ပလဝ်၊ အဝ်ဂတ် ၂၁
အပ္ဍဲကဵုရးတၞၚ်သဳ ပွိုၚ်ဍုၚ်ပလဝ် ကွာန်အံက်ပံၚ်ဂှ် ဟိုတ်နူလိုန်ဒးမါၚ်တပ်တိတုဲ တြုံတၠသ္ၚိဂှ် ချိုတ်အာ၊ မၞိဟ်ဗြဴဂှ် ဒးအာဝပ်နွံမံၚ်ရောၚ် ရိုဟ်ကၞက်ပရိုၚ်ဒေသတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုအဝ်ဂတ် ၁၅ လောန်ကၠုၚ်တေံ ပ္ဍဲဍုၚ်ပလဝ်ဂှ် ညးပါဲဒဴပၞာန် ဗြဴကဵုတြုံၜါတၠတံ အခိၚ်ကလေၚ်စဴကေတ်သြောံ ပ္ဍဲသ္ၚိညးတံ ကွာန်အံက်ပံၚ်ဂှ် လိုန်ဒးအာမါၚ်တပ်တိ အပ္ဍဲကဵုကွာန်ဂှ်ရ။
ဟိုတ်နူလိုန်ဒးမါၚ်တပ်တိတုဲ တြုံတၠသ္ၚိဂှ် ချိုတ်အာအပ္ဍဲဒၞာဲဂှ်တုဲ သမ္ဘာဂှ်ဒးလဝ်ဝပ်ပ္ဍဲဒၞာဲစးကဵု ဒဳတံတုဲ တိုန်စိုပ်ဝဳမံၚ် ရုၚ်ဂဥုဲပလဝ်ရ။
ဒၞာဲလိုန်ဒးမါၚ်တပ်တိဂှ် နွံဒၟံၚ်ဟွံသ္ၚောဲကဵု ဗ္ဒိုပ်ဗၠာဲသၟိၚ် ဍုၚ်ပလဝ်တုဲ ဒၞာဲဏံဂှ် ဒှ်မံၚ်ဒေသဒၞာဲဒပ်ပၞာန်သီအဝဵုတံကဵု ဒၞာဲဂကောံပၠန်ဂတးတံ ချဳဒရာၚ်အာကၠုၚ်လဝ်ပရေၚ်ပၞာန်တံရောၚ် သ္ဂးရ။
ဂိတုဂျူလာၚ် ၂၃ လောန်ကၠုၚ်တေံလေဝ် ပ္ဍဲပွိုၚ်ဍုၚ်ပလဝ် ကွာန်တံၚ်ယာ မၞိဟ်ဗြဴမွဲတၠ အာယုက် ၃၈ သၞာံ အခိၚ် အာဗက်ကပှ်မံၚ်ပလၚ်ဂှ် လိုန်ဒးမါၚ်တပ်တိတုဲ ချိုတ်အာလဝ်ကီု ဂွံတီရ။
အပ္ဍဲရးတၞၚ်သဳ ကြဴနူဒပ်ပၞာန်သီအဝဵုတုဲ ပရေၚ်ညးဍုၚ်ကွာန်တံချိုတ်ဒးဝပ် ဟိုတ်နူမါၚ်တပ်တိ ဂၠိုၚ်တိုန်ဒၟံၚ်ကီုလေဝ် နူကဵုလပါ်ဂကောံရပ်လွဟ်ၜါလပါ်တံ အရာပရေၚ်ဒးသောၚ်ကလး ဖန်ဖက် ရေၚ်တၠုၚ်ကဵုလဝ်တံဂှ် ဟၟဲဏီပုဟ်။
ပရိုၚ် – သြၚ်လောန်တိုၚ်မ်
Photo – Social Media