နေပျဳဒဝ်၊ အဝ်ဂတ် ၁၈
အလဵုအသဳညဳသၟဟ်ကောန်ဂကူ NUG ၊ ဂကောံမဟာမိတ်ကောန်ဍုၚ်အရၚ်တံ ပ္ဍဲကဵုပရေၚ်ဒက်ပ္တန်လဝ် ကံၚ်သဳပၠတရဴ ဖိတ်ဒရေဝ်ဒဳမဝ်ကရေဇြဳ ကၟိန်ဍုၚ်ပံၚ်ကောံ (SCEF) ဂှ် ဂကောံပၠန်ဂတးဒုၚ်သ္ဇိုၚ်ကဵုဂကူဗၟာ ၂ ဂကောံတံပါလုပ်ကၠုၚ် နကဵုကောန်ဂကောံရ။
ပ္ဍဲကဵုအကြာတ္ၚဲလောန်ကၠုၚ်ဏံဂှ် ကံၚ်သဳပၠတရဴဖိတ်ဒရေဝ် (SCEF)၊ ဂကောံအလဵုအသဳယူနေတ်ဖိတ်ဒရေဝ် သကိုၚ် စၠတ်ထဝ်ကာလ အကြာတံကီု၊ ပ္ဍဲဒေသမာန္တလေဝ်ဂှ်လေဝ် ကၠောန်လဝ်ပေါဲဆဵုဂဗသဳကၠဳ အလန်ဒုတိယ နူကဵုအန်လာၚ် (Online) ဗွဲတၞဟ်ခြာ မဒှ်ရ။
ပ္ဍဲပေါဲဆဵုဂဗကောံဓရီုဏံဂှ် ပရူပရာဗီုပြၚ်ဒက်ပ္တန် SCEF၊ တင်နၚ်မူဝါဒလၟေၚ်ကမၠောန်ကီု၊ ပရေၚ်ကော်ဘိက်လုပ်ဂကောံတံဂှ် သောင်ကလးပတိုန်ထ္ၜးတုဲ နကဵုလညာတ်သဘဴပရေၚ်ကမၠောန်လပါ်ခိုဟ် သဳကၠဳလဝ်ညးသ္ကအ်ဂှ် ဂကောံဆေၚ်စပ်တံ လလောၚ်တြးလဝ်ရ။
ပ္ဍဲအဝ်ဂတ် ၁၃ တေံ အခိၚ် SCEF ဆဵုဂဗလဝ်ကဵု ဂကောံအလဵုအသဳယူနေတ်ဖိတ်ဒရေဝ်သကိုၚ်ကေုာံ စၠတ်ထဝ်ကာလအကြာတံတုဲ ပရူပရာဗွဲတြးသှ်ေမံၚ်တံဂှ်တှ်ေ ပ္ဍဲကောံဓရီု အလန်တတိယမ္ဂး ဆက်သဳကၠဳအာရောၚ် တုပ်စိုတ်ဖျေံလဝ်သ္ဂုတ်သွာတ်နွံရ။
တုဲပၠန် ပ္ဍဲအဝ်ဂတ် ၁၄ ဂှ်လေဝ် ကြဴနူ SCEF ဆဵုဂဗသဳကၠဳကဵု ဒေသမာန္တလေဝ်တုဲ နဒဒှ်ကောန်ဂကောံမွဲ ဒေသမာန္တလေဝ် သွက်သ္ဂောံပါလုပ်အာ ဂကောံ SCEF ဂှ် ဂွံတၚ်တုပ်စိုတ် သ္ပလဝ်ဒတန်မာန်ရ။
ဗီုဂှ်ကီု နူကဵုညးတာလျိုၚ် ယူနေတ်ဖိတ်ဒရေဝ်သကိုၚ်တံဂှ်လေဝ် နကဵုကောန်ဂကောံမွဲ သွက်သ္ဂောံပါလုပ်အာ ပ္ဍဲကံၚ်သဳပၠတရဴ ဖိတ်ဒရေဝ်ဒဳမဝ်ကရေဇြဳကၟိန်ဍုၚ်ပံၚ်ကောံ (SCEF) ဂှ် ဂွံလဝ် လိက်ကလေၚ်ကဵုနၚ်သွဟ်ဂှ် ပ္ဍဲလိက်လလောၚ်တြး SCEF ချူလဝ်ရ။
