မတ်မလီု၊ အဝ်ဂတ် ၁၉
အပ္ဍဲတွဵုရးမန် ရဲယိုက်ဂၠေၚ်လဝ်တာလျိုၚ်ပၞာန် ညးဍုၚ်ကွာန်တုဲဒှ်အာတံ သွက်သ္ဂောံဂွံကမၠောန်ကီု ညံၚ်သ္ဂောံဂွံသြန်ဒမၠိတံမာန်ဂှ် ဖန်ဇန်ရုဲစှ်ကဵုအာဖျုန် ဗွဲတၟေၚ်ရောၚ် သ္ကိုပ်ဝန်ဇၞော်တွဵုရးမန် အလဵုအသဳပၞာန် ဥူအံၚ်ဝေန်တာန် ဟီုရ။
အပ္ဍဲဂိတုအဝ်ဂတ် ၁၇ လောန်ကၠုၚ်ဏံ ပ္ဍဲရုၚ်အလဵုအသဳတွဵုရး ဍုၚ်မတ်မလီု ကၠောန်လဝ်ကောံဓရီုပ္ညဳပ္ညပ်ကမၠောန် သွက်ညးယိုက်ဝန်ပၞာန် ညးဍုၚ်ကွာန်တံသ္ဂောံဂွံကမၠောန်တုဲ ညံၚ်သ္ဂောံဂၠိကေတ်သြန်တမ်ရိုဟ်တံမာန်ဂှ် ညးဟီုဂးဏာလဝ် မဒှ်ရ။
သွက်ညးယိုက်ဝန်ပၞာန်ညးဍုၚ်ကွာန်တံ ညံၚ်သ္ဂောံဂွံအခေါၚ်အရာကမၠောန်တံကီု သွက်သ္ဂောံဂၠေံကေတ် သြန်တမ်ရိုဟ်တံမာန်ဂှ် ဒှ်အရာ ရုဲစှ်ကဵုလဝ်ဖျုၚ်ဗွဲတၟေၚ် ကၠောန်ကဵုမံၚ်ရောၚ် သ္ကိုပ်ဝန်ဇၞော် ဥူအံၚ်ဝေန်တာန် ဟီုရ။
တုဲပၠန် သွက်ညးယိုက်ဝန်ပၞာန်တံဂှ် သွက်သ္ဂောံဖန်ဗဒှ်ကဵု အခေါၚ်အရာကမၠောန် ညံၚ်ဂွံကိတ်ညဳကဵုဒေသတံကီု၊ ကမၠောန်သွက်သ္ဂောံ ဂမျိုၚ်ပရေၚ်ဗုၚ်ဂၞဴတံကီု သွက်သ္ဂောံပတိတ်ကဵုသြန်ဂၠေံ သွက်ဂွံသ္ပတမ်ရိုဟ်မာန်ဂှ် ဂစာန်ကၠောန်အာရောၚ် သ္ဂးရ။
ပ္ဍဲတွဵုရးမန်ဏံတှ်ေ ဒပ်ပၞာန်သီအဝဵု ပံက်လဝ်တန်ဗ္တောန်ယိုက်ဝန်ပၞာန်ညးဍုၚ်ကွာန် စနူလၟေၚ် ၁ စဵုကဵုစိုပ်လၟေၚ် ၂၇ ဂှ် ပကောံဂွံလဝ် ကောန်ပၞာန်ယိုက်ဝန်ဟွံအောန်နူကဵု ၅၆၀၀ တၠနွံရ။
အပ္ဍဲဂှ်မ္ဂး သွက်ညးယိုက်ဝန်ပၞာန်ပေၚ်အာ ၂ သၞာံ စနူလၟေၚ် ၁ စဵုကဵုစိုပ် လၟေၚ် ၄ တံဂှ် ကောန်ပၞာန်ယိုက်ဝန် ၜိုတ် ၂၀၀ တၠဟေၚ် စဴကၠုၚ်သ္ၚိမာန်တုဲ ဗွဲမဂၠိုၚ်ဂှ်တှ်ေ ချိုတ်အာလဝ်ကီု ဒးလဝ်ဝပ် ပ္ဍဲကဵုပေါဲဗတိုက်တံရ။
ကောန်ပၞာန်ယိုက်ဝန်ပၞာန်ပေၚ် ၂ သၞာံ ၈ တၠတံ ဂွံအာကမၠောန်တုဲယျ ဂှ် ဒုဝန်ဇၞော် ဌာနဝန်ဇၞော်သၟာကမၠောန် အလဵုအသဳပၞာန်ပြံၚ်လဝ်ဗီုပြၚ် ဥူမံၚ်မံၚ်တာန် ပ္ဍဲကောံဓရီုကၠောန်ဗဒှ်လဝ် ပ္ဍဲဂိတုအဝ်ဂတ် ၇ တေံဂှ် ဟီုဂးလဝ်ရ။
ပရိုၚ် – သြၚ်လောန်တိုၚ်မ်
Photo – Social Media