လှာဒကှ်၊ အဝ်ဂတ် ၂၃
အပ္ဍဲတွဵုရးကရေၚ် ပွိုၚ်ဍုၚ်လှာဒကှ် ဟိုတ်နူဗြဲဂူရိုပ်ထတ်မံၚ်ဂှ် ဍာ်ၜဳဟမိတ် ဇၞော်တိုန်တုဲ အရာပ်ကွာန်ဂမၠိုၚ် ၃၀ ပြၚ် ဗၠိုက်ဒၟံၚ်ဍာ်ရဂှ် ညးဒေသတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
စနူဂိတုအဝ်ဂတ် ၂၀ တေံ ဟိုတ်နူဗြဲဂူဆက်မံၚ်ဟွံပိုတ်၊ ဍာ်ၜဳဟမိတ် ဆက်သၠုၚ်တိုန်မံၚ်တုဲ ပ္ဍဲအရာပ်တိသဝ်ဝ်တံဂှ် ဒးဆဵုဂဗမံၚ် ဍာ်ဗၠိုက် စဵုကဵုစိုပ်မံၚ် ကၟဳသ္ၚိတံရ။
“ဍာ်ၜဳအလန်ဏံ တိုန်ပြဟ်ကွေံကွေံရ။ အပ္ဍဲၜိုတ်မွဲနာဍဳဂှ် တိုန်အာ ၂ ပေပြၚ်ရ။ ဗြဲလေဝ် ဂူခိုဟ်မံၚ်။ ပ္ဍဲအရာပ် လၟေၚ် ၆ မ္ဂး စိုပ်မံၚ်အကာဲအရာ မံက်မံၚ်ဆကၟဳသ္ၚိတံသၟးရ” သာ်ဝွံ ညးလတူဍုၚ်မွဲတၠ ဟီုရ။
ဟိုတ်နူၜဳဟမိတ် ဍာ်ဇၞော်တိုန်ကၠုၚ်တုဲ ပ္ဍဲလတူဍုၚ်လှာဒကှ် အရာပ် ၆ ဂှ် ဒးဒုၚ်ဒၟံၚ်ဘဲဒဒိုက်ဍာ် ဗွဲမလောန်တုဲ ပ္ဍဲအရာပ်တိသဝ်ဝ် သှ်ေမံၚ်တံ ဂှ်တှ်ေ ဍာ်တတ်တိုန်ဂၠံၚ် ၜိုတ် ၂ ပေနွံတုဲ ပ္ဍဲသ္ၚိသဝ်သဝ်တံဂှ် ဍာ်လုပ်ကၠုၚ်ဒၟံၚ်ရ။
တုဲပၠန် ပ္ဍဲကွာန်ဂမၠိုၚ် ၃၀ ပြၚ် သီုကဵုကွာန်ဇိုၚ်ၜဳဟမိတ်တံ ကွာန်ကျာ်ပိုတ်၊ ဓနုၚ်၊ ဖာတလေဝ်၊ ကွာန်ဗေဒါရဳတံဂှ်လေဝ် ဍာ်သၠုၚ်တိုန်မံၚ် ၄ ပေပြၚ်အာရ။
ဟိုတ်နူဘဲဍာ်ဇၞော်တုဲ ရဲမံၚ်ပ္ဍဲသ္ၚိဟွံဂွံတံ နူအရာပ်လၟေၚ် ၆ ကဵု အပ္ဍဲကွာန်တံဂှ် ဒးအာပြံၚ်ဒၟံၚ် ပ္ဍဲဘာလကျာ်ဗဒါဲတံကီု ဒၞာဲတိသၠုၚ်ၚ်တံကဵု ဗ္ဒိုပ်ရီုဗၚ်ဟံၚ်ပြာ်တံဂှ်တှ်ေ မၞိဟ်နွံဒၟံၚ်ကြပ်စိုပ် ၁၀၀၀ တၠရောၚ် ဂွံတီရ။
ဟိုတ်နူ ဍာ်ၜဳဟမိတ် ဇၞော်မံၚ်တုဲ ပ္ဍဲဍုၚ်ကြုၚ်ဒဵု၊ လှိုၚ်ဗၠဲ၊ ပွိုၚ်ဍုၚ်လှာဒကှ်တံ ဗီုကဵုဍာ်ဇၞော်ဂှ်ကီု ဟိုတ်နူ ဍာ်ၜဳသံၚ်ရေၚ်ဇၞော် တိုန်တုဲ ပ္ဍဲပွိုၚ်ဍုၚ်ဗြဝတဳ၊ ကအ်ကြိက်တံလေဝ် ဍာ်ဇၞော်ဍာ်ပဵုၜက် မံၚ်တုဲ ညးဒေသလၟိဟ်လ္ၚီပြၚ်တံ ဒးပြံၚ်ဆုဲဒၟံၚ် ပရေၚ်ကာမံက်တိုန်ရ။
ပရိုၚ်- သြၚ်လောန်တိုၚ်မ်
Photo – CJ