မတ်မလီု၊ အဝ်ဂတ် ၂၀
အပ္ဍဲတွဵုရးမန် နူကဵုဒပ်ပၞာန်သီအဝဵု ပြံၚ်လှာဲဒှ်အာ အလဵုအသဳတွဵုရးတုဲ စိုပ်ကၠုၚ်ပွိုၚ် ၄ ဂိတုပြၚ်ကီုလေဝ် ပရေၚ်ဗဂဵုလဟဵုဍုၚ်ကွာန်တံဂှ် ဆက်ဍိုန်လျမံၚ်ဖိုဟ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ပၞာန်သီအဝဵု ကၠောန်ပေါဲရုဲမာဲ ပ္ဍဲတွဵုရးမန်တုဲ ပ္ဍဲဂိတုမာတ် ၂၀ လောန်ကၠုၚ်တေံ စကော်လဝ်ကောံဓရီု စၠတ်ထဝ်တုဲ ပ္ဍဲကဵုအေပြဳ ၇ တေံဂှ် ရုဲစှ်လဝ် သ္ကိုပ်ဝန်ဇၞော်ကေုာံဝန်ဇၞော်ဌာနဆေၚ်စပ်တံ မဒှ်ရ။
အလဵုအသဳတွဵုရးပြံၚ်လဝ်ဗီုပြၚ် ဒှ်ကၠုၚ်အပြံၚ်လှာဲကီုလေဝ် ကိုန်အစဳဇန်ပွိုၚ် ၁၀၀ တ္ၚဲတံကီု စဵုကဵုအခိၚ်လၟုဟ် ပရေၚ်ကမၠောန်ဗဂဵုလဟဵုဍုၚ်ကွာန် တွဵုရးမန်တံဂှ် ဆက်တုဲဍိုန်လျပရေံမံၚ်ဖိုဟ်ဏီရောၚ် ညးဒေသတံ သ္ဂးရ။
လၟုဟ်ဏံ ပရေၚ်ပလေဝ်ပလေတ်ဂၠံၚ်ဍာန် လီုလာ်မံၚ်တံဟၟဲတုဲ ကွဳစက်ဗက်သီဂိုၚ်ဟမိက် ပ္ဍဲအကြာအရာပ်၊ ကွာန်တံ ကၠောန်မံၚ်အခိၚ်လၟေၚ်ဍာံလေဝ် ဟွံမွဲကီု၊ စနူကဵု ဍာ်ဗရံၚ် ညံၚ်ဍာ်ဂွံအာကၠုၚ်ခိုဟ် ပရေၚ်သ္အးဇ္ၚးတံဂှ်လေဝ် ရဲဌာနဗဂဵုလဟဵုဍုၚ်ကွာန်တံ ကၠောန်သ္ပကဵုမံၚ်ဟၟဲပုဟ် ဂွံတီရ။
လၟုဟ် ရဲဌာနဂဵုလဟဵုသာယာတံ ဗက်ကံက်မံၚ်အကံက်အခေါန်နာနာသာ်ကီုလေဝ် ပရေၚ်ကမၠောန်သွက်ဒးရေၚ်တၠုၚ် စနူကဵုကိစ္စ ပလေဝ်ဂၠံၚ်လီုလာ်မံၚ်တံဂှ်ကၠောန်ကဵုမံၚ်ဟၟဲတုဲ ညးဍုၚ်ကွာန်တံ ဒးကၠောန်ကေတ်မံၚ် နကဵုဇြဟတ်ဇကုကဵုဇကုရောၚ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ရဲပရေၚ်ဗဂဵုလဟဵုတံ ဂၠံၚ်တှ်ေ ဟွံပလေဝ်ပုဟ်။ ဆဂး အကံက်ခေါန်ဗဂဵုလဟဵုဍုၚ်ကွာန်တံ၊ စရိတ်ပရေၚ်ဗဂဵုလဟဵု သာယာတံ၊ ကွဳလိုန်ဓါတ်မ္ဂး အကံက်ခေါန်သၠာကွဳ၊ အကံက်ခေါန်ဗဂဵုလဟဵုသာယာတံ အိုတ်သီု ကံက်မံၚ်ဖအိုတ်ရ၊ လၟုဟ်ဂၠံၚ်တံလီုမံၚ်ဂှ် ရုပ်ရဴပရေံလောန်အာကွေံရ၊ ဂၠံၚ်ဗွဲမဂၠိုၚ် လီုလာ်မံၚ်အိုတ်ရ။ လီုလာ်အာတုဲတှ်ေလေဝ် ညးလဵုမွဲလေဝ် ဟွံဗိုၚ်ကၠောန်ကဵုပုဟ်၊ လ္ၚဵုတံဂှ်တှ်ေ နကဵုဇြဟတ်ဇကုကဵုဇကု ညိညိညည ဗိုၚ်ကၠောန်လဝ်နွံရ။ ကၠောန်လဝ်ဂှ်လေဝ် ဂွံမွဲခဏညိရ။ နဲကဲစှ်ေသၞောတ်လဝ် ဟွံသေၚ်ပုဟ်။ ရဲပရေၚ်ဗဂဵုလဟဵုဍုၚ်ကွာန်တံ လၟုဟ်မုမွဲလေဝ် ဟွံကၠောန်ကဵုပုဟ်” သာ်ဝွံ သ္ဂးရ။
