သွက်သ္ဂောံဓလိုက်တမ်ရိုဟ် ပ္ဍဲဇြုၚ်ပရေၚ်ပိုန်ဒြပ်တၟေၚ်ထဝါဲ ဥူမေန်အံၚ်လှိုၚ်ကော်ဘိက် သၟာဗၞိက် ဗာလာရုသ်

မေအ်၊ အဝ်ဂတ် ၂၂

သၟာဗၞိက်တၠပရေၚ်ပိုန်ဒြပ် နူဗာလာရုသ်တံ ပ္ဍဲကဵုဇြုၚ်ပရေၚ်ပိုန်ဒြပ်တၟေၚ်ထဝါဲ ပရေၚ်ကဏ္ဍနာနာ အကြာဍုၚ်ဗၟာကဵု ရတ်ယှာတံ စပ္တံပံၚ်တောဲရေၚ်တၠုၚ်မံၚ်တံဂှ် ကၠုၚ်လုပ်ဓလိုက်တမ်ရိုဟ် ပရေၚ်ပိုန်ဒြပ်ညိဂှ် သမ္မတ ဥူမေန်အံၚ်လှိုၚ် ကော်ဘိက်လဝ်ရ။

သမ္မတသီအဝဵု ဇကုညးခါန်ကၞက်လဝ်ကေတ်တ် ဥူမေန်အံၚ်လှိုၚ် အာတရဴဍုၚ်ရတ်ယှာတုဲ ဗွဲကြဴ စိုပ်အာဍုၚ်မေအ် ရးနိဂီု ဗာလာရုသ်တုဲ ဟီုတွံလဝ် ပ္ဍဲကဵုဝှဝ်ရာမ် ပရေၚ်ပိုန်ဒြပ် ဗၟာ-ဗာလာရုသ် ကၠောန်ဗဒှ်လဝ် ပ္ဍဲဂိတုအဝ်ဂတ် ၂၀ ဂှ်ရောၚ်။

အပ္ဍဲကဵု ဝှဝ်ရာမ်ပရေၚ်ပိုန်ဒြပ်ဂှ်မ္ဂး ကရောံသမ္မတ ခါန်ကၞက်လဝ် ကေတ်တ်ဂှ် သီုသ္ကိုပ်ဝန်ဇၞော် ရးနိဂီု ဗာလာရုသ်၊ အမာတ်ကလုတ်ဇၞော် ဆေၚ်စပ်ၜါဍုၚ်၊ ဝန်ဇၞော်ကၟိန်ဍုၚ် အလဵုအသဳပၞာန်၊ သၟာဗၞိက်ၜါဍုၚ်၊ နာယက ကေုာံ ကောန်ဂကောံ UMFCCI ဍုၚ်ဗၟာတံလေဝ် တိုန်စိုပ်လဝ်အိုတ်ရ။

ပရေၚ်ဆက်ဆောံၜါဍုၚ်ဂှ် စိုပ်ကၠုၚ် “အဆံၚ်ကြပ်အိုတ်” ကေုာံ “အဆံၚ်သၠုၚ်အိုတ်”ယျ ရောၚ် ဥူမေန်အံၚ်လှိုၚ် ဟီုဏာတုဲ၊ နူကဵုရးနိဂီုဗာလာရုသ်ဂှ် ဆၜိုဟ်ဒှ် ဍုၚ်မိတ်သဟာဲပံၚ်တောဲကဵု ဍုၚ်ဗၟာသၟးဟွံက ပ္ဍဲမုက်စၚ်ဂၠးကဝ်တံလေဝ် ပ္ဍဲကာလတၚ်ကော်ဆောနွံမံၚ်တံဂှ် ဗိုၚ်ဒတူလိုၚ်တုဲ ဗိုၚ်ထံက်ပၚ်ရီုဗၚ်ကဵုလဝ်ဂှ် တၚ်ဏာဂုဏ် ဗွဲမလောန်ရောၚ် ဟီုလဝ်ရ။

အနာဂတ်ဂတတေံလေဝ် သွက်သ္ဂောံသၠုၚ်ပတိုန် ညံၚ်ဂွံတောတက်အာနူကဵုလၟုဟ်ဏံဂှ် နူလပါ်ပိုဲတံဖျေံလဝ်သန္နိဋ္ဌာန် ခိုၚ်ၚ်ဗိုန်န်နွံတုဲ ပရေၚ်ပံၚ်တောဲပိုန်ဒြပ်တံဂှ် ဒးထမံက်ရုပ်ရဴ သၠုၚ်ပတိုန်အာ နကဵုဗီုပြၚ်မဟာဗျူဟာစှ်ေစှ်ေ စိုပ်ကၠုၚ်မံၚ်အခိၚ်ယျ ရောၚ် သ္ဂးရ။

