သကိုၚ်၊ အဝ်ဂတ် ၂၂
အပ္ဍဲပေါဲဗတိုက် က္တဵုဒှ်ဒၟံၚ် အလုံမွဲဍုၚ် ပွိုၚ်မွဲဂိတုဏံဂှ် ကောန်ပၞာန် ၃၀၀ ပြၚ် နူလပါ်ဒပ်ပၞာန်ဗမာသီအဝဵု ချိုတ်အာလဝ်ရဂှ် နူကဵုဌာနပရေၚ်စဵုဒၞာအလဵုအသဳညဳသၟဟ်ကောန်ဂကူ NUG ပတိတ်လလောၚ်တြးလဝ်ရ။
စနူဂိတုဂျူလာၚ် ၁ စဵုကဵု ၃၁ အပ္ဍဲပွိုၚ်မွဲဂိတု ပေါဲဗတိုက်က္တဵုဒှ်ဒၟံၚ်အလုံမွဲဍုၚ်တံဂှ် ကောန်ပၞာန် ၃၁၅ တၠ သီုကဵု ညးတာလျိုၚ် နူလပါ်ဒပ်ပၞာန်ဗမာချိုတ်အာတုဲ ၄၇၃ တၠဂှ် ဒးအာဝပ် သ္ဂးရ။
အပ္ဍဲပေါဲဗတိုက် ရပ်ဂွံလဝ်ဂၠုဲပၞာန် ကောန်ပၞာန်ဗမာသီုဖအိုတ် ၂၉ တၠတံ အပ္ဍဲဂှ်ညးတာလျိုၚ်ဒပ်ပၞာန်တံလေဝ် ပါလုပ်မံၚ်ကီုရ။
အပ္ဍဲဂိတုဂျူလာၚ်တုဲကၠုၚ်ဂှ် ဂကောံဇြဟတ်ပၠန်ဂတးတံ ထပက်ပၞာန်ဗတိုက်လဝ်ဗ္ဒိုပ်ဒပ်ပၞာန်ဗမာ ၁၆ ဒၞာဲနွံတုဲ သီုသီဂွံလဝ်ဗ္ဒိုပ်ဒပ်ပၞာန် ၁၀ ဗ္ဒိုပ်နွံရောၚ် NUG သ္ဂးလဝ်ရ။
ပ္ဍဲကဵုပေါဲဗတိုက်က္တဵုဒှ်ဒၟံၚ် အကြာဒပ်ပၞာန်ဗမာသီအဝဵုကဵု ဂကောံဇြဟတ်ပၠန်ဂတးတံ အလုံမွဲဍုၚ် ပ္ဍဲဂိတုဂျောန် လောန်ကၠုၚ်တေံဂှ် နူလပါ်ဒပ်ပၞာန်ဗမာကောန်ပၞာန် ၆၄၄ တၠ ချိုတ်အာတုဲ ၂၀၉ တၠ ဒးအာလဝ်ဝပ်နွံရဂှ် NUG လလောၚ်တြးပတိတ်လဝ်ရ။
ဒပ်ပၞာန်ဗမာသီအဝဵုတံ စကာဇြဟတ်ယိုက်ဝန်ပၞာန် ကၠောန်ဒၟံၚ်ပရေၚ်ထပက်ပၞာန်ဗလးတိ ဇၞော်ကဵုဇြဟတ်တုဲ မွဲလပါ်ပၠန်ဂှ်လေဝ် နူဗလးကျာဆက်ပန်ဗတိုက်မံၚ် ဌာန်ဒၞာဲကွာန် ညးဍုၚ်ကွာန်တံဂှ် ဂၠိုၚ်တိုန်မံၚ်ရ။
ပရိုၚ် – သြၚ်လောန်တိုၚ်မ်
Photo – Social Media