ဝါယှေန်တာန်၊ အဝ်ဂတ် ၂၄
ကြဴနူ ကေတ်ကၠုၚ်ပရေၚ်တၚ်တုပ်စိုတ် ပရေၚ်ကူသာန်ဗၞိက် အကြာရးနိဂီု မဟာမိတ်လံလၜါဍုၚ်တံ ကလိဂွံဟွံမာန်တုဲ လတူကပေါတ်ဗၞိက် နူကနေတာလ္ၚဵုတံမ္ဂး ပ္ဍဲဂိတုအဝ်ဂတ် ၂၂ ဂှ် အမေရိကာန် ဖျေံသ္ဂုတ်ကံက်အာ အကံက်ခေါန် ၅၀ က္ဍိုပ်ကၠံရ။
ပွမကၠောန်လဝ် ပေါဲသဳကၠဳလံကၠုၚ်ကဵုတ္ၚဲဗွဲမဂၠိုၚ်တံ ညံၚ်ဂၠံၚ်ဂွံကၠေံအာ ကၠောန်မံၚ်ဂးတုဲ အမေရိကာန် ကဵု ကနေတာတံ စောဲစပ်ဒၟံၚ်ညးသ္ကံ ဂတးဂတန်နွံရ။
ကြဴနူ ဍုၚ်မက်ကသဳကိုတုဲ ပယျာံသ္ဂာအခိၚ်ဗ္တံဒေသတုဲ လတူဍုၚ်မဟာမိတ်အမေရိကာန် ကူသာန်ဗၞိက်ဇၞော်အိုတ် ကပေါတ်ဗၞိက်ကနေတာ နွံၚုဟ်မး ၂၀ ဗဳလဳယာန်ဒဝ်လာတံဂှ် သွက်ဂွံကံက်အာ အကံက်ခေါန် ၅၀ က္ဍိုပ်ကၠံ လမျီုလုပ်ကၠုၚ်ယျ။
ဆဂး ဟိုတ်နူအကံက်ခေါန်တၟိတံတုဲ ပရေၚ်ကြံၚ်မ္ၚိုဟ် အကြာ သမ္မတဒဝ်နေဝ်ထရ ကဵု သ္ကိုပ်ဝန်ဇၞော် မက်ကာနေတံ ပဵုသၠုၚ်တိုန်အာတုဲ သွက်သ္ဂောံသဳကၠဳ ပရေၚ်ဂွံထပ်ဆက်အာအာယုက် တၚ်တုပ်စိုတ်ပရေၚ်ကူသာန်ဗၞိက်သၠးၜး အမေရိကာန်-မက်ကသဳကိုဝ်-ကနေတာတံဂှ် ပဵုတုဲ အခက်အခုဲက္တဵုဒှ်အာမာန်ရောၚ်။
ဒေါအ်ဇူလဝ် ပရေၚ်ပ္ညဳပ္ညပ်တံကၠာရောၚ်ဂှ် သ္ကိုပ်ဝန်ဇၞော် ကာနေ ဟီုတုဲ စပ်ကဵုအကံက်ခေါန်တၟိတံတုဲ နူကနေတာလေဝ် ကလေၚ်ပ္လန်အာ ဒဝ်လာကဵုဒဝ်လာကီုရောၚ် ညးဟီုရ။
သ္ပလဝ်ပရေၚ်သ္ဂုတ်သွာတ် ဒေါအ်ထောံပရေၚ်ပ္ညဳပ္ညပ်ကဵု အမေရိကာန်တံတုဲ၊ ညးပ္ညဳပ္ညပ်ကနေတာတံ ညံၚ်ဂွံကလေၚ်စဴကၠုၚ် အဝ်တာဝါ ဂှ် ကဵုလဝ်စၞောန်ပ္ညုၚ်လဝ်ရောၚ် ကာနေ ဟီုရ။
