ဗြဝတဳ၊ ဂိတုအဝ်ဂတ် ၂၃
ဟိုတ်နူမကမ်လွဟ်ဇၞော် ဒပ်ပၞာန်သီအဝဵုပန်ဏာလဝ်တုဲ ပရေၚ်ကိစ္စ ကောန်ပၞာန် DKBA တံ ချိုတ်အာလဝ် ဒးလဝ်ဝပ်ဇၞော်ကဵုဇြဟတ် တံဂှ် ဗွဲကြဴ ညံၚ်ဟွံဂွံထပ်က္တဵုဒှ်ပၠန်ဂးတုဲ နူကဵု NSPNC ညံၚ်သ္ဂောံဗိုၚ် ပ္ညဳပ္ညပ်စၟဳစၟတ်ကဵုအာမာန်ဂှ် ဒပ် DKBA ဗလံၚ်ဏာလိက် ပရေၚ်ဒစဵုဒစးမွဲတၞးရ။
နူကဵုဒပ်ပၞာန်ကရေၚ် ပတုဲဖိုလ်ဒီမိုကရေစီ DKBA ပလံၚ်ဏာလဝ် လိက်ဒစဵုဒစး ကုညးအုပ်ကာ ကမ္မတဳပ္ညဳပ္ညပ်ပရေၚ်ၜိုဟ်လလမ် ညဳသၟဟ်ကောန်ဂကူ NSPNC အလဵုအသဳပၞာန် နေပျဳဒဝ်ရ။
ပ္ဍဲဂိတုအဝ်ဂတ် ၁၇ ၜိုတ်အခိၚ်သဝ်တ္ၚဲ ၅ နာဍဳ ၂၅ မိနေတ်ဂှ် မကမ်လွဟ်ဇၞော် ပန်နၚ်နူကဵုတမ်ဒပ် ခလရ ၂၇၅ ဖျေံသ္ဇိုၚ် ပ္ဍဲဗြဝတဳဂှ် ဒတုံစှ်ေခတိုဟ်အာလဝ် အပ္ဍဲဒၞာဲဗ္ဒိုပ် ဒပ်ပၞာန်ကရေၚ် ပတုဲဖိုလ်ဒီမိုကရေစီ DKBA တံ ဖျေံလဝ်သ္ဇိုၚ်ဂှ်ရောၚ်။
ဟိုတ်နူဒးဘဲမကမ်လွဟ်ဇၞော်တုဲ ကောန်ပၞာန် DKBA ၂ တၠ ချိုတ်အာ၊ ကောန်ပၞာန် ၁၄ တၠတံကဵု ကောန်ၚာ် ၃ တၠ ဒးအာဝပ်နွံတုဲ အပ္ဍဲကဵု ညးဒးလဝ်ဝပ်တံဂှ်မ္ဂး ကောန်ၚာ်ကဵု ကောန်ပၞာန် DKBA ၉ တၠတံ ပရေၚ်အကာဲအရာဒးလဝ်ဝပ်ဂှ် ဂွိၚ်ဖေက်မံၚ်ကဵု အန္တရာဲလမျီုတံ ရောၚ် DKBA သ္ဂးလဝ်ရ။
DKBA ဂှ် ဒှ်မံၚ် ဒပ်ပံၚ်တောဲလဝ်ကဵုအလဵုအသဳဍုၚ်တုဲ သွက်ပရေၚ်ညိၚ်ဝပ် ၜိုဟ်လလမ်ဒေသ၊ ပရေၚ်ဇၞော်မောဝ်ဒေသ ကေုာံ သွက်ညးဍုၚ်ကွာန်တံ ဂွံတန်တဴစသုၚ်မံၚ်စံၚ်အာ ပြေပြေပြံၚ်ပြံၚ်ဂှ် ဂစာန်မံၚ်လၟိုန်တုဲ သွက်သ္ဂောံဂွံပရေၚ်ဓဝ် ၜိုဟ်လလမ် ဍာ်ဇမၠိၚ်မာန်ဂှ် ဒပ်ထမံက်မံၚ်ရုပ်ရဴ ပရေၚ်ပံၚ်တောဲ မံၚ်ကဵု အလဵုအသဳကၟိန်ဍုၚ်ရောၚ် သ္ဂးရ။
