ဗေကျေန်၊ အဝ်ဂတ် ၂၆
ပရေၚ်ပံၚ်တောဲအကြာ အဳရာန် ကဵု ကြုက်တံဂှ် ရေၚ်တၠုၚ်အာမံၚ် အပ္ဍဲကဵုမူပရေၚ်ဥပဒေဂၠးကဝ်တံတုဲ ပွမလုပ်ပြံက် ဟွံသေၚ်မ္ဂး ကၠောန်ပထုဲပလီုအာ ဟွံထေက်ပုဟ် ပ္ဍဲအဝ်ဂတ် ၂၅ ဏံ ညးနွံအခေါၚ်ဟီုဂး ဌာနပရေၚ်ဍုၚ်သအာၚ် ကြုက် ဟီုရ။
ပ္ဍဲကဵုဝၚ်အဳရာန် မွဲလှ်ေဟွံဒးကေၚ်ဆဵုဏီ သွက်သ္ဂောံဖျေံအာဒဏ် ပရေၚ်ကၟာတ်ဆိုအ်ပိုန်ဒြပ်ရောၚ် အခိၚ်သၟာန်ဏာ စပ်ကဵုဝန်ဇၞော်ပရေၚ်ဘဏ္ဍာ အမေရိကာန် မဟီုလဴလဝ်ဂှ် ညးနွံအခေါၚ်ဟီုဂး ဌာနပရေၚ်ဍုၚ်သအာၚ် အဳရာန်တံတုဲ ကလေၚ်ခၠေဝ်ဟီုလဝ် အတိုၚ်ဏံရောၚ်။
ပရေၚ်အပြံၚ်လှာဲ အကာဲအရာတံဂှ် နူကြုက် မၚ်ရံၚ်အာမံၚ်ကြပ်ပ်တုဲ သွက်သ္ဂောံစဵုဒၞာအာ ပရေၚ်ဂုဏ်ဖိုလ်ပုဂ္ဂလိကဇကုတံ အစဳဇန်အရာပရေၚ်နွံမံၚ်ပၟိက်အိုတ်သီုတံဂှ် ဖန်ဖက်ရေၚ်တၠုၚ်အာရောၚ် ညးနွံအခေါၚ်ဟီုဂး ဌာနပရေၚ်ဍုၚ်သအာၚ် ကြုက် လေန်ကျေန် ဟီုလဴ ပ္ဍဲပေါဲသောၚ်ကလးပရိုၚ်ရ။
နူကဵုအမေရိကာန် ဖျေံဒဏ်ပရေၚ်ကၟာတ်ဆိုအ်တၟိ လတူပုဂ္ဂိုလ်၊ ကမၠောန် ကေုာံ ၜၚ်အဳရာန် ၆၀ မဂှ် လလောၚ်တြးဏာ ပ္ဍဲအဝ်ဂတ် ၂၄ ရ။
သွက်သ္ဂောံကုတ်ထပိုတ်ထောံ ဇုက်လမျီုဆီအတၚ်ပရေၚ်ပိုန်ဒြပ် အဳရာန် ၜိုန်ရအမေရိကာန် ဟီုလဝ်ကီုလေဝ် အစဳဇန် သွက်သ္ဂောံကဵုဒုဟ်ဒဏ် မံက်တိတ်ကၠုၚ်ချိုတ်တ်ပၠိုတ်တ်တံဂှ် ဟွံဆဵုညာတ်လဝ်ဏီပုဟ်။
လတူအဳရာန်တံ ကြဴနူအမေရိကာန် လလောၚ်တြးဏာ ပေါဲပၞာန်ပရေၚ်ပိုန်ဒြပ်တုဲ သွက်သ္ဂောံကလေၚ်ပလန်အာ ပရေၚ်ဖျေံဒဏ်ကၟာတ်ဆိုအ် အမေရိကာန်တံသၠဲသၠဲလးလးမာန်ဂှ် ဂလာန်ပတေဟ်နွံမံၚ်ပေၚ်ၚ်ရောၚ် နူအဳရာန် ဟီုရ။
