သမ္မတအလဵုအသဳပၞာန် ဥူမေန်အံၚ်လှိုၚ် ဂိတုသိပ်တေမ်ပါဏံ အာဍုၚ်ခမေန်ရောၚ်

ဖနန်ပင်၊ အဝ်ဂတ် ၁၉

သွက်ပရေၚ်ဆောံအကြာၜါရးနိဂီုဍုၚ် ဂွံခိုၚ်ဗိုန်တိုန်တုဲ က္ဍိုပ်သ္ကိုပ်ပၞာန်ဗၟာ သမ္မတ ဥူမေန်အံၚ်လှိုၚ်ဝွံ ပ္ဍဲတမ်ဂိတုသိပ်တေမ်ပါဏံ အာဍုၚ်ခမေန်ရောၚ်ဂှ် ဌာန်ပရိုၚ် ဖနန်ပင်ပိုအ် (Phnom Penh Post) ပ္ဍဲဂိတုအဝ်ဂတ် ၁၈ တေံ ထမံက်ထ္ၜးလဝ်ရ။

အာစိုပ်လဝ် ရတ်ယှာ၊ ကြုက်၊ အိန္ဒိယ၊ ဍုၚ်သေံ ကေုာံ ဍုၚ်တၞဟ်ဟ်တံတုဲ ဗွဲကြဴဏံ အစဳဇန်အာတရဴ ဍုၚ်ခမေန်ဏံ မံက်ဂတဝ်ကၠုၚ်ဒှ်တုဲ သွက်အလဵုအသဳနေပျဳဒဝ် ပၠမံၚ်တရဴတံ ဂွံလုပ်သၞောဝ်ဂှ် လၟေၚ်တရဴတံဏံ ဒှ်ပရေၚ်ဂစာန်မွဲရောၚ် ညးသ္ၚဳဂၠိပ်ဗွဲမဂၠိုၚ်တံ ဟီုဂးမံၚ်အိုတ်ရ။

စၠတ်ထဝ်အဆံၚ်သၠုၚ် ဍုၚ်ခမေန် သ္ပလဝ်ဒတန် ပရိုၚ် ဥူမေန်အံၚ်လှိုၚ်ကၠုၚ်စိုပ်ဂှ်တုဲ ဒၞာဲသွက်သ္ဂောံဒုၚ်တၠုၚ်တံဂှ်လေဝ် ဒစးဒုၚ်ရုဲစှ်ပလေဝ်စလဝ်ရောၚ် ပ္ဍဲပရိုၚ်ဂှ် ချူထမံက်လဝ်ရ။

ရန်တၟအ်ကဵု ပရေၚ်ညဳသာသၟဟ်သၟန် အကြာဍုၚ်ခမေန်ကဵု ဍုၚ်ဗၟာ ဂွံခိုၚ်ဗိုန်တိုန်တုဲ ဥူမေန်အံၚ်လှိုၚ် ကၠုၚ်စိုပ်ရောၚ်ဂှ် ညးနွံအခေါၚ်ဟီုဂး ဥက္ကဌစၠတ်ထဝ်အဆံၚ်သၠုၚ် ယှဳယာ သိုၚ်ရေတ် ဟီုလဴကဵု ဖနန်ပင်ပိုအ်ရ။

ပရေၚ်ပံၚ်တောဲကၠောန် အကြာရနိဂီုၜါဍုၚ်ဂှ် နွံမံၚ်ပၟိက်တုဲ သီုညးၜါလပါ်တံ ကလိဂွံဖဵုဂုဏ်ဗွဲမဂၠိုၚ်ရောၚ် သ္ဂးရ။

ဒပ်ပၞာန်ဗၟာ နွံသၟဝ်တဲ ဥူမေန်အံၚ်လှိုၚ် လတူပွမဖက်ပကဝ်လဝ်အခေါၚ်အရာမၞိဟ် ဇၞော်ကဵုဇြဟတ်ၜက်ၜေတ်လဝ်နွံတုဲ လတူလၟေၚ်တရဴဍုၚ်သအာၚ် ညးအာလဝ်တံဂှ် နူကဵုဂကောံအခေါၚ်အရာမၞိဟ်တံ ပါ်ပါဲပျုတ်ဗဒေက်မံၚ်အိုတ်ရ။

ရဲချဳဒရာၚ်အခေါၚ်အရာမၞိဟ်တံ ကေုာံ ရဲဒစဵုဒစးဒပ်ပၞာန် နကဵုလၟိဟ်လ္ၚီဗွဲမဂၠိုၚ်တံလေဝ် ဒးဒုၚ်ဆက်ရပ်ထိၚ်ဒဝ်လဝ်ဖိုဟ် မဒှ်ရ။

