ဘာအၚ်၊ အဝ်ဂတ် ၂၂
အပ္ဍဲတွဵုရးကရေၚ် ဍုၚ်ဘာအၚ်ကီု သီုကဵုဍုၚ်လ္ၚဵုလ္ၚဵုတံဂှ် ဟိုတ်နူဗြဲဇၞော်ဂူ ဍာ်ဒဵုလဵုစှ်ေကၠုၚ်ဂှ်ရ ပရေၚ်ဍာ်ဇၞော်က္တဵုဒှ်မံၚ်တုဲ မၞိဟ်အောန်အိုတ် ၂၀၀၀ ပြၚ် ဒးပြံၚ်ဆုဲလဝ် ပရေၚ်ကာမံက်တိုန်ရဂှ် ညးဒေသတံကဵု ဂကောံရီုဗၚ်ဟံၚ်ပြာ်မၞိဟ်တံ ဟီုလဴတုဲ ဂွံတီရ။
အပ္ဍဲဍုၚ်ဘာအၚ် တွဵုရးကရေၚ်ဂှ် ဍာ်ၜဳသြၚ်လောန် စိုပ်ဒၟံၚ်ဒၞာဲစၟတ်ဒွိၚ်ဍာ်ဍုၚ်ဂှ်တုဲ၊ အကြာ ၁ တ္ၚဲ ဂတဏံမ္ဂး ဍာ်သၠုၚ်တိုန် ၜိုတ် ၁ ပေမာန်တုဲ ဆက်နွံအာမံၚ်လတူတင်စၟတ်ဒွိၚ်ဍာ်ဍုၚ်ဂှ်ရ ညးမံၚ်ဗဒါဲဇိုၚ်ပြၚ်ၜဳတံကဵု ဒၞာဲတိသဝ်ဝ်တံ ညံၚ်ဂွံပါဲဓလေတ်အာလဝ်ဒၞာဲဗၠးဘဲဍာ်တံညိဂှ် နူကဵုဌာနပရေၚ်ဗြဲကျာ ကဵုလဝ်သတိနွံရ။
ပ္ဍဲပွိုၚ်ဍုၚ်ဗြဝတဳ ပယျဵုသေံ-ဗၟာလေဝ် ဍာ်ၜဳသံၚ်ရေၚ် သၠုၚ်တိုန်ကၠုၚ်ဒၟံၚ်တုဲ ပ္ဍဲဒၞာဲတိသဝ်ဝ် ဍုၚ်ဗြဝတဳကဵု မွဲဒမြိပ်ဇိုၚ်ၜဳသံၚ်ရေၚ်တံဂှ် ဍာ်လုပ်စိုပ်မံၚ်တုဲ လတူဍုၚ်ဗြဝတဳဂှ် မၞိဟ်အောန်အိုတ် ၜိုတ် ၅၀၀ တံဂှ် ပြံၚ်ဆုဲစိုပ်ကၠုၚ် ဗ္ဒိုပ်ရီုဗၚ် ဟံၚ်ပြာ်ဘဲဍာ်တံရ။
အပ္ဍဲဍုၚ်ဗြဝတဳ အကြာ ၁ တ္ၚဲဂတဏံမ္ဂး ဍာ်ၜဳသံၚ်ရေၚ် သၠုၚ်တိုန်အာ ၅ ပေပြၚ်မာန်ရောၚ်ဂှ် နူကဵုဌာနစၞောန်ပရေၚ်ဗြဲကျာ ဇလဗေဒ တော်ရန် လလောၚ်တြးလဝ်အကာဲအရာ ပ္ဍဲဂိတုအဝ်ဂတ် ၂၁ ဂှ်ရ။
တုဲပၠန် ဟိုတ်နူဗြဲဂူ ဍာ်ဒဵုဇွောဝ်စှ်ေကၠုၚ်တုဲ ဍာ်ၜဳလှိုၚ်ဗၠဲ၊ ဍာ်ၜဳဟံၚ်တရဝ်၊ ဍာ်ၜဳဂြာၚ်၊ ဍာ်ၜဳဟမိတ်တံ တိုန်ကၠုၚ်တုဲ၊ ပ္ဍဲဒၞာဲတိသဝ်ဝ် ဍုၚ်လှိုၚ်ဗၠဲ၊ ဍုၚ်ကအ်ကြိက်၊ ဍုၚ်ကြုၚ်ဒဵု၊ ဍုၚ်လှာဒကှ်၊ ဍုၚ်ကျာ်ဍုၚ်တံဂှ် ပရေၚ်ဍာ်ဇၞော်က္တဵုဒှ်မံၚ် ကုညးဒးဒဒိုက်ဘဲဍာ်တံဂှ် နူဂကောံရီုဗၚ်ဟံၚ်ပြာ်မှာဇန်ကဵု ဒပ်ပလိုတ်ပၟတ်တံဗိုၚ်ပြံၚ်ဆုဲတုဲ ရီုဗၚ်ကဵုဒၟံၚ်ရ။
