ကျာ်ထဝ်၊ အဝ်ဂတ် ၂၀
အပ္ဍဲတွဵုရးမန် ပွိုၚ်ဍုၚ်ကျာ်ထဝ် သ္ကုတ်ဂၠံၚ် လ္ဂုၚ်-မတ်မလီုဂှ် ဒပ်ပၞာန်သီအဝဵု သွက်သ္ဂောံထပ်ပံက် ဂိက်သၞေဟ်ကၚ်စၟဳစၟတ် ဟွံအောန်နူ ၅ ဒၞာဲ နွံတုဲ ကၠောန်မံၚ်ပရေၚ်သိုၚ်ခၞံတံဂှ် ညးလတူဍုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူတမ် နူဂိတုအဝ်ဂတ်ဏံတုဲ ပ္ဍဲကဵုကွာန်မုက်ပလေန်၊ ကျောန်ဒဝ်၊ ကွာန်တယိတ်ကုၚ် ကေုာံ လပါ်ဗမံက် သုၚ်လေအ်တေန်တံဂှ် ဒပ်ပၞာန်သီအဝဵု သွက်သ္ဂောံထပ်ပံက်အာ ဂိက်သၞေဟ်ကၚ်စၟဳစၟတ်တံဂးတုဲ ကၠောန်ၜိုတ် ပလေဝ်ပလေတ်မံၚ်အိုတ်ရောၚ်။
အပ္ဍဲဂိက်သၞေဟ်ကၚ်စၟဳစၟတ် သိုၚ်ခၞံမံၚ်တၟိ ဂတမုက် ဌာန်ပရေလၟောၚ် သုၚ်လေအ်တေန်ဂှ် ညံၚ်ရဴဂိက်သၞေဟ်ကၚ်စၟဳစၟတ်ဇၞော် မုက်ပလေန်ကီု သိုၚ်ခၞံမံၚ်နကဵုဗါန်ကာခိုၚ်ၚ်ကၠိုက်က်ရောၚ် သ္ဂးရ။
နကဵုအမိၚ်ဝန်ဇၞော်ပရေၚ်ဂီုကၠီုကေုာံ ဒေသပယျဵု အလဵုအသဳပၞာန် တွဵုရးမန် သ္ကိုပ်ဗိုလ်ဇၞော် ကျဝ်ဇွာမျေအ်တုဲ ကၠောန်မံၚ်အစဳဇန် သွက်သ္ဂောံထပ်ပံက် ဂိက်သၞေဟ်ကၚ်စၟဳစၟတ်တံဏံရောၚ် ဂၠိုက်ဂၠာဲတုဲဂွံတီလဝ်ရ။
ဂကောံစဵုဒၞာညးဍုၚ်ကွာန် PDF ကေုာံဂကောံပၠန်ဂတးတံ ညံၚ်ဟွံဂွံလုပ်စိုပ်ကၠုၚ်အပ္ဍဲဍုၚ်တုဲ ပရေၚ်ထပ်ပံက်ဂိက် သၞေဟ်ကၚ်စၟဳစၟတ်တံဏံဂှ် ဒှ်ပရေၚ်ဒစးဒုၚ်စဵုဒၞာလဝ်ကၠာတဲရောၚ် နူလပါ်အလဵုအသဳပၞာန် ထ္ၜးလဝ်ဟိုတ်ရ။
ဂိက်သၞေဟ်ကၚ်စၟဳစၟတ်တံဏံဂှ် သွက်သ္ဂောံစဵုဒၞာသၞ ဂကောံပၠန်ဂတးတံ ဟွံသေၚ်၊ ဒှ်မံၚ်သွက်သ္ဂောံရပ်ဓရတ် အာတ်သြန် နူညးအာတရဴတံကဵု သၟာဗၞိက်တံရောၚ်ဂှ် ညးဒေသတံ ပါ်ပါဲမံၚ်အိုတ်ရ။
အပ္ဍဲသ္ကုတ်ဂၠံၚ် လ္ဂုၚ်-မတ်မလီု ခရိုၚ်သဓီု တွဵုရးမန်ဏံ ဂိက်သၞေဟ်ကၚ်စၟဳစၟတ်သီုဖအိုတ် ၄၀ ပြၚ် နွံမံၚ်တုဲ နူကဵုဂိက်သၞေဟ်ကၚ်စၟဳစၟတ်တံဂှ်တှ်ေ နူဒပ်ပၞာန်ကဵုဂကောံပံၚ်တောဲတံ ဇၟာပ်ဂိတု ကလိဂွံမံၚ်သြန်လုပ် နကဵုကိုတ်လ္ၚီ နွံမံၚ်ရောၚ်။
ပရိုၚ် – သြၚ်လောန်တိုၚ်မ်
Photo – CJ