ဥူမေန်အံၚ်လှိုၚ် တိတ်တရဴဍုၚ်သအာၚ်တုဲ ညံၚ်ဂွံဒှ်အာ က္ဍိုပ်သ္ကိုပ်ညးဍုၚ်ကွာန်ဗွဲမလုပ်သၞောဝ်မာန်ဂှ် ညးဂစာန်မံၚ်ရောၚ် ရဲပါ်ပါဲတံ ဟီုဂးမံၚ်ရ။

ပေါဲရုဲမာဲအလီ မၞိဟ်ဗွဲမဂၠိုၚ်တံဟီုမံၚ် တုဲဒှ်အာတုဲ ပ္ဍဲဂိတုအေပြဳတေံဂှ် ဥူမေန်အံၚ်လှိုၚ် ကေတ်တာလျိုၚ် သမ္မတရ။

ကြဴနူပေါဲရုဲမာဲတုဲ ညးအာစိုပ်လဝ် အိန္ဒိယ၊ ကြုက်၊ ဍုၚ်လဴ၊ ဍုၚ်သေံ ကေုာံ ရတ်ယှာ သီုဖအိုတ် ၅ ဍုၚ်တုဲ၊ လၟုဟ်ဏံ ဆဵုဂဗမံၚ်ကဵု သမ္မတရတ်ယှာ ဗလာဒဳမာ ပူတေင်ရ။

ပ္ဍဲသၞာံ ၂၀၂၂ ဍုၚ်ခမေန် အခိၚ်ဂွံတာလျိုၚ်ဥက္ကဌ အာသဳယာန်တေံဂှ် ညံၚ်ဂွံသောင်ကလးအာ ပြသၞာဍုၚ်ဗၟာဂှ် ဗိုၚ်ရီုဗၚ်ဂစာန်ကၠုၚ်လဝ်နွံတုဲ လၟေၚ်တရဴ ဥူမေန်အံၚ်လှိုၚ်ဏံဂှ်တှ်ေ သွက်ပရေၚ်ဆက်ဆောံအကြာၜါဍုၚ် ပဵုတုဲဂွံခိုၚ်ဗိုန်တိုန်ဂှ် ဒှ်အရာပရေၚ်ဂစာန်ဂၠံၚ်ၜါလပါ်ဒှ်မာန်ရောၚ်ဂှ် ဥက္ကဌအေန်သတဳကျု ပရေၚ်ဆက်ဆောံ ဂၠးကဝ်ဍုၚ်ခမေန် ခေန်ဖဳယာ ဟီုရ။

ဣဏံဂှ်တှ်ေ ညံၚ်အဝဵုဥူမေန်အံၚ်လှိုၚ် ဒှ်သမ္မတဂှ် ဂွံဒှ်အာလပါ်လုပ်သၞောဝ် ဂွံခိုၚ်ဗိုန်တိုန် ပရေၚ်ရုန်ဂစာန်မွဲသ္ကုတ်မွဲသ္ကူရောၚ် ညးထပ်ဟီုဗပေၚ်လဝ်ရ။

ပရေၚ်အရာကလေၚ်ပ္ညဳပ္ညပ်၊ ပရေၚ်ညဳသၟဟ်ကောန်ဂကူ ကေုာံ ပရေၚ်ဒက်ပ္တန်ၜိုဟ်လလမ် ကေၚ်ကၠောန်ကၠုၚ်လဝ် ပ္ဍဲဍုၚ်ခမေန်တံဂှ်လေဝ် ပါ်ပရအ်ကဵုမာန်ရောၚ် ညးစွံအာရီုတုဲ ဟီုဂးလဝ်ရ။

နကဵုအလုံဂကောံအာသဳယာန်မွဲ ၜိုန်ရဟွံဒုၚ်တဲကီုလေဝ် ဥူမေန်အံၚ်လှိုၚ်အာစိုပ် ဍုၚ်ကောန်ဂကောံအာသဳယာန် မွဲဍုၚ်တုဲမွဲဍုၚ် ကေုာံ ဍုၚ်မဟာမိတ်ဇၞော်ဇၞော်ညးတံတုဲ ညံၚ်သ္ဂောံကလိဂွံ ပရေၚ်လုပ်သၞောဝ်ဂှ် ညးဂစာန်မံၚ်ရောၚ်။

Ref:Phnompenhpost