သွက်သ္ဂောံစဵုဒၞာအာ ပရေၚ်ဂုဏ်ဖိုလ်ကနေတာဂှ် နကဵုဂလာန်ပတေဟ်ခိုဟ်ဟ် ညးပ္ညဳပ္ညပ်တံ ဂစာန်ကၠုၚ်လဝ် အကြာတင်ဝါတ်ဂါတ်ခက်ခုဲကီုလေဝ် တၚ်တုပ်စိုတ် ကလိဂွံဟွံမာန်ပုဟ် ကာနေ သ္ဂးရ။
စိုပ်ခိၚ်မိနေတ်လက်ကရဴအိုတ်မှ အမေရိကာန် ကလေၚ်ပြံၚ်လှာဲထောံ တၚ်ပတိုန်ဂလာန်ညးတံဂှ် ဒှ်အရာဟၟဲကဵုပရေၚ်ဓဝ်ဍာံတုဲ သီုကဵုဟွံကိတ်ညဳမံၚ်ကဵု ပရေၚ်ပိုန်ဒြပ်ပုဟ် ညးဟီုရ။
ကာနေ မၞိဟ်မွဲတၠဟေၚ် ကေၚ်သ္ကိုပ်သ္ကကၠောန်ကၠုၚ်လဝ် ဗဟဵုဗာန် ပရေၚ်ပိုန်ဒြပ်အဓိကၜါဒၞာဲနွံတုဲ နကဵုကတိ သွက်သ္ဂောံတာဆေဝ်ဒဝ်အာ ထရဂးတုဲ ပ္ဍဲသၞာံတုဲကၠုၚ်ဏံ ဒးဒုၚ်ရုဲစှ်လဝ်မာဲအံၚ်ဇၞးအာတုဲ လၟုဟ်လေဝ် လ္တူညးတေံ မၞိဟ်တံစိုတ်လုပ်စဂၠိုၚ်မံၚ်ဖိုဟ်ရ။
လတူဗက်လဝ်ကဵုအခေါၚ်အရာ သွက်ထရဂှ် ကောန်ဍုၚ်ကနေတာဗွဲမဂၠိုၚ်တံ ဟွံဒးစိုတ်ပုဟ် ပ္ဍဲလိက်ကံက်တၚ်နၚ် လညာတ်မှာဇန်ညးတံ ထမံက်ထ္ၜးလဝ်ရ။
ပ္ဍဲအခိၚ်ကၠာကၠာတေံဂှ် အကာဲအရာသွက်သ္ဂောံကလိဂွံ ပရေၚ်တၚ်တုပ်စိုတ်အကြာၜါဍုၚ် ဆဵုကေတ်မာန်ကီုရောၚ်ဂှ် ရိုဟ်ကၞက်ပရိုၚ်တံ ဟီုရ။
ယမကာနူအမေရိကာန်တံ ကလေၚ်ပလံၚ်ပလံၚ်ဏာ ကနေတာတုဲ၊ ပသဲဍာၚ်၊ အလူမဳနဳယာမ် ကေုာံ ကပေါတ်ကွဳစက်နူကနေတာတံဂှ် သွက်အမေရိကာန် သ္ဂောံကလေၚ်ရာန်အာဂှ် အကာဲအရာကြပ်ကၠုၚ်မံၚ်ကီုရ။
အတိုၚ်စၟတ်ပိုၚ်ခြာလစွံစိုတ် နူအခိၚ်ပြဟ်ဟ်တေံဂှ်တှ်ေ နူလပါ်ကနေတာတံ တးပါဲထောံ သွက်သ္ဂောံသ္ပဒတန်တၚ်တုပ်စိုတ် ပရေၚ်ကူသာန်ဗၞိက်ဂှ်ရောၚ် ညးစၞးကူသာန်ဗၞိက် အမေရိကာန် ဂျာမဳယေန် ဂရဳယျာ ဟီုလဴကဵုလဝ်ရ။
Ref:BBC