ၜၚ်ကံက်၊ ဂိတုအဝ်ဂတ် ၂၁
အပ္ဍဲလၟေၚ်တရဴဍုၚ်သေံ သ္ကိုပ်ပၞာန်ဇၞော် ယေဝ်ဝေန်ဥူ ဂဥုပ်ဒပ်တၟိ ဒပ်ပၞာန်သီအဝဵုသဳကၠဳလဝ် သွက်သ္ဂောံပံၚ်တောဲဗတိုက်ပလီု ပရေၚ်ညိၚ်ဝပ်ပယျဵု ၜါဍုၚ်ကေုာံ ပရေၚ်သွံရာန်လွဟ် ဂၠံၚ်ဒမၠုဟွံလုပ်သၞောဝ်တံဂှ် နူအလဵုအသဳပၞာန် လလောၚ်တြးလဝ် ပရိုၚ်ရ။
သ္ကိုပ်ပၞာန်ဇၞော် ယေဝ်ဝေန်ဥူ အာစိုပ်မံၚ်ဍုၚ်ၜၚ်ကံက်ဍုၚ်သေံ တရဴအလန်ကၠာအိုတ် သွက်သ္ဂောံတိုန်စိုပ် ကောံဓရီုညးတာလျိုၚ် အဆံၚ်သၠုၚ် သေံ-ဗၟာ မရနုက်ကဵု ၉ ဝါဂှ် ပ္ဍဲဂိတုအဝ်ဂတ် ၁၉ တေံ ဆဵုဂဗလဝ်ကဵုဝန်ဇၞော်ပရေၚ်စဵုဒၞာကေုာံ ဂဥုပ်သ္ကိုပ်က္ဍိုက်ပ်ဒပ်ပၞာန် ဍုၚ်သေံတံ ဗွဲတၞဟ်ခြာ မွဲမွဲဒၞါဲတံရ။
အပ္ဍဲပေါဲဆဵုဂဗတံဏံဂှ် သဳကၠဳလဝ်အကာဲအရာသွက်သ္ဂောံ ဆက်ထမံက်အာရုပ်ရဴ ပရေၚ်တၚ်တုပ်စိုတ်အကြာၜါဍုၚ်၊ သွက်သ္ဂောံသၠုၚ်ပတိုန်ပရေၚ်ဆာန်ကၟိန်နွံဒၟံၚ်တုဲတုဲ အကြာဒပ်ပၞာန်ၜါလပါ် သွက်သ္ဂောံခိုၚ်ဗိုန်တိုန်အာ သၠုၚ်ပတိုန်ပရေၚ်ပံၚ်တောဲကဏ္ဍစုၚ်ၚ်တံရောၚ်။
အပ္ဍဲပရေၚ်ကိစ္စတံဏံမ္ဂး သွက်သ္ဂောံဆက်ပံၚ်တောဲကၠောန်အာ ပရေၚ်ညိၚ်ဝပ်ၜိုဟ်လလမ်ဒေသပယျဵု ၜါဍုၚ်၊ ပရေၚ်အုပ်လဒမ်သၞောဝ်ဓဝ် ဥပဒေ၊ ပရေၚ်ဗတိုက်ပလီုကပေါတ်ဗၞိက်ဟွံလုပ်သၞောဝ် ကေုာံ ပရေၚ်ပကီုပရာတ်၊ ပရေၚ်သၠာဲဂတး ကဵုကေတ်တၚ်နၚ်ပရိုၚ်တံ ပါလုပ်မံၚ်ရ။
တုဲပၠန် သွက်ပရေၚ်ကူသာန်ဗၞိက်ပယျဵု ဂွံကလေၚ်ခိုဟ်တိုန်အာမာန်ဂှ် ပရေၚ်ညိၚ်ဝပ်ဒေသပယျဵု ပၟိက်ကိစ္စဇၞော်ဒၟံၚ်တုဲ နူအလဵုအသဳကေုာံ ဒပ်ပၞာန်ၜါဍုၚ် ဒးပံၚ်တောဲမၚ်မွဲထိၚ်ဒဝ်အာမွဲစွံရောၚ်။
မွဲလပါ်ပၠန် နူလပါ်ဍုၚ်ဗၟာ ဗီုဗတိုက်ပလီုမံၚ် ပရေၚ်လီဠာန်အန်လာၚ်နွံမံၚ်ဒၞာဲစမြိုၚ် ပ္ဍဲဒေသကျံက်ခက် ကေုာံ ရွှေကုက္ကိုလ်တံတုဲ အကာဲအရာဗတိုက်သရိုဟ်ကၠောန်ဒၟံၚ် ပရေၚ်လီသြန်အန်လာၚ်တံလေဝ် ပါလုပ်မံၚ်ရ။