ဟိုတ်ဂှ်ရ သွက်သ္ဂောံကၠောန်ၜိုတ်အာ ပ္ဍဲဇြုၚ်ပရေၚ်ပိုန်ဒြပ်တၟေၚ် ထဝါဲ မပ္တံကဵုကမၠောန်ကွတ်စက်အဇာဇၞော် ရးနိဂီုဗာလာရုသ်တံ ပရေၚ်ကၠောန်ပတိတ်တာယာကေုာံ ကပေါတ်စက်အဇာဇၞော်တံကီု သီုကဵုပရေၚ်ပတိတ် ကၠောန်ကွဳစက်ဖ္ဍိုက်ကပေါတ်အဇာဇၞော်ဇၞော်တံညိဂှ် ညးကော်ဘိက်ဏာလဝ်ရောၚ်။

အပ္ဍဲကဵုရးတၞၚ်သဳ သွက်သ္ဂောံကၠောန်အာကမၠောန် ၜံက်ခါဲတောမ်သ္အးသတ္တုတံဂှ်လေဝ် ကော်ဘိက်ဏာလဝ်တုဲ ပါဲနူဂှ်ပၠန် ပ္ဍဲဒေသဏံမ္ဂး ဟိုတ်နူဗွိုၚ်တမ်ရိုဟ် ပရေၚ်ကမၠောန်ဗွဲမဒးရးနွံတုဲ သွက်ကမၠောန် ပလံၚ်ကၟုဲအာတရဴတံမ္ဂး ကၠောန်အာကမၠောန်ဟဝ်တေဝ်ကဵု ကမၠောန်အာတရဴတံမာန်ရောၚ်ဂှ် ဟီုလဴဏာရ။

တုဲပၠန် ဇြုၚ်ပရေၚ်ပိုန်ဒြပ်တၟေၚ်တဳလဝါ ပ္ဍဲလ္ဂုၚ်ဂှ် အခိၚ်ဆက်စၠောံ ချိက်ကၠောန်အာကဵုဂၠးကဝ်မ္ဂး ဟိုတ်နူနွံမံၚ်အခေါၚ်အရာလပါ်ခိုဟ် ပရေၚ်ပလံၚ်ဗ္စိုပ်ကဵု စမြိုၚ်ဒၞာဲသ္ဇိုၚ်တံလေဝ် ဍိုက်ပေၚ်မံၚ်တုဲ သွက်သ္ဂောံကၠောန်ၜတ်ရေၚ်တၠုၚ်အာ ပရေၚ်ကမၠောန်ပတိတ်ကပေါတ် ပလံၚ်ဗစိုပ်နာနာသာ်တံဂှ် ဒှ်အရာပရေၚ်ရုဲစှ် ဒၞာဲခိုဟ်အိုတ်မွဲရောၚ် သ္ဂးရ။

သွက်သ္ဂောံထ္ပက်လိက်ကသုက် ပရေၚ်တၚ်တုပ်စိုတ် စပ်ကဵုအရာသၠုၚ်ပတိုန် ပရေၚ်ဓလိုက်တမ်ရိုဟ်ကမၠောန် ကေုာံ ပရေၚ်စဵုဒၞာမၚ်မွဲအာဂတးဂတန် အကြာဍုၚ်ဗၟာကဵု ဗာလာရုသ်တံ ညံၚ်ဂွံချုက်လိက်ပြဟ်ဟ်မာန်ဂှ် ကၠောန်မံၚ်တုဲ၊ သွက်သ္ဂောံသၠုၚ်ပတိုန်ပရေၚ်ပံၚ်တောဲ အကြာၜါဍုၚ် ဗီုတိထ္ၜးဂၠံၚ် (၂၀၂၆-၂၀၂၈) ဂှ်လေဝ် ချူဓဇက်သ္ပဒတန်တုဲ ထ္ပက်လဝ်စၟတ်တဲတုဲယျဂှ် ကဵုလဝ်သမ္တီရ။

အပ္ဍဲဗီုတိထ္ၜးဂၠံၚ်ဏံမ္ဂး ပါမံၚ် သီုကဵုအစဳဇန် သွက်သ္ဂောံသၠုၚ်ပတိုန် ပရေၚ်ဓလိုက်တမ်ရိုဟ်၊ ပရေၚ်ကူသာန်ဗၞိက်၊ အစဳဇန်သၠောတ် ပရေၚ်ပံၚ်တောဲပိုန်ဒြပ်တံနွံတုဲ သွက်သ္ဂောံပံၚ်တောဲကၠောန်အာ ပရေၚ်ကဏ္ဍစုၚ်ၚ် စပ်ကဵုကွတ်စက်၊ တဵုလွဳ၊ ထတ်ယုက်၊ ကမၠောန်ဗာန်၊ ပရေၚ်ပညာကေုာံ ကမၠောန်အာတရဴတံလေဝ် ပါလုပ်မံၚ်ရ။

