သဓီု၊ အဝ်ဂတ် ၂၁
အပ္ဍဲတွဵုရးမန် ပွိုၚ်ဍုၚ်သဓီု ရုၚ်စက်တာယာသဓီု ညံၚ်ဂွံကလေၚ်ဂေတ်အာပြဟ်ဟ်မာန် နကဵုနဲကဲနာနာ သွက်သ္ဂောံ ထမံက်ရုပ်ရဴကမၠောန်ညိဂှ် သ္ကိုပ်ဝန်ဇၞော်တွဵုရးမန် အလဵုအသဳပၞာန်ပြံၚ်လဝ်ဗီုပြၚ် ဥူအံၚ်ဝေန်ထောန် ကဵုလဝ်စၞောန်ပ္ညုၚ် နွံရ ။
အပ္ဍဲအခိၚ်ညးအာစိုပ်လဝ် ရုၚ်စက်အဇာဇၞော် လၟေၚ် (၂၁) ရုၚ်စက်တာယာ – သဓီု နွံပွိုၚ်ဍုၚ်သဓီု ပ္ဍဲဂိတုအဝ်ဂတ် ၁၉ လောန်ကၠုၚ်တေံဂှ် သ္ကိုပ်ဝန်ဇၞော် တွဵုရးမန် ကဵုကၠုၚ်လဝ်စၞောန်ပ္ညုၚ် မဒှ်ရ။
ညံၚ်ရုၚ်စက်တာယာ (သဓီု) ဂွံကလေၚ်ဂေတ် သွက်ဂွံထမံက်ရုပ်ရဴကမၠောန်ပြဟ်ဟ်မာန် ဒုၚ်သ္ဇိုၚ်ကဵုရာဘာ တိတ်နူအပ္ဍဲတွဵုရးတံတုဲ သွက်သ္ဂောံကၠောန်ပတိတ်အာတာယာအပ္ဍဲဍုၚ်ဂှ် ညးကဵုဏာလဝ်စၞောန်ပ္ညုၚ်ရ။
သွက်သ္ဂောံဗဂေတ်အာ ရုၚ်စက်တာယာအပ္ဍဲဍုၚ်ဂှ် နွံမံၚ်ပၟိက်ကဵုရာဘာဍာ်ဒကေဝ်သၠုၚ်ၚ်တံတုဲ နဲကဲပညာ ပရေၚ်ပတိတ်တာယာတံဂှ်လေဝ် ဟွံရုံဂပ်ဏီတှ်ေ သွက်သ္ဂောံထမံက်အာရုပ်ရဴကမၠောန်ပြဟ်ဟ်ဂှ် ဒှ်အာဟွံမာန်ဏီပုဟ် တၠကမၠောန်မွဲတၠ ဟီုရ ။
ရုၚ်စက်တာယာ (သဓီု) ဂှ် နွံဒၟံၚ်ဗဒါဲကွာန်ပ္ကဴဒကှ် ဂၠံၚ်ကွဳစက် သဓီု-ဘာအၚ်တုဲ၊ ဒက်ပ္တန်လဝ်နကဵုနဲကဲပညာ Czech ပ္ဍဲသၞာံ ၁၉၈၅ တေံတုဲ စဗဂေတ်ကၠုၚ်ပတိတ်လဝ်တာယာဂကူ Bias Tyra ဒးစုတ်ကျောတ်တံရောၚ် ဂွံတီလဝ် အတိုၚ်တင်နၚ် ရုၚ်စက်တံရ။
ဗွဲကြဴဏံ စိုပ်လက်ထက်အလဵုအသဳ ဥူတိၚ်သိၚ် ၜိုတ်သၞာံ ၂၀၁၂ ဂှ် ဟိုတ်နူအခက်အခုဲ ပရေၚ်ဗဂေတ်ရုၚ်စက်နွံမံၚ်၊ နွံမံၚ်ပၟိက်ကပေါတ်အပြောံရာဘာ ကေုာံအရာတၞဟ်တံတုဲ ပါဲနူဂှ်ပၠန် တော်ကဵုပရေၚ်ဗါတ်ဂျက်မ္ဂး ရုၚ်စက်သၟဝ်တဲဌာနဝန်ဇၞော် ပရေၚ်ကွတ်စက်တံကျဒၟံၚ်ဖအိုတ်တုဲ ပါလုပ်အာပ္ဍဲစရၚ်ရုၚ်စက် ဒးယှအ်ဖျေံပရေၚ်ကမၠောန်တံဂှ် ဂွံတီရ။
အပ္ဍဲသၞာံ ၂၀၁၅-၂၀၁၆ ဂှ်တှ်ေ ဟိုတ်နူကပေါတ်စက်တံ တြေံကၠုၚ်ဂှ်ကီု၊ သၟုဟ်ဓါတ်သဘာဝ ကေုာံ ဓါတ်လလဳတံ ဟွံရုံဂပ်၊ ပ္ဍဲအရာနဲကဲပညာကဵု ပရေၚ်ဍာ်ဒကေဝ်တံမ္ဂး ပြိုၚ်ပကာန်ကဵုတာယာလုပ်ကၠုၚ် နူဍုၚ်သအာၚ်တံဟွံမာန်တုဲ ပရေၚ်ပတိတ်တာယာတံဂှ် သီုဖအိုတ် ကြပ်ဒေါအ်အာ မဒှ်ရ။
ကြဴနူပၞာန်သီအဝဵုတုဲ သွက်ဂွံကလေၚ်ဗဂေတ်ရုၚ်စက်တာယာ (သဓီု) ပ္ဍဲသၞာံ ၂၀၂၂ တေံ ကော်ဘိက်လဝ်ဂှ် တိုန်ပတိုန်ထ္ၜး ကုညးတၠဓန တၠကမၠောန်အပ္ဍဲဍုၚ်၊ ဍုၚ်သအာၚ်တံနကဵုဗီုပြၚ်ပံၚ်တောဲ အလဵုအသဳကဵုပုဂ္ဂလိက ဗီုပြၚ် PPP ကီုလေဝ် ကလေၚ်ဗဂေတ်ကမၠောန် ဟွံမာန်ဏီပုဟ်။
ပရိုၚ်- သြၚ်လောန်တိုၚ်မ်
Photo – MOI