နူပရေၚ်ပိုန်ဒြပ်ဂၠးကဝ်ဂှ် ညံၚ်အဳရာန်တံ ဂွံဒှ်အာဗွဲတၞဟ်ခြာကီု ညံၚ်ဟွံဒးထပ်ကၠောန် ပရေၚ်လဝေၚ်ပၞာန်ဇၞော်ဇၞော်တံတုဲ ပရေၚ်ပိုန်ဒြပ်အဳရာန်တံ ညံၚ်ဂွံဟုတ်မာဲစှ်ေအာဂှ် ကၠောန်ရောၚ် နူလပါ်အမေရိကာန် ဟီုလဝ်ရ။
သွက်ဂွံဒုၚ်ဒဝ် ပရေၚ်ဖျေံဒဏ်ကၟာတ်ဆိုအ် အမေရိကာန်တံဂှ် နူတဳဟဳရာန် ဒစးဒုၚ်ပလေဝ်စလဝ် ၁၀၀ က္ဍိုပ်ကၠံတုဲတုဲရောၚ် သ္ကိုပ်ဝန်ဇၞော်ပရေၚ်ပိုန်ဒြပ်အဳရာန် အလဳ မာတာနဳသာဒက် ဟီုရ။
ယဝ်ရအမေရိကာန် ထပ်ဖျေံဒဏ်ပရေၚ်ကၟာတ်ဆိုအ်တံပၠန်မ္ဂး ဒးဆဵုဂဗကဵု ပရေၚ်ဟောံဗြောံကျလေၚ်အာ မွဲဝါပၠန်ဂှ်လေဝ် ညးသ္ဂးရ။
ယြဴဍုၚ်ဗီုလဵုမွဲဒှ်ဒှ် နကဵုပရေၚ်ဘဏ္ဍာ ပံၚ်တောဲဒၟံၚ်ကဵု အဳရာန်မ္ဂး ဒးဒုၚ်ကၠောန်ညံၚ်ဂွံတိတ်အာတၞဟ်ခြာတုဲ၊ ပရေၚ်ဗာန် ကမၠောန်ပရေၚ်ပိုန်ဒြပ် ပံၚ်တောဲကၠောန်မံၚ်ကဵု အဳရာန်တံဂှ် ယဝ်ရဟွံဒုၚ်တဲ ပရေၚ်ကုတ်ထပိုတ်ဆက်ဆောံတံမ္ဂး ဒးဆဵုဂဗအာကဵု ပရေၚ်ဖျေံဒဏ်ကၟာတ်ဆိုအ်တံရောၚ် အမေရိကာန် ဘပဠလဝ်ရ။
သွက်သ္ဂောံကၠောန်အာ ပရေၚ်ကၟာတ်ဆိုအ် ဂၠံၚ်သြန်လုပ် အဳရာန်တံအိုတ်သီုဂှ် နူအမေရိကာန် စဳဇန်လဝ်နွံမံၚ် ဝန်ဇၞော်ပရေၚ်ဘဏ္ဍာ ဗက်သန်က် ဟီုရ။
ဟိုတ်နူဍုၚ်မိတ်သဟာဲ ပရေၚ်ကူသာန်ဗၞိက် အဳရာန်တံ နွံမံၚ်ကီုတုဲ ပရေၚ်ဖျေံဒဏ်ကၟာတ်ဆိုအ် အမေရိကာန် လက်ကရဴအိုတ်ဏံ ကမၠောန်ဒှ် ဟွံဒှ်ဂှ် နူတၠပညာပရေၚ်ပိုန်ဒြပ်လ္ၚဵုတံ ပတိတ်မံၚ်တၚ်သၟာန်နွံရ။
Ref:Reuters