တၞၚ်သဳ၊ နဝ်ဝေမ်ဗာ (၂)
ဟိုတ်နူပေါဲဗ္တိုက် မက္တဵုဒှ်လဝ် အပ္ဍဲကွာန်ညံၚ်ပေန်ကွေန် ကေုာံ ကွာန်ဗာန်လဝ်၊ ပွိုၚ်ဍုၚ်တၞၚ်သဳ၊ ရးတၞၚ်သဳတံဂှ်ရ ညးဒေသ (၃၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရဂှ် ညးမကဵုဒၟံၚ်အရီုဗၚ် ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုအံက်တဝ်ဗာ (၂၉) တုဲကၠုၚ်တေံတုဲ ပ္ဍဲဗ္ဒါဲကွာန်ညံၚ်ပေန်ကွေန်ဂှ် အကြာဒပ်ကံၚ်ဇြဳပၞာန် ကဵု ဒပ်စဵုဒၞါညးဍုၚ်ကွာန်ဒေသတံဂှ် က္တဵုဒှ်လဝ် ပေါဲဗ္တိုက်ဆေၚ်မုက်တံရ။
ပေါဲဗ္တိုက်ဂှ်ဝွံ ကၠောံထၞာန်စိုပ်ကၠုၚ် စဵုကဵုလ္ပာ်ကွာန်ဗာန်လဝ်တုဲဂှ် ဒဵုကဵုအခိၚ်လၟုဟ် ပေါဲဗ္တိုက်ၜါလ္ပာ်တံ ဆက်သ္ကာတ်မြဟ်ဒၟံၚ်ရ။
ဟိုတ်နူပေါဲဗ္တိုက်တံဏံတုဲ ညးဍုၚ်ကွာန်ဒေသ (၃၀၀၀) ပြၚ် နူကဵုကွာန်ညံၚ်ပေန်ကွေန်၊ ဗာန်လဝ်၊ ချံက်မိုၚ်၊ ထုၚ်ဒဝ်၊ မုက်သုက်ကွေန်၊ ကျဲထုၚ်ကွေန် တံ မပါလုပ် ညးဒေသနူကဵုအပံၚ်ကွာန် (၈) ကွာန်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲကွာန် မသကလောကောဒေံ မၞုံဂှ်ကဵု ပ္ဍဲဒဵုဂြိုပ် မကြပ်တံရ။
သ္အာၚ်နူဂှ်ပၠန် အပ္ဍဲပေါဲဗ္တိုက်ၜါလ္ပာ်ဏံဂှ် ဟိုတ်နူဒးအာ လွဟ်ဇၞော် နူကဵုဒပ်ကံၚ်ဇြဳပၞာန်တံ ပန်ပှော်လဝ်ဂှ်ရ ညးဒေသ (၂) တၠ ကလိဂွံလဝ်ဝပ်သ္ကာတ်မြဟ်တုဲ သ္ၚိဒၟံၚ် (၁၂) မဟွံက ဒးလီုလာ်စာ်ထောၚ်အာလဝ်ရ။
ညးတာလျိုၚ် ဂကောံဒပ်ဒမၠုက် ဟွံဗက်စလ္ပာ် မွဲတၠဂှ်လေဝ် ဒၟါနူပေါဲဗ္တိုက် ၜါလ္ပာ်တံ သာသ္ကာတ်မြဟ်ကၠုၚ်မာန်ဂှ်ရ နကဵုညးဍုၚ်ကွာန်တံ သွက်ဂွံဆုဲပြံၚ်မံၚ်စံၚ်ကဵု ဒၞါဲဗၠးဘဲတံအိုတ်ဂှ် ဖ္တိုက်ဖ္အောဝ်လဝ်ရ။
ပ္ဍဲရးတၞၚ်သဳဂှ် ကြဴနူဒပ်ပၞာန်သီအဝဵုတုဲ ဟိုတ်နူပေါဲဗ္တိုက် ဒပ်ကံၚ်ဇြဳပၞာန် ကဵု ဒပ်စဵုဒၞါညးဍုၚ်ကွာန်ဒေသတံဂှ်ရ ညးဍုၚ်ကွာန်ပါဲဒဴဘဲပၞာန် (၁၀၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)