သိုလ်၊ ဂိတုအဝ်ဂတ် ၂၅
ပ္ဍဲကဵုရတ်ယှာ သွက်သ္ဂောံဆက်ထပ်ဖျေံစွံအာ ကောန်ပၞာန်တၟိတံဂှ် နူကိုဝ်ရဳယာသၟဝ်ကျာ ဒစးဒုၚ်တုဲပလေဝ်စဒၟံၚ်ရောၚ် ဌာနပရေၚ်စဵုဒၞာ ကိုဝ်ရဳယာသၠုၚ်ကျာ ဟီုရ။
ဆဂး လကျှ်န်သွက်သ္ဂောံဖျေံစွံအာ ကောန်ပၞာန်တံ ဍာံဍာံပြပြဂှ် ဟွံဂွံဆဵုညာလဝ်ဏီပုဟ်ဂှ် နူရုၚ်အမာတ်စၠတ်ထဝ် ကိုဝ်ရဳယာသၠုၚ်ကျာ ဟီုရ။
ကြဴနူကဵု ကေန်ယဝ်ဂျံၚ် ဒေံဗြဴ ၝောံက္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန် တးပါဲထောံ ဂလာန်သမ္မတ ယူခရုၚ် ဗိုဝ်လဝ်ဒဳမာ ဇဳလၚ်သကဳ ဟီုလဝ် ကိုဝ်ရဳယာသၟဝ်ကျာ ပလေဝ်စဒၟံၚ် သွက်သ္ဂောံဗလးဏာ ကောန်ပၞာန် ၅၀၀၀၀ သွက်ဂွံဗတိုက်ယူခရုၚ်ကီု သွက်ဂွံဗိုၚ်ရီုဗၚ်ရတ်ယှာတံကီု ပရေၚ်ဟီုပတိတ်ဏံ မံက်ကၠုၚ် မဒှ်ရ။
နူကဵုကိုဝ်ရဳယာသၟဝ်ကျာ စဳဇန်ဒၟံၚ် သွက်သ္ဂောံဆက်ထံက်ပၚ်အာ သွက်ရတ်ယှာ မကမ်သၠောဝ်ထိၚ်သၠသၞေဝ်တာဒမၠေံ သၞောတ်လွဟ်နာနာတံနွံရောၚ် ပ္ဍဲလိက်လလောၚ်တြး ဌာနပရေၚ်စဵုဒၞာ ကိုဝ်ရဳယာသၠုၚ်ကျာ ဗလံၚ်ဏာကဵု အမာတ်စၠတ်ထဝ် ယူယံၚ်ဝန်ဂှ် ချူထမံက်ထ္ၜးလဝ်ရ။
ကိုဝ်ရဳယာသၟဝ်ကျာ ထံက်ပၚ်ကဵုလဝ် မကမ်လွဟ်ဇၞော် ၁၅ ပြကောတိကိုတ်ပြၚ် သွက်ရတ်ယှာနွံတုဲ ညဳသၟဟ်မံၚ်ကဵု လၟိဟ်ခၞော်မကမ်အဇာဇၞော်ဇၞော် ၁၅၂ မဳလဳမဳတာဂှ်ရောၚ် နူကိုဝ်ရဳယာသၠုၚ်ကျာ ဟီုရ။
ဒုၚ်သ္ဇိုၚ်ကဵု အေဂျေန်သဳထံၚ်ပရိုၚ် ပရေၚ်စဵုဒၞာတုဲ ရုၚ်အမာတ်စၠတ်ထဝ် ထမံက်ထ္ၜးဏာလဝ် တၚ်နၚ်ဂှ်တှ်ေ နူကိုဝ်ရဳယာသၟဝ်ကျာ ထံက်ပၚ်လဝ် သွက်ပေါဲပၞာန်ယူခရုၚ်တံဂှ် ဍာံစၟတ်ပဵုဂၠိုၚ်တိုန်ဒၟံၚ်တုဲ ဟိုတ်နူပံၚ်တောဲစကာအာကဵု နဲကဲပညာအဆံၚ်သၠုၚ် ရတ်ယှာတံတုဲ ဍာ်ဒကေဝ်ပဵုသၠုၚ်တိုန်ဒၟံၚ်ရောၚ် ဂွံတီရ။
သွက်ရတ်ယှာတံ ကိုဝ်ရဳယာသၟဝ်ကျာ စကာဒၟံၚ် သၞောတ်လွဟ်ညးတံ ပ္ဍဲယူခရုၚ်ဂှ်တှ်ေ ဒှ်ဒၟံၚ်ပရေၚ်ဒစးဒုၚ်စမ်ၜတ် သွက်သ္ဂောံစကာဗတိုက်အာ ကိုဝ်ရဳယာသၠုၚ်ကျာရောၚ် နူကိုဝ်ရဳယာသၠုၚ်ကျာ ဟီုလဝ်ရ။
ကိုဝ်ရဳယာသၟဝ်ကျာ စမ်ၜတ်လဝ် မကမ်သၠောဝ်ထိၚ်သၠသၞေဝ် ဟွာသောၚ်-၁၂ စဵုကဵုရးနိဂီုအမေရိကာန် ပန်စိုပ်အာ မာန်ရောၚ်ဂှ် နူဒပ်ပၞာန်ကိုဝ်ရဳယာသၠုၚ်ကျာ ဟီုရ။
မကမ်သၠောဝ်ထိၚ်သၠသၞေဝ် ကိုဝ်ရဳယာသၟဝ်ကျာ စမ်ၜတ်လဝ်တံဂှ် ပန်စိုပ်အာ စဵုကဵုကုန်ဒဵုဗလးတိအပ္ဍဲ အမေရိကာန်မာန်ရောၚ် ဂွံတီရ။
အပ္ဍဲသၞာံဏံ သွက်သ္ဂောံဆဵုဂဗကဵု က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန် ဂှ် သမ္မတအမေရိကာန် ဒဝ်နေဝ်ထရ ကဵုမံၚ်ဇြဟတ်ဟရိုဟ် ကုညးတာလျိုၚ်သၟဝ်တဲညးတံရောၚ် ဂွံတီရ။
Ref:Reuters