မတ်မလီု၊ ဂိတုအဝ်ဂတ် ၂၄
အပ္ဍဲတွဵုရးမန် စနူကဵုဌာနသၟဝ်တဲအလဵုအသဳပၞာန် ပြံၚ်လဝ်ဗီုပြၚ်တံကီု ကိုန်အစဳဇန် တဵုတၞံဗြာတ်ဂးတုဲ ပ္ဍဲကဵုဘာဗတောန်လိက် ပရေၚ်ပညာ သ္ဇိုၚ်တံလေဝ် ဒးတဵုမံၚ်တၞံဗြာတ်ရဂှ် ညးကြပ်ကဵုဌာနနာနာတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ၊ ။
ပရေၚ်ပေါဲတဵုတၞံဗြာတ်တံဂှ် ကမ္မတဳပရေၚ်အုပ်ဓုပ်ပွိုၚ်ဍုၚ် အလဵုအသဳပၞာန်တံက္ဍိုက်ပ်တုဲ ပံၚ်တောဲကုဌာနအဆံၚ်ပွိုၚ်ဍုၚ်တံကဵု ဌာနစၞောန်ပ္ညုၚ်ပရေၚ်ပညာသ္ဇိုၚ်တံတုဲ စတဵုမံၚ်စနူဂိတုအဝ်ဂတ် ၂၂ ဏံရောၚ်။
ပွမကၠောန်ပေါဲတဵုတၞံဗြာတ်ဗီုဏံဂှ် နကဵုစၞောန်ပ္ညုၚ် သမ္မတသီအဝဵု ဥူမေန်အံၚ်လှိုၚ်ဂးတုဲ ပ္ဍဲဘာဗတောန်လိက်ပရေၚ်ပညာသ္ဇိုၚ်တံဂှ် သွက်သ္ဂောံဗ္စကဵုအာဟာရကုကွးဘာတံ ဍိုက်ဍိုက်ပေၚ်ပေၚ် ရန်လဝ်ရောၚ် သ္ဂးရ။
အခိၚ်တဵုတၞံဗြာတ်ဂှ် ရဲဌာနသၟဝ်အလဵုအသဳပၞာန်တံဂှ် တဵုထ္ၜးစ ဆၜိုတ်ထ္ၜးဗီုပြၚ်ဓဝ်တုဲ အဓိကဂှ်ညးတံစကာလဝ် ကွးဘာသၟတ်တံရောၚ် ရဲပွဳဗွိုၚ်အ္စာဘာတံ ဟီုရ။
ဒးတဵုမံၚ်တၞံဗြာတ် နကဵုကိုန်အစဳဇန်ဏံဂှ် သမ္မတသီအဝဵု ဥူမေန်အံၚ်လှိုၚ်ကဵု သ္ကိုပ်ဝန်ဇၞော်ရး၊ တွဵုရးတံကၠောန်လဝ်နူပေါဲဆဵုဂဗ ပ္ဍဲကဵုနေပျဳဒဝ် ဂိတုဂျောန် ၂၉ လောန်ကၠုၚ်တေံတုဲ ဟိုတ်နူကဵုလဝ်စၞောန်ပ္ညုၚ် မဒှ်ရ။
ပ္ဍဲပေါဲဆဵုဂဗ သမ္မတသီအဝဵုဟီုဏာ သွက်သ္ဂောံထမံက်အာရုပ်ရဴ ကိုန်အစဳဇန်ဗြတ်တေတ်ယှူ ကေုာံ ပရေၚ်ဝဳဂၠဴဍာ်တှ် ပ္ဍဲဘာဗတောန်လိက်ပရေၚ်ပညာသ္ဇိုၚ်တံတုဲ ကြဴနူဂှ်ဒးတဵုကၠုၚ်လဝ်တၞံဗြာတ်ဗီုဏံရောၚ် ဂွံတီရ။
အပ္ဍဲကဵုပေါဲတဵုတၞံဗြာတ်တံဂှ် ပါဲနူဗြတ်တေတ်ယှူ သမ္မတသီအဝဵုစကာကဵုတဵုလဝ်ဂှ်တုဲ ဂကူဗြာတ်တိတ်နူဒေသ ဗြာတ်ဗဳလာ၊ ဗြာတ်သၠတံဂှ်လေဝ် ဒးတဵုမံၚ်ကီုရောၚ် ညးကြပ်ကဵုဌာနဆေၚ်စပ်တံ ဟီုရ။
အပ္ဍဲတွဵုရးမန် လောန်ကၠုၚ် အပ္ဍဲဂိတုဂျူလာၚ်တေံလေဝ် ထ္ၜဟိုတ်ပေါဲတဵုတၞံဆုကသီု ပ္ဍဲဘာဗတောန်လိက်ပညာသ္ဇိုၚ်တံဂှ် စကာကွးဘာတံကဵုတဵုလဝ်တၞံဆုဂွံသၞိၚ်၊ တၞံဆုစသတ်ဆုတံတုဲ လၟုဟ်ဏံလေဝ် ဆက်စကာတဵုမံၚ် တၞံဗြာတ်တံပၠန်ရ။
ပရိုၚ် – သြၚ်လောန်တိုၚ်မ်
Photo – MOI