ၜဳကလေၚ်၊ ဂိတုအဝ်ဂတ် ၂၅
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ညးပါဲဘဲပၞာန်နူကွာန်လေဝ်ကေ ကဵုကွာန်ဝေၚ်တာပါန် ကြပ် ၅၀၀၀ တၠတံဂှ် လံကၠုၚ် ၄ ပွိုၚ်ဂိတုကီုလေဝ် ကလေၚ်စဴဒၞာဲဝါဲသ္ၚိဌာန်ညးတံဟွံမာန်ဏီပုဟ် ညးအုပ်ကာခရိုၚ်သဓီု KNU ပဒိုသဝ်ဧနိုၚ် ဟီုလဴကဵု ဌာန်ပရိုၚ်-သြၚ်လောန်တိုၚ်မ်ရ။
ဟိုတ်နူဒပ်ပၞာန်ဗၟာဖျေံလဝ်ဒပ် ပ္ဍဲကွာန်လေဝ်ကေကဵု ကွာန်ဝေၚ်တာပါန်တံတုဲ ညးပါဲဘဲပၞာန်တံဖေက်ဒးဒုၚ် ရပ်ချုက် ပျဲပျာံ၊ ဖေက်ဒးဒုၚ်စကာ ပဝ်တာ၊ ဖေက်ဒးဒုၚ်စကာ ကုတ်ထဗိုၚ်ဆုဒုန်တံတုဲ ဟွံဂံၚ်ကလေၚ်စဴကၠုၚ် ဌာန်ဒၞာဲညးတံဏီပုဟ် သ္ဂးရ။
အခိၚ်လၟုဟ်ဏံ ဒပ်ပၞာန်သီအဝဵုတံဂှ် ၜံက်ခါဲဒၟံၚ်ဗရံၚ်ဆက်စၠောံတံကီု၊ သိုၚ်ခၞံဒၟံၚ်ဗ္ဒိုပ် ဗါန်ကာခိုၚ်ၚ်ကၠိုက်က် အပ္ဍဲကွာန်လေဝ်ကေကေုာံ ကွာန်ဝေၚ်တာပါန်တံဂှ် ဖျေံပခိုၚ်စွံလဝ်ဒပ်တုဲ ပရေၚ်ပန်လွဟ်ဇၞော် လွဟ်ဍောတ်တံလေဝ် ကၠောန်ဒၟံၚ်ဇၟာပ်တ္ၚဲနွံရ။
ဟိုတ်နူဒပ်ပၞာန်သီအဝဵုတံ ဆက်ဖျေံဒၟံၚ်ဗ္ဒိုပ်အပ္ဍဲကွာန်တံဏံဂှ်ရ ညးဒေသတံဟွံဂံၚ်ကလေၚ်စဴ သ္ၚိဌာန်ဒၞာဲဝါဲညးတံတုဲ ဆက်မံၚ်အာဒၟံၚ်အကြာကၠအ်သွဝ်၊ ဒၞာဲဒဵုဂြိုပ်တံကဵု ဇရေၚ်သ္ၚိဌာန်ကလောမသ ညးတံရ။
သွက်ပရေၚ်မံၚ်စံၚ်စသုၚ် ညးပါဲဒဴဘဲပၞာန်တံဏံဂှ် နူခရိုၚ်သဓီုဗော်သွးကောန်ဂကူကရေၚ် KNU မဟာဒပ် ၁ ကေုာံ ဂကောံမှာဇန်ကရေၚ်တံ ကဵုလဝ်ပရေၚ်အထံက်ပၚ် စၞစဇွောံမတံကီု တုဲပၠန် ဗီုကလောန်စုက်လုက်ဆဵုညာတ်အာဂှ် ဒးဗက်ကၠောန်အာမံၚ်တုဲ ဒးသောၚ်ကလးအာမံၚ် ပရေၚ်ဗုၚ်ဂၞဴညးတံရဂှ် ဂွံတီရ။
ပ္ဍဲဂိတုအေပြဳလောန်ကၠုၚ်တေံ ဒၞာဲဗ္ဒိုပ်ဒပ်လေဝ်ကေဂှ် ဒပ်ပၞာန်ဗၠးၜးကောန်ဂကူကရေၚ် KNLA ကေုာံ ဒပ်ပံၚ်တောဲ PDF တံသီကေတ်လဝ်တုဲ ဗ္ဒိုပ်ဝေၚ်တာပါန်ဂှ်လေဝ် ပေါဲဗတိုက်သီဗ္ဒိုပ် က္တဵုဒှ်လဝ် လံအာကြပ်မွဲဂိတုကီုရ။
တုဲပၠန် ၜိုတ်ဂိတုမေအိုတ်ဂှ် နူလပါ်ဒပ်ပၞာန်ဗၟာ ကလေၚ်ထိၚ်ချုက်ဂွံအာ ကွာန်လေဝ်ကေကေုာံ ကွာန်ဝေၚ်တာပါန်တံမာန်တုဲ၊ အကြာပေါဲဗတိုက်ၜါလပါ်ဟိုတ်နူဒပ်ပၞာန်ဗၟာ ကြဳဗုမ်နူဗလးကျာကဵု ပန်လွဟ်ဇၞော်တုဲ သ္ၚိဌာန်ကောန်ကွာန် လၟိဟ်ကၠံမပြၚ် ဒးဒုၚ်လီုလာ်အာလဝ်နွံရ။
ပရိုၚ် – သြၚ်လောန်တိုၚ်မ်
Photo – CJ