လ္ဂုၚ်၊ နဝ်ဝေမ်ဗာ (၂)
ပ္ဍဲရးလ္ဂုၚ် အပ္ဍဲလၟေၚ်ဒဒှ် ပွပန်ပှော်ဗ္တိုဟ်ထ္ကး က္တဵုဒှ်လဝ် အပ္ဍဲဂိတုအံက်တဝ်ဗာ မွဲဂိတုဓဝ်ဂှ် သီုကဵုကဆံၚ်ဗိုလ်ဇၞော် ကံၚ်သဳပၞာန် မပါလုပ် (၂၀) တၠ ချိုတ်အာလဝ်ဂှ် ဂွံတီကေတ် အတိုၚ်တၚ်နၚ် နူကဵုဌာန်ပရိုၚ်သြၚ်လောန်တိုၚ်(မ်) မကံက်ကပှ်လဝ်တံရ။
အပ္ဍဲဂိတုတုဲကၠုၚ်တေံ ပ္ဍဲပွိုၚ်ဍုၚ် ဥက္ကာလာပသၟဝ်ကျာ၊ ဒဂုၚ်သၟဝ်ကျာ၊ (တွံတေး) ၊ ယှိုဲပျဳတာ၊ လှာၚ်တံဂှ် ဂကောံဒပ်ဒမၠုက် လ္တူဍုၚ်တံ ကၠောန်သ္ပပန်ပှော်လဝ် ဟွံအောန်နူကဵု (၁၀) ဝါရ။
အပ္ဍဲပရေၚ်ဗ္တိုက်ပန်ပှော်ဏံဂှ် ဗိုလ်ဇၞော်ကံၚ်ဇြဳပၞာန်မွဲတၠ ၊ ကောန်ဒပ်၊ သ္ကိုပ်သ္ၚိကၠံ၊ သ္ကိုပ်အုပ်ဓုပ် တံ မပါလုပ် အပံၚ် (၁၂) တၠ ချိုတ်အာလဝ်ရ။
ပ္ဍဲကဵုပရူပရာ မခတိုဟ်ဗ္တိုဟ်ထ္ကးတံဂှ်မ္ဂး ပ္ဍဲပွိုၚ်ဍုၚ်လှာၚ်၊ ဒလ၊ ယှိုဲပျဳတာ၊ ဥက္ကလာပသၠုၚ်ကျာ၊ လှာၚ်သာယာ၊ တာမွဲ၊ ဥက္ကလာပသၟဝ်ကျာ၊ သာကေတ၊ (စမ်းချောၚ်း) ၊ ဗဟာန်၊ ( ရန်ကၚ်း) ၊ ကၟာရတ် ကေုာံ ပွိုၚ်ဍုၚ် (မရမ်းကုန်း)တံဂှ် က္တဵုဒှ်လဝ် (၂၂) ဝါရ၊ ပ္ဍဲကဵုလၟေၚ်ဒဒှ် မခတိုဟ်ဗ္တိုဟ်ထ္ကးဏံဂှ် (၈) တၠ ချိုတ်တုဲ (၃၇) တၠ ကလိဂွံလဝ်ဝပ်ရ။
ပ္ဍဲကဵုမခတိုဟ်ဗ္တိုဟ်ထ္ကး အပ္ဍဲဂိတုအံက်တဝ်ဗာ ပ္ဍဲဍုၚ်လ္ဂုၚ်တံဂှ် ပရူပရာ မခတိုဟ်ဗ္တိုဟ်ထ္ကးလဝ် ပ္ဍဲထံၚ်အေန်ဇြုၚ် တုဲကၠုၚ်ဂိတုအံက်တဝ်ဗာ (၁၉) တေံ သၞာဲဒဴထံၚ်စာတ် (၃) တၠ ကေုာံ ညးဗြဴကၠုၚ်ပလံၚ်စၞစ ကုကောန်ထံၚ်တံ (၅) တၠ ချိုတ်အာလဝ်တုဲ (၁၈) တၠ ကလိဂွံလဝ်ဝပ်ဂှ်လေဝ် ပါလုပ်ရ။
ပရေၚ်ပန်ပှော် ကေုာံ ပရေၚ်မခတိုဟ်ဗ္တိုဟ်ထ္ကး မက္တဵုဒှ်လဝ် ပ္ဍဲဍုၚ်လ္ဂုၚ် တုဲကၠုၚ်ဂိတုသေပ်တေမ်ဗာတေံဂှ် (၄၇) ဝါနွံတုဲ သ္ကိုပ်ဗိုလ်ဒေါအ်ဇူ ဥုံတွေန် မပါလုပ် (၁၅) တၠ ချိုတ်တုဲ (၂၆) တၠ ကလိဂွံလဝ်ဝပ်ရ။
ဂကောံဒပ်ကံၚ်ဇြဳပၞာန်တံဝွံ ပွမဗ္တိုဟ်ထ္ကးတံ က္တဵုဒှ်ဗက် ပ္ဍဲကဵုအရာပ်သ္ၚိဒၟံၚ် မၞုံဗ္ဒါဲဗ္ဒါဲတံဂှ် လုပ်စိုပ်စၟဳစၟတ် စဵုကဵုအပ္ဍဲသ္ၚိကီု၊ ကၟာတ်ဂၠံၚ်တုဲ ဂၠိုက်ဂၠါဲကၠုၚ်တံကီု၊ ဗီုကြိုက်စိုတ် စၟဳစၟတ်ညးဍုၚ်ကွာန်တံတုဲ အာတ်မိက်ဒၟံၚ်သြန်တံဂှ် ကၠောန်သ္ပဒၟံၚ် အဆက်က်ရောၚ် ညးဒေသတံ သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)