နေပျဳဒဝ်၊ အဝ်ဂတ် ၁၆
ယဝ်ရအကာဲအရာ ပရေၚ်ဂီုကၠီု ပ္ဍဲတွဵုရးရခေၚ် တောတက်ခိုဟ်တိုန်ကၠုၚ်မ္ဂး ညးဒဒိုက်ရိုဟေၚ်ဂျာ ၃ ကိုတ်ပြၚ် မံၚ်စံၚ်တန်တဴမံၚ် ပ္ဍဲဗဒိုပ်ညးဒဒိုက် ဗင်္ဂလာဒေအ်တံဂှ် ကလေၚ်စဴကၠုၚ်မာန်ရောၚ် အလဵုအသဳဒပ်ပၞာန် ရးနိဂီုဍုၚ်ဗၟာ ပ္ဍဲဂိတုအဝ်ဂတ် ၁၅ ဂှ် လလောၚ်တြးလဝ်ရ။
ပ္ဍဲအခိၚ်ပြသၞာ ညးဒဒိုက်ရိုဟေၚ်ဂျာ လုပ်စိုပ်ကၠုၚ် ကာလ ၉ သၞာံဏံဂှ် တၚ်လလောၚ်တြးဗီုဏံ မံက်ဂတဝ်ကၠုၚ် တုဲ၊ ကြဴနူဂြိပ်ပါဲတိတ်အာနူဍုၚ်ဗၟာ ပ္ဍဲဂိတုအဝ်ဂတ် သၞာံ ၂၀၁၇ တေံတုဲ လၟိဟ်မၞိဟ်နကဵုလ္ၚီဗွဲမဂၠိုၚ်တံဂှ် ဆက်မံၚ်စံၚ်မံၚ် ပ္ဍဲဗဒိုပ်ညးဒဒိုက် အပ္ဍဲဗင်္ဂလာဒေအ်ဏီ မဒှ်ရ။
အတိုၚ်စရၚ် အလဵုအသဳဗင်္ဂလာဒေအ် ကဵုနၚ်လဝ်မ္ဂး အပ္ဍဲညးဒဒိုက် ၈၂၈၈၂၄ တၠတံဂှ် ညးတံ စၟဳစၟတ်သ္ပလဝ်ဒတန် ၄၂၆၅၄၅၄ တၠ တုဲဒှ်အာယျရောၚ် အလဵုအသဳနေပျဳဒဝ် ဟီုလဝ်ရ။
ပ္ဍဲအခိၚ်စၟဳစၟတ်လဝ်ဂှ်မ္ဂး မၞိဟ် ၃၀၈၇၉၇ တၠတံဂှ် ကၠာတေံ ဒှ်မၞိဟ်ကေၚ်မံၚ်စံၚ်လဝ် ပ္ဍဲတွဵုရးရခေၚ်ရောၚ်ဂှ် နူလပါ်ဗၟာ သ္ပကဵုလဝ်ဒတန် မဒှ်ရ။
ပ္ဍဲအခိၚ်အကာဲအရာ ပရေၚ်ဂီုကၠီုတွဵုရးရခေၚ် ပဵုတုဲညိၚ်ဝပ်ကၠုၚ်မ္ဂး သွက်ဂွံဒုၚ်တဲ ညးဒဒိုက်ရိုဟေၚ်ဂျာ သ္ပလဝ်ဒတန်တုဲတုဲတံဂှ် သွက်ဂွံဆက်ပံၚ်တောဲကၠောန်အာကဵု ဗင်္ဂလာဒေအ်ရောၚ်ဂှ် ပ္ဍဲလိက်လလောၚ်တြး နေပျဳဒဝ် ထမံက်ထ္ၜးလဝ်ရ။
ဗ္ဒိုပ်ဗၠာဲသၟိၚ် နွံပ္ဍဲတွဵုရးရခေၚ်တံဂှ် ကြဴနူဂကောံရပ်လွဟ်ရိုဟေၚ်ဂျာတံ ဗတိုက်လဝ်တုဲ နူကဵုဒပ်ပၞာန် ကၠောန်ဗဒှ် လဝေၚ်ပၞာန် အပ္ဍဲသၞာံ ၂၀၁၇ ဂှ်ရ ရိုဟေၚ်ဂျာ ၇ ကိုတ်ပြၚ် ဂြိပ်ပါဲလုပ်အာ အပ္ဍဲရးနိဂီုဍုၚ်ဗင်္ဂလာဒေအ်အိုတ်ရ။
ကၠာနူဂှ်လေဝ် ဟိုတ်နူပရေၚ်ပကီုပရာတ် ဒပ်ပၞာန်ဗမာတုဲ မၞိဟ်စိုပ်မံၚ်အပ္ဍဲဗင်္ဂလာဒေအ်တုဲတုဲတံဂှ် နွံမံၚ် နကဵုလၟိဟ်လ္ၚီ ဗွဲမဂၠိုၚ်ကီုရ။
ဟိုတ်နူဗီုပြၚ် ဒပ်ပၞာန်ဗမာ ကၠောန်သ္ပလဝ် လဝေၚ်ပၞာန်ဂှ်တုဲ နူကုလသမဂ္ဂ ကေုာံ ပွဳဗွိုၚ်ဂၠးကဝ်တံ စောဲစပ်လဝ် ပရေၚ်သ္အးဇ္ၚးဂစိုတ်ကလက်ဂကူရောၚ်။