နူကဵုဍုၚ်ဗၟာ ဆက်စဵုဒၞာဗတိုက်ပလီုမံၚ် ပရေၚ်သွံရာန်ဂဥုဲၜူမာဲတံတုဲ သွက်သ္ဂောံပံၚ်တောဲဗတိုက်ပလီုအာ ကိစ္စပရေၚ်ရာဇဝတ်တတ်ကၠောံပယျဵုဍုၚ် ကေုာံ ပရေၚ်သွံရာန်လွဟ် ဂၠံၚ်ဒမၠုဟွံလုပ်သၞောဝ်တံဂှ် သ္ကိုပ်ပၞာန်ဇၞော် ယေဝ်ဝေန်ဥူ ဟီုလဝ်ကဵု ဂဥုပ်သ္ကိုပ်က္ဍိုက်ပ်ဒပ်ပၞာန်သေံရောၚ်။
အတိုၚ်သမ္မတ ဇကုညးခါန်ကၞက်လဝ်ကေတ်တ် ဥူမေန်အံၚ်လှိုၚ် လ္တူတၚ်အာတ်မိက်လဝ် သ္ကိုပ်ဝန်ဇၞော်ဍုၚ်သေံ အနုတေန် ပ္ဍဲလၟေၚ်တရဴဍုၚ်သေံ ဂိတုအဝ်ဂတ် ပထမသတ္တဟတေံ သွက်သ္ဂောံထပိုတ်ကဵုဂၠံၚ်ဍာန်လွဟ် ကၠုၚ်နူလပါ်ပယျဵုတံဂှ် လၟုဟ်ဏံ ဂဥုပ်ဒပ်ဗၟာကလေၚ်ထပ်ဟီုမွဲဝါပၠန် မဒှ်ရ။
ပရေၚ်ဇီုကပိုက်ဇၞော်အိုတ် ညံၚ်ဂွံကတဵုဒှ်ကၠုၚ် လတူဂကောံဇြဟတ်ပၠန်ဂတး ဖျေံလဝ်သ္ဇိုၚ်ဒေသလပါ်သၠုၚ်ကျာ ဍုၚ်ဗၟာတံဂှ်ဂစာန်ဒၟံၚ်ရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ပါ်ပါဲသ္ၚဳဂၠိပ်လဝ်ရ ။
“ညံၚ်ဇြဟတ်ဂကောံပၠန်ဂတးတံ ဂွံဍိုန်လျအောန်စှ်ေအာဂှ် ဂစာန်မံၚ်နကဵုနဲကဲနာနာတံရ။ ဟိုတ်ဂှ်ရ ဆက်စၠောံကဵုဍုၚ်ဗဒါဲတံ နကဵုက္ဍိုပ်လိက်နာနာတုဲ မိက်ဂွံကုတ်ဗပိုတ် ပရေၚ်ဂၠံၚ်ဍာန်လွဟ်ကၠုၚ်မံၚ်တံဂှ် ဒှ်သဘဴဂစာန်ဒၟံၚ် ညံၚ်သ္ဂောံဒှ်ကၠုၚ် ပရေၚ်ဇီုကပိုက်ဇၞော်အိုတ်ရောၚ် ညာတ်ရ။ နူလပါ်ဂကောံဇြဟတ်ပၠန်ဂတးပိုဲတံလေဝ် ဒးနွံမံၚ်ကဵုသတိတံတုဲ ၜိုတ်သ္ပမာန် ဒးကလေၚ်ဖန်ရေၚ်တၠုၚ်အာရ၊ ဒးဂၠာဲလဝ် ဂၠံၚ်ဍာန်တၟိတံဏောၚ်။ ပရေၚ်ဓရတ်နူဂၠးကဝ် (လတူအလဵုအသဳပၞာန်) ဂှ်လေဝ် ဒးဗဂေတ်ကၠောန်အာနကဵုဗီုပြၚ်နာနာသာ်ဏောၚ်“သာ်ဝွံ သ္ဂးရ။
