ဗာဗံက်အာ၊ အဝ်ဂတ် ၂၂
ပ္ဍဲကွာန်ဍောတ်တ်မွဲ နွံလပါ်ပလိုတ် ရးနိဂီုဗဟဵုအာဖရိကဂှ် ဟိုတ်နူပရေၚ်တိလာ်သရိုဟ်စှ်ေလဝ်ဇၞော်ဇၞော်တုဲ မါၚ်က္တိုၚ်ထဝ် ၜံက်ခါဲဒၟံၚ်နဲကဲတြေံမွဲ တိဗၠိုက်စှ်ေဂှ်အာ မၞိဟ် ၁၀၀ ပြၚ် ချိုတ်အာလဝ်နွံမံၚ် ပ္ဍဲအဝ်ဂတ် ၂၀ ဂှ် ညးတာလျိုၚ်ဒေသတံ ကဵု ရဲရီုဗၚ်ဟံၚ်ပြာ်တံ ဟီုလဴရ။
ပ္ဍဲကွာန်ဇာမ်ဗဵုအဳ သ္ၚောဲခြာၜိုတ် ၃၁ တိုၚ် နူကဵုဍုၚ်ဗာဗံက်အာ ဗဒါဲပယျဵုရးနိဂီုကၚ်မရန်ဂှ် ပရေၚ်တိလာ်သရိုဟ်ဇၞော်ဇၞော် က္တဵုဒှ်လဝ် အဝ်ဂတ် ၁၉ အခိၚ်သဝ်တ္ၚဲ မဒှ်ရ။
ပ္ဍဲရုပ်ရမျှာၚ် ပြးဇးဒၟံၚ်လတူဇာဖိုၚ်မှာဇန်တံမ္ဂး ဂွံဆဵုညာတ်အာ တိဂြောပ်အုပ်လဝ်လတူမၞိဟ်တံ ခယျစလဝ် ရဲသၟာကမၠောန်က္တိုၚ်မါၚ်တံရ။
မၞိဟ်ဒးမာတ်ဆိုအ်ဒၟံၚ် သၟဝ်တိနွံမံၚ်ဗွဲမဂၠိုၚ်ဏီ ပ္ဍဲလိက်လလောၚ်တြး ရုၚ်ဂဥုပ်သၟာဥပဒေဒေသဂှ် ထမံက်ထ္ၜးလဝ်ရ။
နူဒၞာဲမါၚ်က္တိုၚ်ထဝ် တိလာ်သရိုဟ်စှ်ေအာလဝ်ဂှ် ဟံၚ်ပြာ်ဂွံလဝ် ဇွမၞိဟ် ၁၀၀ ပြၚ်နွံဂှ် ဂကောံရီုဗၚ်ဟံၚ်ပြာ်တံ ဟီုလဴကဵု သၟာပရိုၚ်တံ ပ္ဍဲအဝ်ဂတ် ၂၀ ဂှ်ရ။
ညးတာလျိုၚ်အဆံၚ်သၠုၚ် နူဂကောံကမၠောန်က္တိုၚ်မါၚ်ဒေသမွဲတၠ သ္ပလဝ်ဒတန် ဂွံဆဵုလဝ်ဇွ ၁၀၀ ပြၚ်နွံရောၚ်။
အခိၚ်သၟာကမၠောန်က္တိုၚ်မါၚ်တံ ကၠောန်မံၚ်ကမၠောန်ဂှ် ဟိုတ်နူထီုသၟဝ်တိတံ လာ်သရိုဟ်စှ်ေတုဲ မါၚ်က္တိုၚ်ထဝ် တိထောၚ်လုပ်စှ်ေအာ ဗီုပြၚ်ဂှ်ဒှ်မာန်ရောၚ်ဂှ် ညးတာလျိုၚ် နူရုၚ်သၟာဥပဒေသ္ပသၞောဝ်ဒေသမွဲတၠ ဟီုလဴရ။
ပ္ဍဲကဵုမါၚ်က္တိုၚ်ထဝ်ဏံ ကောန်ဍုၚ်ဗဟဵုအာဖရိကလဒေါဝ်တံကဵု ကောန်ဍုၚ်ကၚ်မရန်တံ ကၠောန်မံၚ်ကမၠောန်ရ။
ဟိုတ်နူက္တိုၚ်မါၚ်လာ်သရိုဟ်စှ်ေတံတုဲ အပ္ဍဲကဵုညးချိုတ်အာဂှ် ကောန်ဍုၚ်ကၚ်မရန်တံ ပါလုပ်မံၚ် ဟွံအောန်နူ ၃ တၠနွံရောၚ် ညးတာလျိုၚ်ဒေသ နွံလပါ်ဗမံက် ရးနိဂီုကၚ်မရန်တံ ဟီုရ။
အပ္ဍဲက္တိုၚ်မါၚ် ဗၠိုက်စှ်ေအာလဝ်သၟဝ်တိဂှ် ယဝ်ရဂွံဆဵု သၟာကမၠောန်ဂျိုၚ်ၚ်နွံမ္ဂး ဒှ်အရာတၟေၚ်တၟဟ်ဇၞော်ဇၞော်မွဲသာ်ရောၚ်ဂှ် ရဲရီုဗၚ်ဟံၚ်ပြာ်တံ သ္ဂးရ။
လတူက္တိုၚ်မါၚ် ၜံက်ခါဲနကဵုတဲ စက်အဇာဇၞော်ဇၞော်ဟွံမွဲတံဂှ် စၟတ်စွံလဝ် ပရေၚ်ဟွံလုပ်သၞောဝ်ကီုလေဝ် ဒၞာဲဒေသနာနာဟွံတုပ်သၟဟ်ညးသ္ကံ ပ္ဍဲတိုက်အာဖရိကတံဂှ် ဂွံဆဵုညာတ်ဒၟံၚ် ဗွဲမဂၠိုၚ်ရ။
ဟိုတ်နူမၞိဟ်တံ ကမၠောန်ဟွံမွဲအိုတ်တုဲ ညးစကာဍာ်ဓတ်ကာယမာန်တံ ကၠုၚ်ၜံက်ခါဲမံၚ်က္တိုၚ်မါၚ် ပ္ဍဲက္တိုၚ်မါၚ်တြေံတံ မဒှ်ရ။
ပ္ဍဲက္တိုၚ်မါၚ်ဗီုဗီုတံဏံမ္ဂး ပွမမၚ်မွဲဒဂေတ်ဗက်သၞောတ်ဝ် အောန်လောန်တုဲ ပရေၚ်က္တိုၚ်မါၚ်လာ်သရိုဟ်စှ်ေတံ က္တဵုဒှ်ဒၟံၚ် မွဲဏှမွဲဏှကီုရ။
Ref:TheGuardian