ပ္ဍဲရးနိဂီုဍုၚ်ဗၟာမ္ဂး ဂကူကောန်ဍုၚ်အရၚ်လုပ်သၞောဝ် ၁၃၅ ဂကူ နွံမံၚ်ဂှ် သ္ပလဝ်စၟတ်သမ္တီတုဲ၊ သွက်ရိုဟေၚ်ဂျာတံ ဂှ်တှ်ေ နဒဒှ်ကောန်ဍုၚ်မွဲဂှ် ဟွံသ္ပလဝ်စၟတ်သမ္တီဏီပုဟ်။
ကုညးတံဂှ် ကော်ခဴစ “ဗင်္ဂါလဳ” တံတုဲ ဒှ်မၞိဟ်ကၠုၚ်နူဗင်္ဂလာဒေအ်တံ မံၚ်စံၚ်ဟွံလုပ်သၞောဝ်ပုဟ် စၟတ်စွံလဝ်မဒှ်ရ။
ပ္ဍဲလိက်လလောၚ်တြး ဌာနဝန်ဇၞော်ပရေၚ်ဍုၚ်သအာၚ် နေပျဳဒဝ်မ္ဂး မၞိဟ်သီုဖအိုတ် ၁၁၃၅၀၇ တၠဂှ် စၟဳစၟတ်သ္ပဒတန်ဟွံမာန်တုဲ၊ ၄၂၄၁ တၠဂှ်တှ်ေ ဒှ်မၞိဟ်ပါလုပ်လဝ် ပ္ဍဲပရေၚ်ပကီုပရာတ်တံရောၚ် စၟဳစၟတ်ဆဵုညာတ်လဝ်ရောၚ် ထမံက်ထ္ၜးလဝ်ရ။
လတူပရေၚ်ဟီုဂး ရိုဟေၚ်ဂျာ နူတွဵုရးရခေၚ် ၁ ပြကောတိကိုတ်ပြၚ် ဂြိပ်ပါဲတိတ်အာလဝ်ရောၚ်ဂှ် နူကဵုဌာနဝန်ဇၞော်ဏံ တးပါဲလဝ်ရ။
ကြဴနူက္တဵုဒှ် ပရေၚ်ပန်ဗတိုက်ပကီုပရာတ် ပ္ဍဲသၞာံ ၂၀၁၇ တုဲ၊ ရိုဟေၚ်ဂျာ ၅၄၀၀၀၀ ပြၚ် ဂြိပ်ပါဲလုပ်အာ အပ္ဍဲရးနိဂီုဍုၚ်ဗင်္ဂလာဒေအ်တုဲ ပ္ဍဲတွဵုရးရခေၚ် လပါ်သၟဝ်ကျာဂှ် သှ်ေၜက်မံၚ် ၂ ကိုတ်ပြၚ်ဏီဂှ် ပ္ဍဲလိက်လလောၚ်တြး ထမံက်ထ္ၜးလဝ်ရ။
အကြာဗၟာ ကဵု ဗင်္ဂလာဒေအ်တံ လၟေၚ်ကမၠောန်ကလေၚ်ပလံၚ်ဗ္စိုပ် ပွိုၚ် ၂ သၞာံဂှ် ပ္ဍဲသၞာံ ၂၀၁၈ တေံ တုပ်လဝ်စိုတ်ညးသ္ကံကီုလေဝ် ကြဴနူ ဒပ်ပၞာန်သီဏာအဝဵု သၞာံ ၂၀၂၁ တုဲ ပ္ဍဲဍုၚ်ဗၟာ အကာဲအရာ ပရေံကၠုၚ်တုဲ လၟေၚ်ကမၠောန်တံဂှ် ထမံက်ရုပ်ရဴဟွံမာန် ဒှ်ကၠုၚ်လဝ်ရ။
အပ္ဍဲအခိၚ် ဒပ်အာရက္ခ သီဂွံလဝ် တွဵုရးရခေၚ် ကြပ်အလုံမွဲတွဵုရးဂှ် အလဵုအသဳနေပျဳဒဝ် တုပ်စိုတ်ဒုၚ်တဲ သွက်ဂွံဒုၚ်ဏာတဲ ညးဒဒိုက်ရိုဟေၚ်ဂျာတံ မဒှ်ရ။
ပါဲနူရိုဟေၚ်ဂျာ စိုပ်မံၚ်ဗင်္ဂလာဒေအ်တုဲ၊ ညးဒဒိုက်ရိုဟေၚ်ဂျာ နွံပ္ဍဲမလေယှာ ၅၀၀၀ ဂှ်လေဝ် နူကဵုနေပျဳဒဝ် ဒုၚ်တဲအာရောၚ် ဟီုလဴလဝ်နွံရ။
ဆဂး နူလပါ်မလေယှာတှ်ေ ကၠာဟွံပလံၚ်ဗ္စိုပ်ဏီမ္ဂး ပရေၚ်ဂီုကၠီုညးတံဂှ် ကဵုဒၞာဲကိုပ်ကၠာတုဲ ဒးချပ်အာရောၚ် ဟီုလဴလဝ်ရ။
Ref:Indiatoday