ကျာ်ထဝ်၊ အဝ်ဂတ် ၂၀
အပ္ဍဲတွဵုရးမန် ပွိုၚ်ဍုၚ်ကျာ်ထဝ် ဍုၚ်တိၚ်ဇြယျာတ် ကွာန်ဇြဳပျံၚ် စၟတ် ၅ ပ္ဍဲသၠာတ်တေအ်ဗဝ် ကရပ်ဘာဗတောန်လိက် ပ္ဍဲဂိတုအဝ်ဂတ် ၁၉ အခိၚ်နူဂယးဂှ် ဟိုတ်နူမကမ်လွဟ်ဇၞော်စှ်ေတုဲ ကောန်ၚာ် ၃ တၠ ချိုတ်အာ ၉ တၠဒးဝပ်အာရဂှ် ရိုဟ်ကၞက်ပရိုၚ်ပၞာန်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုအဝ်ဂတ် ၁၉ အခိၚ်နူဂယးၜိုတ် ၁၁ နာဍဳဂှ် နူတမ်ဒပ် အမတ ၃၁၀ ဖျေံသ္ဇိုၚ်ဍုၚ်တိၚ်ဇြယျာတ် ပန်ဏာလွဟ်ဇၞော်တုဲ ဒတုံစှ်ေခတိုဟ်အာ ဒၞာဲကဵုသၠာတ်တေအ်ဗဝ် ကရပ်ဘာဗတောန်လိက် ဂှ်ရောၚ် သ္ဂးရ။
အခိၚ်ကောန်ၚာ်တန်မူလတံ တေအ်မံၚ်ဗဝ်ဒၞာဲသၠာတ်ဏံ မကမ်လွဟ်ဇၞော်ဒတုံစှ်ေလဝ်မဒှ်တုဲ သီုကဵုကွးဘာ ဒတူဗဵုမံၚ် ဇိုၚ်ဇိုၚ် တံလေဝ် ဒးအာဝပ်ကီုရဂှ် ညးနွံရိုဟ်ကၞက်ပရိုၚ်ပၞာန်ဒေသမွဲတၠ ဟီုလဝ်ရ။
ဟိုတ်နူမကံလွဟ်ဇၞော်ဒတုံဒးအာတုဲ ပ္ဍဲဒၞာဲဂှ်ဟေၚ်ကွးဘာ KG အာယုက် ၅ သၞာံ ၁ တၠ ချိုတ်အာ၊ ကွးဘာတြုံဗြဴတၞဟ်ဟ်တံ စနူ KG စဵုကဵု G4 ၁၁ တၠတံဂှ် ဒးအာဝပ်ကီုရ။
အပ္ဍဲညးဒးဝပ်တံဂှ်မ္ဂး ၆ တၠဂှ် အကာဲအရာဒးဂွိၚ်ဖေက်ကဵုလမျီုနွံတုဲ ညးဒးဝပ်သီုဖအိုတ်တံဂှ် ပလံၚ်ဏာလဝ် ရုၚ်ဂဥုဲပွိုၚ်တိုက် ဍုၚ်တိၚ်ဇြယျာတ်တုဲ လွဳမံၚ်ဂှ် ဂွံတီရ။
အခိၚ်စိုပ်ရုၚ်ဂဥုဲဂှ်တှ်ေ ကောန်ၚာ် ၂ တၠ ထပ်ချိုတ်အာတုဲ မၞိဟ်ချိုတ်လဝ်သီုဖအိုတ်တံ ဒှ်အာ ၃ တၠရ။
ကွာန်ဇြဳပျံၚ် စၟတ် ၅ ဂှ် ဒှ်ကွာန်တိဍာ်ထိၚ်ဒဝ် KNU မဟာဒပ် ၁ တုဲ ပ္ဍဲကဵုကွာန်တိဍာ် KNU တံ ထိၚ်ဒဝ်လဝ်ဂှ်တှ်ေ နူလပါ်ဒပ်ပၞာန်သီအဝဵုတံ ပန်မံၚ်ကဵုလွဟ်ဇၞော်မွဲဏှမွဲဏှ မဒှ်ရ။
ပ္ဍဲဂိတုဂျောန် ၁၈ လောန်ကၠုၚ်တေံလေဝ် ပ္ဍဲပွိုၚ်ဍုၚ်ကျာ်ထဝ် ဂၠံၚ်ပန်သွာၚ် ကွာန်ချံၚ်သံက်ဂှ် အခိၚ်ဂကောံဒပ်စဵုဒၞာဒေသ PDF ကဵု ညးဒေသတံကောံမံၚ်ဂှ် ဒးဒုၚ်ကြဳဗုမ်နူဗလးကျာတုဲ သီု PDF တံကီု ကောန်ကွာန်တံလေဝ် ချိုတ်၊ ဒးဝပ် ဗွဲမဂၠိုၚ်နွံကၠုၚ်လဝ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