အပ္ဍဲဍုၚ်လှိုၚ်ဗၠဲဂှ် အခိၚ်လၟုဟ် ဍာ်ဇၞော်တိုန်ကၠုၚ်ပြဟ်ဒၟံၚ်တုဲ ညးမံၚ်လတူဍုၚ်ဒၞာဲဘဲဍာ် က္တဵုဒှ်မာန်ဂှ်တံ ညံၚ်ဂွံမံၚ်ကဵုသတိအိုတ်ညိ၊ ယဝ်ရဍာ်ဇၞော်တိုန်ပြဟ်ဟ်မ္ဂး ဗွဲမဂတာပ်အခိၚ် ညံၚ်သ္ဂောံပြံၚ်ဆုဲအာဒၞာဲဂီုကၠီုတံကီု ကပေါတ်နွံပၟိက်တံကီု ညံၚ်ဂွံဒစးဒုၚ်ပကောံပလေဝ်စွံလဝ်ဂှ်လေဝ် နူဂကောံရီုဗၚ်ဟံၚ်ပြာ်မှာဇန် လှိုၚ်ဗၠဲ လလောၚ်တြး ကဵုလဝ်သမ္တီရ။
လတူဍုၚ်ကအ်ကြိက် ဗြဲဂူဇၞော် ဍာ်ဒဵုဆၚ်စှ်ေကၠုၚ်တုဲ ပ္ဍဲဂိတုအဝ်ဂတ် ၂၀ ဂှ် ဍာ်လုပ်စိုပ်ကၠုၚ် ပ္ဍဲအရာပ်တိသဝ်ဝ်တံတုဲ ဒးကၟာတ်လဝ်ဘာဗတောန်လိက် ၆ ဘာ မွဲချိုတ်ခဏရောၚ် ညးဍုၚ်ကအ်ကြိက် မွဲတၠ ဟီုတုဲ ဂွံတီရ။
အခိၚ်ညးဍုၚ်ကွာန်တံ ဒးဆဵုဂဗမံၚ်ကဵု ပရေၚ်အခက်အခုဲ ၚုဟ်မးကပေါတ်စၞစသုၚ်သ္ၚိဌာန်တံသၠုၚ်တိုန်မံၚ်ဏံ လၟုဟ်ဏံပၠန် ဒးဒုၚ်ဘဲဍာ်ဇၞော်တုဲ သွက်ရဲသ္ၚိဌာန်ဍာ်ဗၠိုက်မံၚ်တံ ပရေၚ်မံၚ်စံၚ်ညးတံအခက်အခုဲပဵုတိုန်အာရဂှ် ညးဒးဒဒိုက်ဘဲဍာ်တံ ဟီုလဴမံၚ်အိုတ်ရ။
အတိုၚ်ဌာနစၞောန်ပ္ညုၚ် ပရေၚ်ဗြဲကျာဇလဗေဒ လလောၚ်ပတိတ်လဝ်ဂှ်မ္ဂး အကြာဂိတုအဝ်ဂတ် ၂၁ စဵုကဵု ၂၅ ဂှ် ပ္ဍဲဒေသလပါ်သၠုၚ်ကျာဍုၚ်ဗၟာ တွဵုရးကရေၚ်၊ တွဵုရးမန်ကေုာံ ရးတၞၚ်သဳတံ ပ္ဍဲကဵုဇၟာပ်ဒေသ ဗြဲဇၞော်ဂူမာန်ရောၚ် ကဵုလဝ်သတိရ။
ပရိုၚ်- သြၚ်လောန်တိုၚ်မ်
Photo – CJ