မတ်မလီု၊ အဝ်ဂတ် ၁၉
အပ္ဍဲကဵုစၠတ်ထဝ် တွဵုရးမန် ၜိုန်ရသ္ပလဝ်ဒတန် သွက်ဂွံကၟာတ်ပဒေါအ်ထောံ ပရေၚ်ဝိုၚ်ဝေၚ်လံၚ်သြန်တံကီုလေဝ် နူကဵုဂကောံအလဵုအသဳ တွဵုရးဂှ်တှ်ေ ဟွံကၠောန်ပရေၚ်ကေတ်အရေဝ်ဗတိုက်ပလီုထောံတုဲ ဆက်ဗၜေက်လဝ်မတ်ဖိုဟ်ရ။
အပ္ဍဲတွဵုရးမန်ဏံ ညံၚ်ရဴ ကလိဂွံလဝ်အခေါၚ်လုပ်သၞောဝ် ကၠောန်ကၠုၚ်မံၚ်ပရေၚ်ဝိုၚ်ဝေၚ်လံၚ်သြန် အခိၚ်ကာလလံလတံဂှ် ညံၚ်သ္ဂောံကၟာတ်ပဒေါအ်ထောံပိုတ်တ်ညိ ပ္ဍဲကောံဓရီုစၠတ်ထဝ် တွဵုရးမန် ကၠောန်ဗဒှ်လဝ် ပ္ဍဲဂိတုဂျောန် ၁၉ လောန်ကၠုၚ်ဏံဂှ် ညးဒစဵုဒစးဟၟဲ သ္ပဏာလဝ်ဒတန်တုဲရ။
ဂလာန်သွက်ဂွံကၟာတ်ပဒေါအ်ထောံ ပရေၚ်ဝိုၚ်ဝေၚ်လံၚ်သြန်တံဏံ ၜိုန်ရသ္ပလဝ်ဒတန် တုဲဒှ်ကီုလေဝ် ကြဴနူဂလာန်ပတိုန် အံၚ်ဇၞးအာတုဲ ၜိုတ်ပွဳပွူအကြာပွိုၚ် ၂ ဂိတုဏံ အပ္ဍဲဗလးတိမ္ဂး ပရေၚ်ဝိုၚ်ဝေၚ်လံၚ်သြန်တံ ပံက်လဝ် ပ္ဍဲကဵုရုၚ်ဗြဲကျာလုၚ်ၚ်တံတုဲ ဆက်တုဲကၠောန်စအာမံၚ် ချိုတ်တ်ပၠိုတ်တ်ရ။
ၜိုန်ရ ဂလာန်သွက်ဂွံကၟာတ်ပဒေါအ် ပရေၚ်ဝိုၚ်ဝေၚ်လံၚ်သြန်တံအံၚ်ဇၞးအာကီုလေဝ် ပ္ဍဲဗလးတိမ္ဂး ဝိုၚ်ဝေၚ်ဆက်နွံမံၚ်ဖိုဟ်တုဲ ပ္ဍဲစၠတ်ထဝ် ဂလာန်ပတိုန်ထ္ၜးအံၚ်ဇၞးအာကီုလေဝ် မုသာ်မှလေဝ် ပရေၚ်ပြံၚ်လှာဲအာဟၟဲပုဟ် ညးဒေသမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“စၠတ်ထဝ်ဂှ် စၠတ်ထဝ်ရ၊ ဝိုၚ်ဝေၚ်လံၚ်သြန်ဂှ် ဝိုၚ်ဝေၚ်လံၚ်သြန် ဒှ်မံၚ်ရ၊ မုလေဝ် ဒှ်အာဟၟဲပုဟ်။ မုလေဝ်ဟွံပြံၚ်လှာဲအာပုဟ်။ ညးတံကဵုညးတံ လတူဂှ် မုဂးဂး မုဟီုဟီုမံၚ်၊ စၠတ်ထဝ်ဂလာန်အံၚ်ဇၞးအာတှ်ေလေဝ် အံၚ်ဇၞးအာဟီုဂှ်တှ်ေ ဍေံဂှ်သွက်ဍေံတံသၟး အံၚ်ဇၞးအာရလေဝ်။ သွက်ညးသှ်ေမံၚ်တံတှ်ေ မုလေဝ်ဒှ်ကၠုၚ်ဟၟဲပုဟ်။ အတိုၚ်ဗီုဏံရ” သာ်ဝွံ သ္ဂးရ။
