တိုကျို၊ အဝ်ဂတ် ၂၁
ပ္ဍဲဍုၚ်ဂျပါန် ယၟုမြဟ်မံၚ် ဟိုတ်နူတင်စၟတ်ပရေၚ်ဂီုကၠီုဂၠံၚ်ကွဳပၟတ်ခိုဟ်လောန်တုဲ ပ္ဍဲဂိတုအဝ်ဂတ် ၂၀ ဏံ ဒးဒုၚ်ဇီုကဵုကွဳပၟတ်တုဲ မၞိဟ် ၄ တၠ ချိုတ်အာရဂှ် ညးတာလျိုၚ်တံ ဟီုရ။
ပ္ဍဲသၞေဟ်ကွဳပၟတ် ယှေန်-ကာနူမာ နွံလပါ်သၟဝ်ကျာ ဍုၚ်တိုကျိုဂှ် ပရေၚ်ဏံ က္တဵုဒှ်လဝ်တုဲ သၟာကမၠောန် ၄ တၠ ချိုတ်အာလဝ်ရဂှ် နူကဵုဌာနပလိုတ်ပၟတ် သ္ပလဝ်ဒတန်ရ။
အခိၚ်ဂကောံရီုဗၚ်ဟံၚ်ပြာ် ပရေၚ်ကာမံက်တိုန် စိုပ်ကၠုၚ်ဂှ် သၟာကမၠောန် ၃ တၠ မာတ်ဆိုအ်ဒၟံၚ် သၟဝ်ကွဳပၟတ်တုဲ မၞိဟ်မွဲတၠပၠန်ဂှ် နွံဒၟံၚ်လတူစင်္ကြံဂှ်ရောၚ် ညးတာလျိုၚ်မွဲတၠပၠန် ဟီုလဴကဵုရ။
ကိုပ်ကၠာဟွံဂွံပလံၚ်ဏာရုၚ်ဂဥုဲဏီဂှ် သီုသၟာကမၠောန် ၄ တၠ ဝိုတ်မံၚ်သတိအိုတ်ရောၚ် သ္ဂးရ။
ကွဳပၟတ် Spacia X နွံလတူဂၠံၚ်ကွဳပၟတ် တိုဗူနဳကို တုဲ ဒှ်ကွဳပၟတ်ဆက်စၠောံဂြိပ်မံၚ် အကြာဒေသမဟာတိုကျို ကေုာံ ဒေသနေတ်ကို ရဲအာတရဴဂၠးကဝ်တံ အာကၠုၚ်ဂၠိုၚ်ဂှ်ရောၚ် ဌာန်ပရိုၚ် Kyodo News ထမံက်ထ္ၜးလဝ်ရ။
ဂွံမိၚ်ကေတ်ရမျာၚ်ဗြုထတ်တ်မွဲတုဲ ကွဳပၟတ်ဆက်အာဟွံမာန် ညံၚ်ရဴဗရိက်ရပ် ဒေါအ်အာဂှ် ရဲအာတရဴမွဲတၠ အာယုက် ၄၀ သၞာံ ပါလုပ်ကၠုၚ် လ္တူပ္ဍဲကွဳပၟတ်ဂှ် ဟီုလဴကဵုလဝ် ဌာန်ပရိုၚ် NHK ရ။
သွက်သ္ဂောံဂၠိုက်ဂၠာဲ ဒၞာဲရမျာၚ်ဗြုတိတ်ကၠုၚ်ဂှ် ဒးဒေါအ်ကွဳပၟတ်ရောၚ် လလောၚ်တြးတိတ်ကၠုၚ်တုဲ ပ္ဍဲအခိၚ်မွဲခဏဍောတ်ဓဝ် ရဲအာတရဴတံ တိတ်နူကွဳပၟတ်ဟွံဂွံဒှ်ဒၟံၚ်ရဂှ် ဒုၚ်သ္ဇိုၚ်ကဵုရဲအာတရဴဂှ်တုဲ ဌာန်ပရိုၚ် NHK ထမံက်ထ္ၜးလဝ်ရ။