ဟိုတ်နူ အတိုၚ်မူဝါဒအလဵုအသဳသေံနွံမံၚ် မိက်ဂွံဆက်ဆောံလုက်စုက်အာကဵု ဂကောံရပ်လွဟ်ကောန်ဂကူကေုာံ ဂကောံပၠန်ဂတးချဳဒရာၚ်မံၚ် ပ္ဍဲဒေသပယျဵုသေံ-ဗၟာတံသီုဖအိုတ်တုဲ စပ်ကဵုပရေၚ်ဏံ လညာတ်ဟွံတုပ်သၟဟ်ညးသ္ကံတံ နွံမံၚ်ရောၚ်။
စပ်ကဵုအကာဲအရာ ပရေၚ်ဍုၚ်ဗၟာပံၚ်တောဲကၠောန်မံၚ်ကဵု အာသဳယာန်ကီု အတိုၚ်ပရေၚ်က္ဍိုက်ပ်အလဵုအသဳ ဗီုပြၚ်ဒပ်ပၞာန်ဗမာ မၚ်မွဲအာလဝ်တာလျိုၚ်ဂကူ တာလျိုၚ်ပိုဲ ၃ တၚ်ဂှ်လေဝ် ပ္ဍဲကဵုလၟေၚ်တရဴအာလဝ်ဍုၚ်သေံဏံ သ္ကိုပ်ပၞာန်ဇၞော် ယေဝ်ဝေန်ဥူ ဟီုလဴ ကဵုလဝ်သမ္တီကီုရောၚ်။
တုဲပၠန် အကြာဒပ်ပၞာန်ၜါလပါ် စပ်ကဵုကိစ္စခန်လ္ၚတ်ကွတ်ပရေၚ်ပၞာန်၊ ကွးဘာပၞာန်၊ ဂကောံဝေၚ်ဒြဟတ်၊ ဂကောံယေန်သၞာၚ်တံတုဲ မွဲလပါ်ကဵုမွဲလပါ်သွက်ဂွံဗလးဏာဂှ်ကီု ကဵုအာကြေဝ်ဝေၚ်ညးသ္ကံတုဲ လၟေၚ်တရဴပရေၚ်ဆာန်ကၟိန် ကဆံၚ်ကဆံၚ်ပရေၚ်ပံၚ်တောဲတံ ဂွံတောတက်ခိုၚ်ဗိုန်တိုန်ဆက်ဂစာန်အာဂှ်လေဝ် သဳကၠဳလဝ်ကီုရောၚ်။
အပ္ဍဲပရေၚ်ပေါဲဆဵုဂဗလဝ်ကဵု ဝန်ဇၞော်ပရေၚ်စဵုဒၞာသေံဂှ်လေဝ် စပ်ကဵုပရေၚ်ကိစ္စ ရပ်စပ်ဂၠိုက်ဂၠာဲထမံက်ရုပ်ရဴ ကေတ်မံၚ်အရေဝ် လတူညးပါလုပ်ဆက်စပ်မံၚ်ကဵု ပရေၚ်လီသြန်အန်လာၚ်တံတုဲ ဗီုပြၚ်ပံၚ်တောဲလဝ်ကဵု ဂကောံဂၠးကဝ်တံကဵု ဍုၚ်ဇိုၚ်ဝုတ်ဒိုဟ်ဗဒါဲတံဂှ်လေဝ် ဟီုလဝ်ကီုရ။
စပ်ကဵုပရေၚ်တာဒၞာ ပဒေါအ်ပၟတ်ဂြိုပ်တူတတ်ကၠောံပယျဵု ကေုာံ ယက်ပၟတ်ဂြိုပ်တံတုဲ ကိုန်အစဳဇန်ကမၠောန် ပရေၚ်ပံၚ်တောဲ ညံၚ်အာကာသဂွံသ္အးဇ္ၚး နူသၟုယက်လက်ကၠာ် အတိုၚ်ရးနိဂီု ၃ ဍုၚ် ဗၟာ-သေံ-လဴ တုပ်လဝ်စိုတ်တံကီု စပ်ကဵုပရေၚ်ပံၚ်တောဲ ဍာ်ဒကေဝ် ဍာ်သ္အးဇ္ၚးတံဂှ်လေဝ် သဳကၠဳလဝ်ကီုရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – MOI