တုဲပၠန် သွက်သ္ဂောံဓလိုက်စုတ်တမ်ရိုဟ် ပ္ဍဲကဵုကိုန်အစဳဇန် ပရေၚ်ပိုန်ဒြပ် စပ်ကဵု ရုၚ်ဒေပ်စွံခြိုၚ်ကပေါတ် နဲဂတာပ်ခေတ်၊ ရုၚ်ခြိုၚ်ကပေါတ်ကဠာဟဂံက်၊ စမြိုၚ်ဒၞာဲသ္ဇိုၚ် ပလံၚ်ဗ္စိုပ် ကပေါတ်ဗၞိက်ကေုာံ ကမၠောန်ထံက်ပလံၚ်ဗ္စိုပ်တံဂှ်လေဝ် ဥူမေန်အံၚ်လှိုၚ် ကော်ဘိက်လဝ်ရောၚ်။

သွက်သ္ဂောံပတိတ်ဓါတ်လလဳ အပ္ဍဲဍုၚ်ရုံရုံဂပ်ပ်မာန်ဂှ် နူကဵုအလဵုအသဳကော်ဘိက်မံၚ် ပရေၚ်ဓလိုက်တမ်ရိုဟ်တံနွံတုဲ ဗွဲတၟေၚ် ပ္ဍဲကဵုကမၠောန်ပတိတ်ဓါတ်လလဳ စပ်ကဵုဓာတ်လလဳဍာ်၊ ဓာတ်လလဳလျးတ္ၚဲ၊ ဓာတ်လလဳကျာ၊ ပရေၚ်ပတိတ် ဓာတ်လလဳဇဳဝတံ ကၠုၚ်ဓလိုက်တမ်ရိုဟ်အိုတ်ညိဂှ် ဟီုဏာရ။

တုဲပၠန် သွက်ရဲစိုတ်လုပ်စ ပရေၚ်ဖန်ဗဒှ်တၟိတၟိတံ စပ်ကဵုနဲကဲပညာ ဆက်စၠောံ၊ ပွမစကာ AI၊ ကမၠောန်ရေၚ်တၠုၚ် ဒဳဂျေတ်တေလ် ပ္ဍဲကဵုဍုၚ်သိုက်ဖာ ယျတနာပုၚ်ဂှ်လေဝ် ကော်ဘိက်လဝ် ညးစိုတ်လုပ်စကဵု ပရေၚ်ဓလိုက်တမ်ရိုဟ် နူရးနိဂီုဗာလာရုသ် တံကီုရ။

ပ္ဍဲကဵုဍုၚ်ဗၟာ သွက်သၟာဗၞိက်ရဲဓလိုက်တမ်ရိုဟ် ဗာလာရုသ်တံ ဂွံစဗဂေတ်ဖန်ဖက်ရေၚ်တၠုၚ်အာ ပရေၚ်ကမၠောန်နာနာသာ်တံ ပြေပြေပြံၚ်ပြံၚ်မာန်ဂှ် နူကဵုအလဵုအသဳညးတံၜိုတ်သ္ပမာန် ဗိုၚ်ထံက်ပၚ်ရီုဗၚ်ကဵုအာဂှ်လေဝ် ဥူမေန်အံၚ်လှိုၚ် ဟီုလဝ် ပ္ဍဲဝှဝ်ရာမ်ပရေၚ်ပိုန်ဒြပ်ဂှ်ရောၚ်။

သမ္မတဗာလာရုသ် လူကာယှာန်ကိုဝ်ကဵု ဥူမေန်အံၚ်လှိုၚ်တံ ပ္ဍဲကဵုပေါဲဆဵုဂဗဗီုပြၚ်တၞဟ်ခြာ ဂိတုအဝ်ဂတ် ၂၀ အခိၚ်သဝ်တ္ၚဲ ဂှ်လေဝ် သဳကၠဳလဝ်သွက်သ္ဂောံသၠုၚ်ပတိုန်အာ ပရေၚ်ပံၚ်တောဲဂုဏ်ဖိုလ်သွက်ၜါဍုၚ် ပ္ဍဲကဏ္ဍစုၚ်ၚ် သီုကဵုကဏ္ဍပရေၚ်ပိုန်ဒြပ်၊ ပရေၚ်ဂီုကၠီု ကေုာံ ပရေၚ်မၞိဟ်တံကီုရောၚ်။

စပ်ကဵုပရေၚ်ပၞာန်ကိစ္စဇၞော်ဇၞော် သွက်ဒပ်ပၞာန်ဗမာတံဂှ် အလဵုအသဳဗာလာရုသ် ပံၚ်တောဲကၠောန်လဝ်နွံမံၚ်တုဲ သွက်သ္ဂောံသၠောဲပြံၚ်သွံကဵုဏာ နဲကဲကွတ်ပညာပၞာန်အဆံၚ်သၠုၚ်ၚ် သၞောတ်စဵုဒၞာဗလးကျာကေုာံ သၞောတ်ကမ်သၠောဝ် ဒုၚ်သ္ဇိုၚ်ဗလးတိတံနွံမံၚ်ရောၚ် နူကဵု Justice For Myanmar သ္ပလဝ်ဒတန် မဒှ်ရ။

ပရိုၚ် – သြၚ်လောန်တိုၚ်မ်

Photo – MOI