အခိၚ်ဒေသနူဂယး ၁၀ နာဍဳ ၄၇ မိနေတ်ဂှ် ကော်လဝ် ဌာနရီုဗၚ်ဟံၚ်ပြာ်ကာမံက်တိုန် အလန်ပထမကၠာအိုတ်ရောၚ် ဂွံတီရ။
အခိၚ်သၟာကမၠောန်တံဏံ သ္အးဇ္ၚးမံၚ်အိက်ၚာ် နွံလ္တူဂၠံၚ်ကွဳပၟတ်ဂှ် ဒးဒုၚ်ဇီုလဝ်ကဵုကွဳပၟတ်ရောၚ် ဌာန်ပရိုၚ် Nippon TV ထမံက်ထ္ၜး ချူလဝ်ရ။
ဂၠံၚ်ကွဳပၟတ်ဂျပါန်တံဂှ် အပ္ဍဲဂၠးတိဏံ ဒှ်ဂၠံၚ်ကွဳပၟတ်ပါလုပ်ပ္ဍဲစရၚ် ဘဲအန္တရာဲအောန်အိုတ်မွဲ မဒှ်ရ။
ဟိုတ်နူကွဳပၟတ်ဇီုညးသ္ကံ ဟွံသေၚ်မ္ဂး ဂၠံၚ်ကွဳကလိတ်တုဲ မၞိဟ်ချိုတ်ဂှ် အောန်လောန်တုဲ ဟိုတ်နူပရေၚ်မၚ်မွဲပလေဝ်ပလေတ်စလဝ် ပရေၚ်ခန်လ္ၚတ် ကေုာံ ပွမစုတ်လဝ်နဲကဲပညာအဆံၚ်သၠုၚ်တံတုဲ နူကဵုဘဲအန္တရာဲ ပရေၚ်ဂီုကၠီုနွံဒၟံၚ် မဒှ်ရ။
ပ္ဍဲဂျပါန် ပရေၚ်ကွဳပၟတ်ဟွံထေၚ်ခယျ မၞိဟ်ချိုတ်ဂၠိုၚ်အိုတ်ဂှ် က္တဵုဒှ်လဝ်ပ္ဍဲဂိတုအေပြဳ ၂၀၀၅ တေံတုဲ အခိၚ်မၞိဟ်အာကၠုၚ်ဂၠိုၚ်ဂှ် ကွဳပၟတ်ဖ္ဍိုက်မၞိဟ်မွဲ လုပ်ဇီုဒး စမြိုၚ်တိုက်မၞိဟ်မံၚ်မွဲ ပ္ဍဲဒေသ အမာဂါသာကဳ မဒှ်ရ။
အပ္ဍဲပရေၚ်ဒှ်စိုတ်ဟွံခိုဟ် က္တဵုဒှ်လဝ်ပ္ဍဲဒေသဟိုဂို လပါ်ပလိုတ်ဍုၚ်ဂျပါန်ဂှ် မၞိဟ် ၁၀၇ တၠ ချိုတ်အာလဝ်တုဲ ၅၀၀ ပြၚ် ဒးဝပ်လဝ်ရ။
ပ္ဍဲပရေၚ်က္တဵုဒှ်လဝ်မွဲပၠန် ပ္ဍဲသၞာံ ၁၉၆၃ တေံဂှ် ကွဳပၟတ်ဖ္ဍိုက်ကပေါတ်မွဲမကလိတ်တိတ်နူဂၠံၚ် ကေုာံ ကွဳပၟတ်ဖ္ဍိုက်မၞိဟ်တံ ၜါမ ပါလုပ်တုဲ မၞိဟ် ၁၆၁ တၠ ချိုတ်အာလဝ်ရ။
ဆဂး ညံၚ်ဂွံယၟုမြဟ်အာဂှ် နူကဵုကွဳပၟတ်မကမ် ယှေန်ကာန်သာန် ဍုၚ်ဂျပါန် စကၠောန်နူသၞာံ ၁၉၆၄ တေံတုဲ ဗွဲကြဴဂှ် ဟိုတ်နူကွဳပၟတ်ကလိတ်တိတ်နူဂၠံၚ် ကေုာံ ဇီုညးသ္ကံတုဲ ရဲအာတရဴချိုတ်လဝ်ဂှ် မွဲလှ်ေမှလေဝ် ဟွံကေၚ်က္တဵုဒှ်လဝ်ဏီပုဟ်။
Source: AFP