တုဲပၠန် သွက်ပရေၚ်ညိၚ်ဝပ်ၜိုဟ်လလမ် အပ္ဍဲဒေသတံမ္ဂး အတိုၚ်စၞောန်ပ္ညုၚ်အလဵုအသဳကၟိန်ဍုၚ်ဂှ် ပံၚ်တောဲကၠောန်မံၚ်ကဵု ဒပ်ပၞာန်ဗမာတံတုဲ စပ်ကဵုပရေၚ်မကမ်လွဟ်ဇၞော်ဒပ်ပၞာန် ဒတုံစှ်ေခတိုဟ်အာ အပ္ဍဲဗ္ဒိုပ်ဇကုဗီုဏံဂှ် အဟိန်ထမံက်မံၚ်ရုပ်ရဴ ပရေၚ်ၜိုဟ်လလမ်ဍာ်ဇမၠိၚ် အကြာညးသ္ကံတံဂှ် ညိမှဟွံထေက်ကဵု ဒးဒှ်ရောၚ် ဒပ် DKBA သ္ဂးလဝ်ရ။
“ဗွဲကြဴတေံ ပရေၚ်ဗီုဗီုဏံ ညိမှ(ညိမှ) ညံၚ်ဟွံဂွံထပ်က္တဵုဒှ်ပၠန် နူကဵုကမ္မတဳပ္ညဳပ္ညပ်ပရေၚ်ၜိုဟ်လလမ် ညဳသၟဟ်ကောန်ဂကူ ညံၚ်သ္ဂောံဗိုၚ်ပ္ညဳပ္ညပ်စၟဳစၟတ်ကဵုအာမာန်ဂှ် ဗွဲမအဲပရဲ ဒစဵုဒစးပတိုန်ထ္ၜးဏာရ” သာ်ဝွံ ချူလဝ်ပ္ဍဲလိက်ဒစဵုဒစး DKBA ပလံၚ်ဏာလဝ် ကု NSPNC ရ။
ဗ္ဒိုပ် DKBA ဒးဒုၚ်ပန်လဝ်ကဵုမကမ်လွဟ်ဇၞော် ဒပ်ပၞာန်ဗမာဂှ် ဒှ်မံၚ်ဗ္ဒိုပ် သ္ကိုပ်ညးတာလျိုၚ်က္ဍိုက်ပ်ပၞာန် သ္ကိုပ်ပၞာန် သဝ်သာန်အံၚ် ဖျေံသ္ဇိုၚ် ပ္ဍဲဒေသဖလူ ပွိုၚ်ဍုၚ်ဗြဝတဳ တွဵုရးကရေၚ်တုဲ အခိၚ်ကၠာတေံလေဝ် ပ္ဍဲပွဳဗွိုၚ်ဒၞာဲတံဂှ် မကမ်လွဟ်ဇၞော် နူဒပ်ပၞာန်ဗမာ ကေၚ်ဒတုံစှ်ေလဝ်နွံတုဲ ကောန်ပၞာန် DKBA တံကဵု ကောန်ကွာန်တံလေဝ် ချိုတ် ဒးဝပ်တံ ကေၚ်နွံကၠုၚ်လဝ်ရ။
ဒပ်ပၞာန် DKBA ဂှ် ဒှ်ဂကောံရပ်လွဟ်ကောန်ဂကူကရေၚ် သဳကၠဳမံၚ် ပရေၚ်ၜိုဟ်လလမ်ကဵုအလဵုအသဳပၞာန်တံတုဲ၊ လတူဗ္ဒိုပ်ဒပ် DKBA ကဵု ကောန်ပၞာန်တံကီု၊ ဒၞာဲရုၚ်ဌာန်ဂဥုပ်ဗဟဵု DKBA တံဂှ် နကဵုရန်တၟံနွံနွံ နူလပါ်ဒပ်ပၞာန်ဗၟာတံ ပန်ဗတိုက်ဒၟံၚ် မွဲဏှမွဲဏှ နွံရ။
ပရိုၚ် – သြၚ်လောန်တိုၚ်မ်
Photo – DKBA