ထဝ်တံဂှ်တှ်ေ ထေက်ကဵုဒးရုဲစှ်အာ အတိုၚ်ပၟိက်ဆန္ဒညးဍုၚ်ကွာန်တံရောၚ်၊ အခိၚ်တံၚ်ပၠုပ်နၚ် ရဲကြပ်ကဵုဇကုတံဗီုဏံဂှ်တှ်ေ ကြက်ရှ်သာစၠတ်ထဝ် ကၠေအ်အာမာန်ရောၚ် ညးဒေသမွဲတၠပၠန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အဓိကတှ်ေ ဒှ်မံၚ်အတိုၚ်ပၟိက်ဆန္ဒ ညးဍုၚ်ကွာန်တံဟာ ဟွံသေၚ်မ္ဂး မၞိဟ်ဒးဒုၚ်ရုဲစှ်လဝ် နကဵုမာဲတံ ယဝ်ရစုတ်တှ်ေ ခိုဟ်ဂၠိုၚ်ရ၊ ဗီုလဵုဟီုဟီု ပ္ဍဲလက္ကရဴညးတံဂှ် မၞိဟ်ကဵုမာဲနွံမာန်ရောၚ်၊ ဗီုဂှ်ဟွံသေၚ် မာဲလေဝ်ဟွံဒးကဵုတုဲ တံၚ်စုတ်ပၠုပ်နၚ် ရဲကြပ်ကဵုဇကုတှ်ေ မၞိဟ်တံဏံ အုပ်ဓလီုထောံစၠတ်ထဝ်မ္ဂး ကြက်ရှ်သာစၠတ်ထဝ် ကၠေအ်အာမာန်ရောၚ် ထေၚ်ရ၊ ဗီုဏံရ ဍေံတံဂှ် ဆတ်စုတ်ပၠုပ်ရဲကြက်ကဵုညးတံတုဲ ကၠောန်ဏာဗီုပြၚ်ဂှ်ရောၚ် ထေၚ်ရ” သာ်ဝွံ သ္ဂးရ။
အခိၚ်ခါန်ကၞက် တၠကမၠောန်ခရိုနဳမွဲတၠ ပ္ဍဲစၠတ်ထဝ်ဗီုဏံဂှ်တှ်ေ ကမၠောန်အဇာဍောတ် အဇာလဒေါဝ် ပ္ဍဲဒေသတံဂှ်လေဝ် ဒှ်ကၠုၚ် ပရေၚ်အုပ်ဓလီုညးမာန်တုဲ သီုကဵုပရေၚ်ပိုန်ဒြပ် ညးဒေသတံဂှ်လေဝ် ညးရပ်ထိၚ်ချုက် အုပ်ဏာဂတာတဲမာန်ရောၚ် ညးဆက်ဟီုရ။
ပွမဒက်ပ္တန် ဂကောံကဵုကသပ် သွက်ကမ္မတဳစၠတ်ထဝ်နာနာတံဗီုဏံဂှ် ဒဒှ်ရ ညးစၞးစၠတ်ထဝ်လၟုဟ်တံဂှ် သုၚ်စောဲဟွံဂွံ အဓိပ္ပါဲမံက်ကၠုၚ်တုဲ သီုကဵုဒှ်ပရေၚ်သီအဝဵုစၠတ်ထဝ် နကဵုနဲကဲဍိုန်န်ဍောတ်တ်ရောၚ် ကမ္မတဳသ္ၚဳဂၠိပ်ပါ်ပါဲ ပရေၚ်ကိုန်အစဳဇန်၊ ပရေၚ်ဘဏ္ဍာ ကေုာံ ပရေၚ်ပိုန်ဒြပ် ဥက္ကဌတြေံ ဥူအံၚ်ကျဝ်တူ ပါ်ပါဲထံက်ထ္ၜးလဝ်ရ။
“ဣဏံဂှ် ပရေၚ်ကိစ္စဒှ်ဟွံထေက်လးလးရ၊ မုဟိုတ်ရောတှ်ေ ပွမဒက်ပ္တန်ကမ္မတဳကဵုကသပ် ကုညးစၞးစၠတ်ထဝ်တံဗီုဏံဂှ် တၚ်စၟတ်မွဲဂှ်တှ်ေ ညးစၞးစၠတ်ထဝ်တံ အစောန်စရာဲဟၟဲ သုၚ်စောဲဟွံဂွံ၊ ဟိုတ်နူအစောန်ဟၟဲတုဲ ဒးဒက်ပ္တန်အာ ကမ္မတဳကဵုကသပ်ဏံရောၚ် အဓိပ္ပါဲဍေံမံက်ကၠုၚ်ရ၊ ဗီုဗီုဏံဂှ်တှ်ေ လတူစၠတ်ထဝ်ဏံဂှ် ဒက်ပ္တန်ကမ္မတဳကဵုကသပ် လတူကမ္မတဳစၠတ်ထဝ်တံပၠန်ဂှ်တှ်ေ ဣဏံဂှ် ဒှ်ပရေၚ်သီအဝဵုစၠတ်ထဝ် နကဵုနဲကဲဍိုန်န်ဍောတ်တ်ရောၚ် အာဲညာတ်ရ” သာ်ဝွံ သ္ဂးရ။
မွဲလပါ်ပၠန် ဂကောံကဵုကသပ်အထံက်အပၚ် ကမ္မတဳပရေၚ် ကေၚ်ကာစၠတ်ထဝ်နာနာ စၠတ်ထဝ်တွဵုရးမန်ဂှ်တှ်ေ ဥက္ကဌဂှ် သ္ကိုပ်ဝန်ဇၞော်တြေံ ဥူအံၚ်ကျဳတိၚ် ပၠတရဴတုဲ၊ ညးအုပ်ကာဂှ်တှ်ေ ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် စၟတ် ၁ ဥူအံၚ်ထောတ် ကေတ်လဝ်တာလျိုၚ်ရောၚ်။
တုဲပၠန် ဂကောံကဵုကသပ်ဏံဂှ်တှ်ေ ဒက်ပ္တန်လဝ်နကဵုမၞိဟ် ၁၁ တၠတုဲ၊ အပ္ဍဲဂှ်မ္ဂး ခရိုနဳ ဥူမဵုကျဝ်ကဵု ရဲဂွံဇၞူကမၠောန်နူဌာန အလဵုအသဳနာနာ တံကီု၊ ရဲယိုက်ဝန်ပၞာန်တြေံ (ဒေါအ်ဇူ) တံ ကေုာံ သၟာဥပဒေရုၚ်သၞောဝ်ဓရ် အဆံၚ်သၠုၚ်တံလေဝ် ပါလုပ်မံၚ်ရောၚ် ဂွံတီရ။
အပ္ဍဲစၠတ်ထဝ်တွဵုရးမန်ဂှ် လတူဒက်ပ္တန်လဝ် ဂကောံကဵုကသပ် အထံက်အပၚ် ကမ္မတဳပရေၚ်ကေၚ်ကာစၠတ်ထဝ်နာနာ တၠကမၠောန်ပရေၚ်ပိုန်ဒြပ် ခရိုနဳတံဗီုဏံဂှ် အကြာညးစၞးတံ ပရေၚ်ပါ်ပါဲ နွံမံၚ်ကီုလေဝ်၊ ဥက္ကဌစၠတ်ထဝ်မွဲဂှ်တှ်ေ သ္ပလဝ်မတ်ဇျှဟ် တုဲ မံၚ်ဒၟံၚ်သ္ၚိတ်တ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media