တုဲပၠန် သွက်ဂွံကၟာတ်ထောံ ပရေၚ်ဝိုၚ်ဝေၚ်လံၚ်သြန်တံဂှ် ပ္ဍဲစၠတ်ထဝ် ဂလာန်အံၚ်ဇၞးအာလဝ်ကီုလေဝ် နူလပါ်အလဵုအသဳပၞာန် ကၠောန်ကမၠောန် နတဲမာန်မှ ပရေၚ်ဝိုၚ်ဝေၚ်လံၚ်သြန်တံဏံ ဂွံအိုတ်အးကၠေံအာမာန်တုဲ၊ စဵုကဵုအခိၚ်လၟုဟ် ကေတ်လဝ်သြန် အကံက်တံတုဲကဵုလဝ်အခေါၚ်ဂှ်ရ သွက်ဂွံအိုတ်အးအာဟီုဂှ် ဒှ်မာန်ဟွံသေၚ်ပုဟ် ညးဆက်ဟီုရ။
အပ္ဍဲဒေသဏံ ပရေၚ်ဝိုၚ်ဝေၚ်လံၚ်သြန်တံညံၚ်ဂွံကၠေံအာဂှ် သၠုၚ်အသိၚ်ရပ်စပ်ကေတ်အရေဝ်တုဲ ကၠောန်အာရောၚ် ပ္ဍဲကောံဓရီုစၠတ်ထဝ်တေံ ဝန်ဇၞော်ပရေၚ်မၞိဟ် ဂကောံအလဵုအသဳ တွဵုရးမန် ဥူတေန်ဇြဝ်ထောန် ကဵုလဝ် တၚ်ဂတိကဝတ်နွံရ။
တုဲပၠန် လတူပရေၚ်ဝိုၚ်ဝေၚ်လံၚ်သြန်တံဂှ် ညးတာလျိုၚ်အဆံၚ်ၚ်တံ ညံၚ်သ္ဂောံထိၚ်ဒဝ်မၚ်မွဲအာဝိုၚ်ဝေၚ်တံ သွက်ဂွံအောန်စှ်ေအာတုဲ ရိုဟ်ကၞက်ဍေံညံၚ်ဂွံအိုတ်အးအာ ညံၚ်ဟွံဂွံထပ်ကလေၚ်က္တဵုဒှ်ကၠုၚ်မွဲဝါပၠန်ဂှ် ဂၠာဲထမံက်နဲကဲတံတုဲ ဆက်ကၠောန်အာရောၚ် ဟီုဂးလဝ် နွံမံၚ်ဏီရ။
ကိစ္စပတိုန်လဝ်ဂလာန်ဏံ အံၚ်ဇၞးလဝ်ပ္ဍဲစၠတ်ထဝ်တုဲ လတူဗလးတိ ယဝ်ရဗၠေတ်ဗၠေၚ်မံၚ်ကဵု အကာဲအရာဒဒှ်ဍာံမ္ဂး ကလေၚ်စၟဳစၟတ်အာအစောန်စရာဲ ဂကောံအလဵုအသဳတံမာန်ရောၚ် သၟာဝှ်ကြံၚ် သ္ၚဳဂၠိပ်ပရေၚ်ဍုၚ်ကွာန်မွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပရေၚ်ဂကောံအလဵုအသဳတံ ကၠောန်မံၚ်ဂှ် ဒးပတိုန်ထ္ၜးကဵုစၠတ်ထဝ်ရ။ စၠတ်ထဝ်လေဝ် အတိုၚ်အခိၚ်ကဵုဂှ် ကလေၚ်သ္ၚဳဂၠိပ်အာ အကာဲအရာတံမာန်ရ။ နဲမွဲပၠန်မ္ဂး ယဝ်ဟီုကဵု ဂလာန်ပရေၚ်ဝိုၚ်ဝေၚ်လံၚ်သြန်ဏံတှ်ေ ပရေၚ်ပတိုန်ထ္ၜးကဵု ပွမကၠောန်သ္ပထမံက်မံၚ်ရုပ်ရဴတံ လတူဗလးတိ ယဝ်ရဗၠေတ်ဗၠေၚ်မံၚ်ကဵု အကာဲအရာဒဒှ်ဍာံမ္ဂး ဣဏံဂှ် စပ်ကဵုပရေၚ်အစောန်စရာဲတုဲ ကလေၚ်စၟဳစၟတ်အာ ဂွံယျ” သာ်ဝွံ သ္ဂးရ။
အတိုၚ်အကာဲအရာ လတူဗလးတိလၟုဟ်ဏံတှ်ေ ပရေၚ်ဝိုၚ်ဝေၚ်လံၚ်သြန် အပ္ဍဲတွဵုရးမန်ဏံ သီု ၁၀ ပွိုၚ်ဍုၚ်ဂှ် နကဵုရုၚ်ခိုၚ်ၚ်ကၠိုက်က် ဆက်ကၠောန်အာမံၚ်ဖိုဟ်တုဲ၊ ကြဴနူ ဂလာန်ပတိုန်စၠတ်ထဝ်အံၚ်ဇၞးအာတုဲ သြန်အကံက်ဝိုၚ်ဝေၚ်တံဂှ်လေဝ် ထပ်ကံက်ထပဵုပတိုန်လဝ်ရောၚ် ဂွံတီကေတ်ရ။
ဟိုတ်နူပရေၚ်ဝိုၚ်ဝေၚ်လံၚ်သြန်တံဏံတုဲ အပ္ဍဲကဵုဒေသမ္ဂး ကိစ္စကၠတ်ကွဳလိုန်ဓါတ်တံကီု၊ အမှုကၠတ်ဂၠံက်ပၠံၚ်ၜး၊ ပရေၚ်သ္ၚိဌာန်ဟွံပြေပြံၚ် ပါဲနူဂှ် ပြသၞာဒှ်ဟွံထေက်တံက္တဵုဒှ်မံၚ်ကီုလေဝ် အလဵုအသဳပၞာန်မန်ပြံၚ်လဝ်ဗီုပြၚ်ဂှ်တှ်ေ ဆက်တုဲ ဗၜေက်လဝ်မတ် ဖိုဟ်ရောၚ်။
အပ္ဍဲတွဵုရးမန်မ္ဂး ပရေၚ်ဝိုၚ်ဝေၚ်လံၚ်သြန်တံဂှ် လက်ထက်အလဵုအသဳအဆက်ဆက်ကၠာတေံ ကဵုလဝ်အခေါၚ်ညံၚ်ရဴလုပ်သၞောဝ်ဟၟဲကီုလေဝ်၊ ကြဴနူပၞာန်သီအဝဵုတုဲ ထ္ၜးဟိုတ်နာနာသာ် ကၠောန်တိုန် ပေါဲသဘၚ်တံတုဲ ဝိုၚ်ဝေၚ်လံၚ်သြန်တံဂှ် ပံက်လဝ်အပ္ဍဲရုၚ် ညံၚ်ရဴလုပ်သၞောဝ်ကဵုလဝ်အခေါၚ် ဇၞော်ကဵုဇြဟတ်ရောၚ်။
ပရိုၚ် – သြၚ်လောန်တိုၚ်မ်
Photo – CJ