မတ်မလီု၊ အဝ်ဂတ် ၁၈
နူဌာနနာနာနွံမံၚ် သၟဝ်တဲအလဵုအသဳပၞာန် တွဵုရးမန်တံဂှ် အာတ်လဝ်ဗါတ်ဂျက် သွက်ပရေၚ်ကမၠောန်ဌာနညးတံ ထပ်ပဵုလဝ်ကီုလေဝ် ပ္ဍဲဗလးတိဏံ ကၠောန်ကၠုၚ်လဝ်နတဲကွေံကွေံဟွံမွဲပုဟ်ဂှ် အတိုၚ်လိက်ဒုၚ်စဳရေၚ် ဂဥုပ်စၟဳစၟတ်စရၚ် သၞာံဘဏ္ဍာ ၂၀၂၄-၂၀၂၅ ပတိုန်ထ္ၜးတုဲ ဂွံတီကေတ်ရ။
အတိုၚ်လိက်ဒုၚ်စဳရေၚ် ဂဥုပ်စၟဳစၟတ်စရၚ် တွဵုရးမန် စၟဳစၟတ်ဆဵုညာတ်လဝ် သွက်သၞာံဘဏ္ဍာ ၂၀၂၄-၂၀၂၅ ဂှ်တှ်ေ ပ္ဍဲကောံဓရီုလၟေၚ်ဍာံ တတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ပ္ဍဲအဝ်ဂတ် ၁၀ တေံဂှ် ပတိုန်ထ္ၜးကဵုလဝ်ရ။
အတိုၚ်လိက်ဒုၚ်စဳရေၚ်ဂှ်မ္ဂး ပ္ဍဲအရာ အာတ်ထပဵုလဝ်ဗါတ်ဂျက် ၜက်မံၚ်တံဂှ်တှ်ေ သွက်ကမၠောန် သိုၚ်ခၞံစဵုကၟာၚ်ရုၚ် ဌာနစၟဳစၟတ် သၟာန်သၟုက်တၟေၚ် (စပိမ) ခရိုၚ်ကျာ်ထဝ် ကၠောန်လဝ်ဂှ် အတိုၚ်စၟဳစၟတ်ဂွံလဝ်နတဲ ပ္ဍဲဗလးတိမ္ဂး နွံၜိုတ် ၉၀၀ ပေဓဝ်ကီုလေဝ် အာတ်ဗါတ်ဂျက် ထပဵုပတိုန်လဝ် စဵုကဵု ၉၃၀ ပေဏီရောၚ်။
တုဲပၠန် ကမၠောန် Electrical Turkey ၂၀ ဒၞာဲ ကေုာံ ကမၠောန်ဌာန ၁၀ ဒၞာဲ နူကမၠောန်ပါ်ပရအ်ဓါတ်လလဳ တွဵုရးဂှ်လေဝ် ပ္ဍဲအရာတော်တၟော်လဝ် စရၚ်သြန်တံမ္ဂး ဟွံကိတ်မံၚ်ညဳကဵု ဍာ်ဒကေဝ် သၞောတ်ဗ္ၜတ်ကဵုလဝ်အခေါၚ်တံတုဲ ပ္ဍဲဗလးတိလေဝ် ကမၠောန်တံဂှ်ဟွံတုဲဒှ်လဝ်ပေၚ်ၚ်ပုဟ် ပ္ဍဲလိက်ဒုၚ်စဳရေၚ်ဂှ် ထမံက်ထ္ၜးလဝ်ရ။
ကမၠောန်ဗဝ်စုတ်တၟအ်ထိၚ်ဗဒၚ် ပရေၚ်သိုၚ်ခၞံတိုက်ထ္ၜးပျး ဌာန်ယေန်သၞာၚ်သေန်တာ ပရေၚ်ယေန်သၞာၚ်ကောန်ဍုၚ်အရၚ် တွဵုရးမန်၊ နူရုၚ်မၚ်မွဲထိၚ်ဒဝ် ပရေၚ်ဇၞော်မောဝ်တွဵုရး ကမၠောန် သိုဝ်လာတံၚ်ဍာ် ၈ ဒၞာဲ၊ နူဌာနဝန်ဇၞော်ဖောအ်ဗြဳ ဒေသကွာန်ရး ကမၠောန် ၃ ဒၞာဲတံဂှ်လေဝ် ညံၚ်သ္ဂောံကိတ်ညဳကဵု ဍာ်ဒကေဝ် စၟတ်ဗ္ၜတ်သ္ဇိုၚ် ချူခၞံလဝ်ဗီုပြၚ်ကွေံကွေံဂှ် ဟွံမွဲပုဟ် သ္ဂးရ။
အပ္ဍဲဗွိုၚ်ရုၚ်ပါ်ဓါတ်လလဳ ဍုၚ်ကျာ်ထဝ် ကမၠောန်သိုၚ်ခၞံ သ္ၚိဌာန်သၞာဲဒါ ၂ ထပ်တောဲ ၄ ခဒမ် ကေုာံ ကမၠောန်ခါဲကၟာဍာ်အဝဳစိ ၄ ၝောံတဲဂှ်လေဝ် အတိုၚ်ဍာ်ဒကေဝ်သ္ဇိုၚ် နူဌာနဝန်ဇၞော်ပရေၚ်သိုၚ်ခၞံစၟတ်ကဵုလဝ်ဂှ် တံၚ်ဓဇက်လဝ်ဟွံသေၚ်ပုဟ် သ္ဂးရ။