တုဲပၠန် လၟုဟ်ဂၠံၚ်တံလီုလာ်မံၚ်ဂှ် ဌာနပရေၚ်ဗဂဵုလဟဵုဍုၚ်ကွာန် ဟွံကၠောန်ကဵုတုဲ အတိုၚ်အလဵုဇကုညးဍုၚ်ကွာန်တံၜိုတ်သ္ပမာန် ညးဒေသတံဗိုၚ်ကၠောန်မံၚ်ကေတ်တ်တုဲ ဂၠံၚ်လီုလာ်မံၚ် မွဲဏှမွဲဏှဂှ်ရ သီုကဵုဒးဆဵုဂဗမံၚ်ကဵု ဘဲအန္တရာဲကွဳစက်တံကီုရောၚ် ညးဆက်ဟီုရ။
လၟုဟ် စိုပ်မံၚ်အခိၚ်ကာလဗြဲဏံ နူဌာနဗဂဵုလဟဵုတံဟွံပလေဝ်ကဵုဂၠံၚ်မ္ဂး ဂၠံၚ်ပဵုလီုလာ်ဂၠိုၚ်မံၚ်တုဲ မၞိဟ်လ္ၚဵုလ္ၚဵုတံဂှ် ဟိုတ်နူဂၠံၚ်လီုလာ်တုဲ ဒးလဝ်ဝပ်ဘဲဒဏ်တံလေဝ်နွံမံၚ်ကီုရောၚ် ညးဒေသမွဲတၠပၠန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“မုဟွံလံဏီ ဗြဲဂူဖျေံဂှ်တှ်ေ ဒှ်အာဒၞာဲဟဠံက်ဇၞော်မံၚ်ရ၊ တုဲတှ်ေ ပ္ဍဲဟဠံက်ဂှ် ဍာ်မၚ်မံၚ် ဒှ်မံၚ်ဟဠံက်ဂှ်ဟွံတီတုဲ ညးဗျုဗျုတြုံဗြဴၜါတၠ အဟိန်ဍိုက်ကၠုၚ်ကွဳလိုန်ဓါတ်ဂှ် ဟဠံက်ဏံ ခယျဆဍာ်မၚ်မံၚ်ညိညဓဝ် ထေၚ်တုဲ ဒဳတတ်အာ၊ နကဵုအသိၚ်ညိညလေဝ်ပါမံၚ်တှ်ေ ဟကပ်စှ်ေအာ ပ္ဍဲဟဠံက်ဂှ်တုဲ ကွဳဒေါမ်စှ်ေအာရ။ အခိၚ်ဒေါမ်စှ်ေအာဂှ်တှ်ေ ဒှ်အာသရညိ၊ ဒးဝပ်အာတံ ဒှ်ကၠုၚ်” သာ်ဝွံ သ္ဂးရ။
လၟုဟ်ဏံ ဒှ်အခိၚ်ဗြဲတုဲ ညံၚ်ဘဲအန္တရာဲကွဳစက် ဟွံဂွံက္တဵုဒှ်အာဂှ် သွက်ဂွံဒးပလေဝ်ကဵုဂၠံၚ်လီုလီုတံနွံ၊ ယဲမနက်၊ ယဲဂၞဴ ညံၚ်ဟွံဂွံက္တဵုဒှ် ဒၞာဲခမိတ်၊ ရုဲနွံမံၚ် ပ္ဍဲဂအုံဟမိက်အုဲအုဲအေၚ်ၚ်တံဂှ် ရဲဌာနဗဂဵုလဟဵုဍုၚ်ကွာန်တံ ညံၚ်ဂွံသီဂိုၚ်ကဵုအာညိဂှ် ညးဒေသတံ နွံမံၚ်ပၟိက်ရ။
လက်ထက်အလဵုအသဳ NLD ကၠာတေံမ္ဂး ပရေၚ်ကမၠောန်ဗဂဵုလဟဵု အပ္ဍဲဒေသ ဂၠံၚ်လီုလာ်အာမ္ဂး လးကဵုကတ္တရာနာၚ်လောန်၊ လးကဵုဂၠံၚ် ကန်ကရေတ်တံတုဲ သွက်ပရေၚ်ကမၠောန် သီဂိုၚ်ဟမိက်တံမ္ဂး ထပ်ရာန်ဗပေၚ်ကဵု ကွဳစက်သီုဂိုၚ်ဟမိက်တံတုဲ ကၠောန်လဝ်ကဵု နွံရ။
ပ္ဍဲတွဵုရးမန်ဏံ စနူအခိၚ်ပၞာန်သီအဝဵု စဵုကဵုစိုပ်လက်ထက်အလဵုအသဳပၞာန် ပြံၚ်လဝ်ဗီုပြၚ်ဏံတုဲ စပ်ကဵုပရေၚ်ကမၠောန်ဗဂဵုလဟဵု ဍုၚ်ကွာန်တံဂှ် ကဵုသြန်မှကၠောန်ကဵုတုဲ၊ ယဝ်ရအာတေၚ်စိုပ် ဒၞာဲဆေၚ်စပ်တံမ္ဂး မွဲသာ်မှ ဖန်ဖက်ရေၚ်တၠုၚ်ကဵုလေဝ် ဟၟဲပုဟ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