ကအ်ကြိက်၊ အဝ်ဂတ် ၂၆
အပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် အခိၚ်ဗြဲဂူဍာ်ဇၞော်မံၚ်ဏံ ဟိုတ်နူဂၠုၚ်စက်ဟကပ်အာ အကြာကွာန်ကအ်ခိုက်ကဵု နွာချာန်ကုၚ်တုဲ အစာဗြဴမွဲတၠချိုတ်အာရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲဂိတုအဝ်ဂတ် ၂၄ အခိၚ်နူဂယးၜိုတ် ၁၁ နာဍဳဂှ် ညးအဝဲသၟတ် ၈ တၠတံ ဍိုက်ကၠုၚ်ဂၠုၚ်စက်ဖံၚ်မွဲမ နူကွာန်ကအ်ခိုက် ပတဝ်ဏာကဵုကွာန်နွာချာန်ကုၚ်ဂှ် ဟိုတ်နူလျိုၚ်ဂၠိုၚ်အာဂှ်ရ ပရေၚ်ဂၠုၚ်ဟကပ်ဏံ က္တဵုဒှ်လဝ်ရ။
အပ္ဍဲဂၠုၚ်စက်ဖံၚ်ဏံဂှ် ဖ္ဍိုက်ဍိုက်ကၠုၚ်လဝ်မၞိဟ် ၈ တၠ သီုကဵုအစာဗြဴချိုတ်အာဂှ်ကီု၊ ကွဳလိုန်ဓါတ် ၂ မကေုာံ ကပေါတ်ဗၞိက်လ္ၚဵုတံပါကီုတုဲ ဟိုတ်နူဟွံမာန်လျိုၚ်တုဲ ဟကပ်အာလဝ်ရောၚ် ညးဒေသတံသ္ဂးရ။
ပ္ဍဲကဵုပရေၚ်ဂၠုၚ်ဟကပ်ဏံဂှ် အစာဗြဴဘာတန်ဒေါဝ် နအ်ဥူ အာယုက် ၃၀ သၞာံ နူဘာသ္ဇိုၚ်ပရေၚ်ပညာတန်ဒေါဝ် ကွာန်နွာချာန်ကုၚ်ဂှ် ချိုတ်အာလဝ်ရောၚ် ဂွံတီရ။
အစာဗြဴနအ်ဥူတံ မွဲဂကောံဝွံ အဟိန်အာရာန်ဒၟံၚ်ကပေါတ် သွက်ပေါဲမ္ၚဵုဒက်ဇုက်တဲ တောဝ်ပလဲဗတာၚ် အခိုက်ကၞာကရေၚ် ပ္ဍဲဂိတုခဍဲသဳဏံဂှ် ပရေၚ်ဂၠုၚ်စက်ဟကပ်ဏံ က္တဵုဒှ်အာရ။
ဇွအစာဗြဴနအ်ဥူ ချိုတ်အာလဝ်ဂှ် ကြဴနူက္တဵုဒှ်ပရေၚ်ကိစ္စဏံတုဲ ၜက်အာပွိုၚ် ၂ နာဍဳပြၚ်တုဲမှ ညးဒေသတံကလေၚ်ဂၠာဲဆဵုဂွံ ပ္ဍဲပွဳဗွိုၚ်ဒၞာဲဂၠုၚ်ဟကပ်လဝ်ဂှ်ပၠန်ရ။
ပ္ဍဲဂိတုအဝ်ဂတ် ၂၁ လောန်ကၠုၚ်တေံလေဝ် ပ္ဍဲတွဵုရးကရေၚ် ပွိုၚ်ဍုၚ်လှာဒကှ် အခိၚ်ဍာ်ဇၞော်မံၚ်ဂှ် ပ္ဍဲကွာန်လိုၚ်ကၞုဲ ဂၠုၚ်စက်မၞိဟ်ပါ ၁၁ တၠ ဟကပ်အာကီုလေဝ် ဟံၚ်ပြာ်ဂွံဏာလဝ်ဂျိုၚ်ၚ် သီုဖအိုတ်ကီုရ။
ပရိုၚ် – သြၚ်လောန်တိုၚ်မ်
Photo – Social Media