အလဵုအသဳညဳသၟဟ်ကောန်ဂကူ NUG၊ ကမ္မတဳညးစၞးစၠတ်ထဝ် ကၟိန်ဍုၚ် CRPH ၊ ဂကောံမဟာမိတ်ကောန်ဍုၚ်အရၚ် KIO၊ KNU၊ CNF ကေုာံ တွဵုရးကရေၚ်ဍာဲတံ စဒက်ပ္တန်ကၠုၚ်လဝ် SCEF ပ္ဍဲဂိတုမာတ်လောန်ကၠုၚ်ဏံ မဒှ်ရ။
ဟိုတ်ဒှ်သာ်ဂှ်ရ ပ္ဍဲအခိၚ်လၟုဟ် SCEF ဟီုတှ်ေ ပ္ဍဲကဵုမုက်ဒပ်ပၠတရဴ ပၠန်ဂတးတမ်က္ညၚ် NUG၊ CRPH၊ မဟာမိတ်ကောန်ဍုၚ်အရၚ်တံ၊ ယူနေတ်ဖိတ်ဒရေဝ်သကိုၚ်ကေုာံ ဒေသမာန္တလေဝ် ရဲဒေသအညာတံပါလုပ်တုဲ ဒှ်ကၠုၚ်ကောန်ဂကောံ ၈ ဂကောံ မဒှ်ရ။
ပ္ဍဲသတ္တဟတတိယ ဂိတုဂျူလာၚ်လောန်ကၠုၚ်တေံဂှ်လေဝ် ဂကောံဇြဟတ်ကောန်ဍုၚ်အရၚ် AA၊ မန်၊ ပအိုဝ် တံကီု၊ ဂကောံမဟာမိတ်ဒပ်ပံၚ်တောဲပၠန်ဂတးတမ်က္ညၚ် SRA ကေုာံ ဇြဟတ်ပၠန်ဂတးတမ်က္ညၚ် တၞဟ်ဟ်တံဂှ်လေဝ် နူကဵု SCEF ဆဵုဂဗလဝ်မွဲဂကောံမွဲဂကောံတုဲ အလန်ပထမကၠာတဲ ဖျေံလဝ်ပရေၚ်ကမၠောန် သွက်အဓါန်ဂတတေံ နွံရ။
သွက်ဂကောံပၠန်ဂတး နူတွဵုရးမန်တံသီုဖအိုတ် သ္ပစၞးတွဵုရးတုဲ ညံၚ်ဂွံပါလုပ်အာ အပ္ဍဲ SCEF မွဲစွံမာန်ကီု၊ အကြာညးတံကဵုညးတံလေဝ် ဆက်စၠောံတုဲဂစာန်ကၠောန်မံၚ်ရဂှ် ဥက္ကဌ ကမ္မတဳအုပ်ဓုပ်ကံၚ်သဳဖိတ်ဒရေဝ် တွဵုရးမန် နာဲမန်သာၚ် ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲအဝ်ဂတ် ၇ တေံ ကၠောန်လဝ်ကောံဓရီုပံၚ်တောဲ ဂကောံပၠတရဴပရေၚ်မဟာဗျူဟာ၊ မူဝါဒ SCEF ကေုာံ ကမ္မတဳပ္ညဳပ္ညပ်ကောပ်ကာဲ မဟာဗျူဟာပၞာန် နူကဵုအန်လာၚ်တုဲ ရုဲစှ်ခါန်ကၞက်လဝ် ဒုဥက္ကဌပံၚ်တောဲ ၂ တၠ၊ ညးအုပ်ကာ ၁ တၠ ကေုာံ ဖက်ဆောညးအုပ်ကာ ၂ တၠ တုဲဒှ်အာရ။
ဥက္ကဌပံၚ်တောဲ ကမ္မတဳပ္ညဳပ္ညပ်ကောပ်ကာဲ မဟာဗျူဟာပၞာန်ဂှ် သ္ကိုပ်က္ဍိုက်ပ်ပၞာန် KIA ကေုာံ သ္ကိုပ်က္ဍိုက်ပ်ပၞာန် KNU တံပါလုပ်တုဲ၊ ညးအုပ်ကာဂှ်တှ်ေ ဝန်ဇၞော်ပရေၚ်စဵုဒၞာ NUG ဥူယဳမန် ကေတ်လဝ်တာလျိုၚ်ရ။