ဌာနဂကောံဗဂဵုလဟဵုဍုၚ် ပိုၚ်ပြဳလဝ်ဒၞာဲစမြိုၚ်တံတုဲ စပ်ကဵုပရေၚ်လိၚ်စလဝ် ဆေၚ်ဍာ်လက်ဖက် “စိတ်တိုင်းကျ” ပ္ဍဲဗွိုၚ်ဖျာမျာၚ်ယျတနာ၊ လိၚ်စလဝ်ဒၞာဲစမြိုၚ် RC ၃ ထပ်၊ ပ္ဍဲဗွိုၚ်ဖျာဒိုၚ်ဝန်ကွေန် ကေုာံ ဒၞာဲသၞေဟ်ပြၚ်ဗတဳ ဂၠံၚ်ဇိုၚ်ၜဳ သၞေဟ်ၜၚ်ရာမည မတ်မလီုတံဂှ် လိက်ကသုက်လိၚ်လဝ်ဟၟဲဂှ်ကီု၊ ထပ်လိၚ်လဝ် မွဲအဆံၚ်ပၠန်၊ လိက်ကသုက်ဆက်လဝ်အယုက်တံလေဝ် ချုက်လဝ်ဟွံမွဲပုဟ် ပ္ဍဲလိက်ဒုၚ်စဳရေၚ် ထမံက်ထ္ၜးလဝ်ရ။
အပ္ဍဲဗွိုၚ်ပရေၚ်ဗဂဵုလဟဵုပွိုၚ်ဍုၚ်သဓီုဂှ် သွက်ကမၠောန်ပရေၚ်ပစူတိုၚ်ကန်ကရေတ် ၄ ဒၞာဲတံ ဆက်သၠာဲဇုက်ဖိုၚ်ပါ (fiber) တံဂှ် ၜိုန်ရထ္ပက်လဝ်လိက်ကသုက်တုဲ လိၚ်လဝ်ကီုလေဝ်၊ ပရေၚ်ဒးကဵုအကံက်ခေါန် ကူသာန်ဗၞိက် ရဲလိၚ်တံဂှ်လေဝ် ဟွံကဵုလဝ်ပုဟ် အတိုၚ်လိက်ဒုၚ်စဳရေၚ် ဂဥုပ်စၟဳစၟတ်စရၚ်ဂှ် ဂွံတီကေတ်ရ။
နူရုၚ်ဂဥုပ်စၟဳစၟတ်စရၚ် ဗီုဏံဂှ်တှ်ေ အကာဲအရာ စၟဳစၟတ်ဆဵုညာတ်လဝ် သွက်သၞာံဘဏ္ဍာ ၂၀၂၄-၂၀၂၅ တံတုဲ ညးတာလျိုၚ်အဆံၚ်ၚ်တံဂှ် ထေက်ကဵုဒးစၟဳစၟတ်ထိၚ်ဒဝ်အာ ဇၞော်ကဵုဇြဟတ်ကီု၊ သြန်အကံက်ခေါန် သှ်ေၜက်မံၚ်တံကီု ပရေၚ်လိၚ်ကဵုလဝ်ဆေၚ်တံဂှ် ဟိုတ်နူလိက်ကသုက်ဟၟဲတုဲ လ္တူရဲယိုက်ဂၠေၚ်တာလျိုၚ်တံ ယုတ်ဒေက်လဝ်ဂှ်မ္ဂး ထေက်ကဵုဒးကေတ်အရေဝ်ရောၚ် ညးစၞးတံထံက်ထ္ၜးလဝ်ရ။
သြန်ဂအုံဗါတ်ဂျက် သၞာံဘဏ္ဍာ ၂၀၂၄-၂၀၂၅ ဝွံ ဒှ်သြန်ဂအုံ စကာသုၚ်စောဲလဝ် ပ္ဍဲလက်ထက်သ္ကိုပ်ဝန်ဇၞော် တွဵုရးမန်တြေံ ဥူအံၚ်ကျဳတိၚ်တုဲ၊ စရၚ်သြန်ဂအုံ သုၚ်စောဲလဝ်အပ္ဍဲတွဵုရးတံဂှ်တှ်ေ မွဲသာ်မှလေဝ် ဟွံဂွံလလောၚ်တြး ကဵုလဝ်ဏီပုဟ်။
သြန်ဂအုံဗါတ်ဂျက် သၞာံဘဏ္ဍာ ၂၀၂၄-၂၀၂၅ တံဏံဂှ် ပဵုနူအရာပါလုပ်မံၚ် ပ္ဍဲကဵုလိက်ဒုၚ်စဳရေၚ် ဂဥုပ်စၟဳစၟတ်စရၚ်ဏီတုဲ ပ္ဍဲဗလးတိမ္ဂး နူကဵုသ္ကိုပ်ဌာနတံ သုၚ်စောဲလဝ်အတိုၚ်ပၟိက်စိုတ်ညးတံနွံလဝ် ကမၠောန်ဌာန ဟွံထမံက်ထ္ၜးလဝ်တံလေဝ် နွံဗွဲမဂၠိုၚ်မာန်ရောၚ် ညးသ္ၚဳဂၠိပ်ပရေၚ်ဍုၚ်ကွာန်တံ ပါ်ပါဲလဝ်အိုတ်ရ။
ပရိုၚ် – သြၚ်လောန်တိုၚ်မ်
Photo – MOI