မတ်မလီု၊ အဝ်ဂတ် ၁၈
ပ္ဍဲတွဵုရးမန် ဍုၚ်မတ်မလီု ဒၞာဲဂိက်ကွဳစက် တဝ်ဝေန်မာန္တလာ သၞေဟ်ကွဳစက်ဇၞော်မျေနဳကုၚ်ဂှ် နူကဵုဂကောံပံၚ်တောဲ ဒပ်ပၞာန်သီအဝဵုကဵု ဒပ်ဗၠာဲသၟိၚ်တံကၠုၚ်ရပ်ဏာ ရဲဍုၚ်ထဝါဲ တြုံကဵုဗြဴၜါတၠရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲအခိၚ်သဝ်တ္ၚဲ ဂိတုအဝ်ဂတ် ၁၆ လောန်ကၠုၚ်ဏံ ပ္ဍဲဒၞာဲဂိက်ကွဳစက် တဝ်ဝေန်မာန္တလာဂှ် ကိုဝိုၚ်ဇြေန် အာယုက် ၄၃ သၞာံ ကေုာံ သမ္ဘာညး မိနဳလာပျုၚ် မံၚ်အရာပ်ကွာန်သၟဝ်ကျာ ဍုၚ်ထဝါဲတံ အခိၚ်ကၠုၚ်ပတိတ်ကေတ်ကပေါတ်ဂှ် ဒးဒုၚ်လုပ်ရပ်ဏာ မဒှ်ရ။
ပရူဒဒှ် ရပ်မၞိဟ်ဗီုဏံဂှ်တှ်ေ ဆက်စပ်မံၚ်ကဵု ပရေၚ်ရပ်ဂွံလဝ်ကပေါတ်ကရိယာ ဖံက်ဖတိုဟ် (Detonator) တဆိပ် CDET ALFA လၟိဟ် ၁၀၀ တၞုၚ်ပါကၠုၚ် ၄၀ ဓုပ် ကၠုၚ်နူဍုၚ်မာန္တလေဝ် သွက်ဂွံပလံၚ်ဏာဍုၚ်မတ်မလီုဂှ် သီဂွံလဝ် ပ္ဍဲဒၞာဲဂိက်စၟဳစၟတ် သၞေဟ်ကၚ်ညံၚ်ခါယှေ အခိၚ်နူဂယးတ္ၚဲဂှ်ရ။
အတိုၚ်ရဲကြပ်ကဵုဒပ်ဗၠာဲသၟိၚ်တံ ဟီုလဴမ္ဂး ရဲဍုၚ်ထဝါဲ တြုံဗြဴၜါတၠဏံ အခိၚ်ကၠုၚ်ကေတ်ကပေါတ်ဓုပ်ပါသေဝ် ပ္ဍဲဂိက်ကွဳစက်မတ်မလီုဂှ် ဂွံလဝ်ပရိုၚ်ကၠာတဲတုဲ မၚ်ရပ်ကေတ်လဝ်ရောၚ် သ္ဂးရ။
ဗြဴကဵုတြုံၜါတၠ ဒးဒုၚ်ရပ်လဝ်ဏံ အတိုၚ်ဟီုလဴပတိတ်လဝ်ဂှ်တှ်ေ ကပေါတ်ဖံက်ဖတိုဟ်ဏံ သွက်သ္ဂောံပလံၚ်ဗ္စိုပ် ကမၠောန်ပတိတ် ဟကောဝ် ဥူလှဟာန် နွံပ္ဍဲဒေသဂြိုပ်ထဝါဲ လပါ်ဗမံက် ပွိုၚ်ဍုၚ်ထဝါဲရောၚ် ဂွံတီရ။
ပြဟ်ဟ်ဏံမ္ဂး နကဵုပရေၚ် ဖ္ဍိုက်ကေတ်နၚ်ကပေါတ်ကရိယာ ဖံက်ဖတိုဟ်ဏံတုဲ ရပ်ထိၚ်စၟဳစၟတ်မံၚ် ဗြဴကဵုတြုံၜါတၠ ရဲဍုၚ်ထဝါဲတံ ပ္ဍဲဗ္ဒိုပ်စၟဳစၟတ်သၟာန်သၟုက် မတ်မလီုတုဲ၊ ညးဒဳကွဳစက် ကေုာံ ညးဗက်လက်ကရဴကွဳစက်တံဂှ်လေဝ် ဒးဒုၚ်စၟဳစၟတ်မံၚ် ပ္ဍဲဗ္ဒိုပ်ဗၠာဲသၟိၚ် ညံၚ်ခါယှေတေံကီုရောၚ်။
ပ္ဍဲကဵုဒေသဂြိုပ်ထဝါဲလပါ်ဗမံက် ပွိုၚ်ဍုၚ်ထဝါဲ ဒှ်ဒၞာဲၜံက်ခါဲသတ္တု ကေုာံ ကမၠောန်ပတိတ်ဟကောဝ်တံ နွံမံၚ်ဗွဲမဂၠိုၚ်တုဲ ပ္ဍဲတမ်ဂိတု အဝ်ဂတ် လောန်ကၠုၚ်ဏံလေဝ် ဒၞာဲဌာန်ကမၠောန်ပတိတ်ဟကောဝ်လ္ၚဵု ပ္ဍဲဒေသဂှ် ဒပ်ပၞာန်သီအဝဵုတံ လုပ်ပန်သလိပ်သီကေတ်တုဲ ကၠေၚ်တိုင်ကဳ ဟွံအောန်နူ ၁၀၀ မတံဂှ် သီကေတ်ဏာလဝ် ကီုရောၚ်။
ပရိုၚ် – သြၚ်လောန်တိုၚ်မ်
Photo – Social Media