ဖာပန်၊ အဝ်ဂတ် ၂၁
အပ္ဍဲတွဵုရးကရေၚ် ဒပ်မၚ်ပယျဵုကရေၚ် BGF တံ ဗိုၚ်ကဵုလဝ်အရီုဗၚ်ဒပ်ပၞာန်ဗမာ ပ္ဍဲကဵုပရေၚ်လဝေၚ်ပၞာန် ဖာပန်တံဂှ် နူကဵုအလဵုအသဳတွဵုရးကရေၚ် ဇိုန်နှၚ်အပ်ပြာပ်ကဵုလာဘ်သြန် ပရေၚ်ထံက်ပၚ်တံရ။
အပ္ဍဲကဵုတ္ၚဲဒက်ပ္တန် ဒပ်မၚ်ပယျဵုကရေၚ် BGF ပေၚ် ၁၆ သၞာံဂှ် အလဵုအသဳတွဵုရးကရေၚ် ဇိုန်နှၚ်ထံက်ပၚ်ကဵုဏာသြန် ၉၀ ကိုတ် ကုတမ်ဒပ် BGF ၁၀၁၁၊ တမ်ဒပ် ၁၀၁၃ ကေုာံ တမ်ဒပ် ၁၀၁၄ တံဂှ် လလောၚ်တြးလဝ်ပရိုၚ်ရ။
အပ္ဍဲဂိတုအဝ်ဂတ် ၁၈ ဂှ် ဝန်ဇၞော်ဌာန ပရေၚ်ဓာတ်လလဳ၊ ဓါတ်အစောမ်၊ ကွတ်စက် ကေုာံ ပရေၚ်ပလံၚ်ဗ္စိုပ် အလဵုအသဳ တွဵုရးကရေၚ် ဥူသဝ်မျိုဝ်မျေအ် ဇိုန်နှၚ်ထံက်ပၚ်ကဵုလဝ်သြန် မွဲမွဲတမ်ဒပ်မ္ဂး ၃၀ ကိုတ် ကုတမ်ဒပ်မၚ်ပယျဵုကရေၚ် BGF ၃ တမ်ဒပ်တံတုဲ ညးတာလျိုၚ် BGF တံဒုၚ်ကေတ်လဝ်တဲဂှ် ချူထမံက်လဝ် ပ္ဍဲလိက်ပရိုၚ်ရ။
တမ်ဒပ် BGF ဇိုန်နှၚ်ကဵုလဝ်သြန်ထံက်ပၚ်တံဂှ်တှ်ေ ဒှ်တမ်ဒပ် ၁ ဖျေံသ္ဇိုၚ် ပ္ဍဲပွိုၚ်ဍုၚ်လှိုၚ်ဗၠဲ သၟဝ်ဒေသဒပ် ၁ ကေုာံ တမ်ဒပ်၂ ဖျေံသ္ဇိုၚ် ပွိုၚ်ဍုၚ်ဖာပန်တံဒှ်တုဲ သီု ၃ တမ်ဒပ်တံဂှ် ဟွံဒှ်ပြံၚ်လဝ်ဗီုပြၚ် ဒပ်ပၞာန်ကောန်ဂကူ ကရေၚ် KNA သ္ကိုပ်ပၞာန်တြေံ BGF သဝ်ချေတ်တူ သ္ကိုပ်သ္ကတုဲ ဆက်နွံမံၚ်သၟဝ်တဲဒပ်ပၞာန်ဗၟာတံဖိုဟ်ရောၚ်။
တုဲပၠန် တမ်ဒပ် BGF ၁၀၁၃၊ ၁၀၁၄ ဖျေံလဝ်သ္ဇိုၚ် ပွိုၚ်ဍုၚ်ဖာပန်တံဂှ်တှ်ေ အပ္ဍဲကဵုဒပ်ပၞာန်ဗၟာ ကၠောန်မံၚ်ပရေၚ်လဝေၚ်ပၞာန် ခရိုၚ်ဖာပန်ဂှ် ဍေံတံဗိုၚ်ထ္ၜးကဵုဂၠံၚ် သွက်ကရောၚ်ပၞာန်ဗၟာတံတုဲ ပံၚ်တောဲပါလုပ် ဘိုၚ်ဗတိုက်ကဵုမံၚ်ကီုရောၚ် ရိုဟ်ကၞက်ပရိုၚ်ကြပ်ကဵု BGF တံ သ္ဂးရ။
အပ္ဍဲတမ်ဒပ်တံဏံမ္ဂး တမ်ဒပ် BGF ၁၀၁၄ ဂှ် နွံမံၚ် ပ္ဍဲဒၞာဲဂိက်သၞေဟ်ကၚ်စၟဳစၟတ် ဝါပိုဝ်တဝ် ဂိက်သၞေဟ်ကၚ်စၟဳစၟတ် ဗဒါဲ ၁၀ တိုၚ် နွံလတူဂၠံၚ်ကွဳစက် သဓီု-မျာၚ်ကလေဝ်-ဘာအၚ် ဆက်စၠောံလဝ်အကြာဍုၚ်ဘာအၚ် တွဵုရးကရေၚ် ကေုာံ ဍုၚ်သဓီု ဖျေံသ္ဇိုၚ် တွဵုရးမန်ဂှ် ပံၚ်တောဲလဝ်ကဵုဒပ်ဗၠာဲသၟိၚ်တံတုဲ နူကဵုကွဳစက် ဖ္ဍိုက်မံၚ်ကပေါတ်ဗၞိက်တံဂှ် ဗက်အာတ်ဂၠာဲစမံၚ်သြန် ဗွဲမဂၠိုၚ်ရ။
တမ်ဒပ် ဒပ်မၚ်ပယျဵုကရေၚ် BGF တံဂှ် စနူဂိတုဂျာန်နဝါရဳ ၁ သၞာံ တုဲကၠုၚ်ဏံတုဲ ပြံၚ်လှာဲဒက်ပ္တန်လဝ် ဒပ်ပၞာန်ကောန်ဂကူကရေၚ် KNA ကီု ပ္ဍဲအရာပရေၚ်ပြံၚ်လှာဲဒက်ပ္တန်ဏံဂှ် က္ဍိုက်ပ်သ္ကိုပ် BGF ယၟုဒယှ်မံၚ် လပါ်ပရေံ စပ်ကဵုကိစ္စ “ကျာဖျ” သ္ကိုပ်ပၞာန် သဝ်ချေတ်တူ၊ ဒုသ္ကိုပ်ပၞာန် သဝ်တေန်ဝေန်တံ ပါလုပ် က္ဍိုက်လဝ်က္ဍိုပ်ရောၚ်။
ၜိုန်ရတမ်ဒပ် BGF ဗွဲမဂၠိုၚ် ပြံၚ်လှာဲဒက်ပ္တန်ကၠောံအာ ဒပ်ပၞာန်ကောန်ဂကူကရေၚ် KNA ကီုလေဝ် တမ်ဒပ်သၟဝ်ဒေသဒပ် ၁ ကေုာံ တမ်ဒပ်သၟဝ်ဒေသဒပ် ၄ သ္ကိုပ်ဗိုလ်ဇၞော် သဝ်မုက်တုၚ်က္ဍိုက်ပ်တံဂှ် ဟွံပြံၚ်ကၠောံအာ KNA တုဲ ဆက်နွံမံၚ်သၟဝ်တဲ ဒပ်ပၞာန်ဗၟာဖိုဟ်ရ။
ပရိုၚ် – သြၚ်လောန်တိုၚ်မ်
Photo – BGF