ပ္ဍဲကောံဓရီုသ္ကိုပ်ဒပ်ဇၞော် ဒပ်စဵုဒၞာညးဍုၚ်ကွာန် PDF ကၠောန်ဗဒှ် ပ္ဍဲသတ္တဟပထမ ဂိတုအဝ်ဂတ်ဂှ်လေဝ် ညံၚ်သ္ဂောံပါလုပ်ကၠောန်အာ အတိုၚ်မဟာဗျူဟာ ပ္ဍဲကမ္မတဳပ္ညဳပ္ညပ်ကောပ်ကာဲပၞာန် မဟာဗျူဟာ SCEF ဂှ် ဖျေံလဝ်ပရေၚ်ကမၠောန်အဓါန်ဂတတေံ နွံရ။
တုဲပၠန် ပ္ဍဲဇၟာပ်ဒေသပၞာန်တံဂှ်လေဝ် ပံၚ်တောဲအာကဵုမဟာမိတ် ဂကောံဇြဟတ်ပၠန်ဂတး ကောန်ဍုၚ်အရၚ်တံတုဲ နူ “ပၞာန်ညးဍုၚ်ကွာန်ဒုၚ်ဒဝ်ပၠန်ဂတး” ဂှ် ညံၚ်သ္ဂောံပြံၚ်တိုန်အာ “ပၞာန်ထပက်မဟာဗျူဟာ” မာန်ဂှ် ပတဝ်က္ဍိုပ်ပလေဝ်စလဝ်တုဲ ကၠောန်အာရောၚ်ဂှ် ဖျေံလဝ်ပရေၚ်ကမၠောန်တံ နွံရ။
နူကဵုဗော်တောတက်ကောန်ဂကူကရေၚ်ဍာဲ (KNPP) အပ္ဍဲမဟာမိတ် ကောန်ဍုၚ်အရၚ်ဂှ်တှ်ေ အကြာဂကောံဇြဟတ်ပၠန်ဂတးတံမ္ဂး သွက်ဂွံသၠုၚ်ပတိုန် ဂလာန်ပတေဟ်ကဵု ပရေၚ်ပံၚ်တောဲကၠောန်ၜိုတ်အာ မွဲစွံတံဂှ် ဒှ်တၚ်သ္ဇိုၚ်ကိစ္စဇၞော်အိုတ် သွက်ပေါဲအံၚ်ဇၞးပရေၚ်ပၠန်ဂတးရောၚ် သ္ဂးရ။
တုဲပၠန် သွက်သ္ဂောံထမံက်ရုပ်ရဴ တၚ်ရန်တၟအ်ကောန်ဂကူ ညးတံမာန်ဂှ် ပရေၚ်တင်ဒတူလိုၚ်အာ မွဲစွံကဵုညးဍုၚ်ကွာန်တံတုဲ မင်မွဲသစ္စ လတူညးဍုၚ်ကွာန်တံလေဝ်ပါလုပ်မံၚ်ရောၚ်ဂှ် ပ္ဍဲကဵုလိက်သဝဏ် ပလံၚ်ဗ္စိုပ်ဏာ တ္ၚဲဒပ်ပၞာန်ကရေၚ်ဍာဲ ပေၚ် ၇၈ သၞာံ ပ္ဍဲဂိတုအဝ်ဂတ် ၁၇ တေံဂှ် KNPP ထမံက်ထ္ၜးလဝ်ရ။
သွက်သ္ဂောံ ဖအိုတ်ကဠက် တၠအဝဵုဒပ်ပၞာန်ကီု သွက်သောင်ကလးအာပရေၚ်ဟိုတ် တမ်သ္ဇိုၚ်ပဋိပက္ခမူလတံတုဲ အပြံၚ်အလှာဲ ပရေၚ်ဍုၚ်ကွာန် သွက်ဂွံဒက်ပ္တန်အာ ကၟိန်ဍုၚ်ပံၚ်ကောံဖိတ်ဒရေဝ်ဒဳမဝ်ကရေဇြဳဂှ် ဒှ်တၚ်ရန်တၟအ် SCEF ရောၚ် ပ္ဍဲဂိတုဂျူလာၚ် ၁၅ တေံ လလောၚ်တြးလဝ်နွံရ။
ပရိုၚ် – သြၚ်လောန်တိုၚ်မ်
Photo – NUG